Yao daa nsaꞌ yeḻꞌ mbannaꞌ
22
Naꞌ bliꞌyi anjlaꞌ nadꞌ to yao dii nxi nyech yollan nis daa nsaꞌ yeḻꞌ mbannaꞌ, naꞌ nakan nis xtil inlleb kaꞌkzə vidr. Naꞌ chchejan ganaꞌ llia Chiozaꞌ chṉabiꞌe len Jesucrístonaꞌ, Beenaꞌ Zaklebi to Xilꞌdoꞌ,
2 naꞌ chden gchoḻ nezaꞌ daa chde yellaꞌ. Naꞌ c̱hop ḻaate choꞌa yawaꞌ zoa yagkaꞌ nsaꞌ yeḻꞌ mbannaꞌ, naꞌ ze tbeoꞌ wej chbiagakan dii zix̱kaꞌ, naꞌ shlliṉ shii chbiagakan twiz. Naꞌ xḻaguiinkaꞌ nakgakan bell rmech c̱he beṉꞌ yell-liokaꞌ.
3 Naꞌ bibi daa nashj biaꞌ blagꞌ c̱heyin gatꞌch yellaꞌ, ḻaꞌ nanꞌ kwia Chiozaꞌ iṉabiaꞌleneꞌ Jesucrístonaꞌ, Beenaꞌ Zaklebi to Xilꞌdoꞌ. Naꞌ yogꞌ beṉꞌkaꞌ lleꞌ naꞌ weꞌlaꞌogakeꞌneꞌ.
4 Naꞌ ileꞌgakileꞌneꞌ kon ka nakyeṉee, naꞌ taꞌ lieꞌnaꞌ loxgueꞌkaꞌ.
5 Aga bich bi waḻ gatꞌ, ni bich bi yiꞌ kandil iyalljgakileꞌ ni beeniꞌ c̱he wbilldoꞌnaꞌ, ḻaꞌ beeniꞌ c̱he X̱ancho Chiozaꞌ wzeeniꞌn ganaꞌ soagakeꞌ, naꞌ iṉabiaꞌgakeꞌ zejḻi kaṉi.
Ba zoa yilaꞌ Jesucrístonaꞌ
6 Naꞌ wna anjlaꞌ nadꞌ:
―Dillꞌki nakgakan dii ḻi naꞌ nakgakan dii gak wx̱enilallꞌ beṉꞌ. X̱ancho Chiozaꞌ, beenaꞌ chx̱oa xtilleenaꞌ choꞌa ḻollꞌ beṉꞌkaꞌ chyix̱jee daa chiꞌe ḻegakeꞌ, ba bseḻee nadꞌ nakꞌ anjl c̱heꞌ kwenc̱he wliidꞌ beṉꞌkaꞌ nak lallꞌ nee daa ba zoa gaoshosh gak.
7 ―¡Ba zoa gaoshosh yiyedꞌ!
Chakomba beenaꞌ ze wṉeyi dillꞌki llia ḻee libri c̱heyi diikaꞌ ba wna Chiozaꞌ gak.
8 Nadꞌ, Juan, ben bleꞌidꞌ diiki. Naꞌ ka biyoll ben bleꞌidaꞌn, bc̱hekꞌ xibꞌ nan weꞌlawaa anjlaꞌ, beenaꞌ bliꞌyi nadꞌ diikaꞌ.
9 Naꞌ ḻeꞌ wneꞌ nadꞌ:
―¡Bi gonoꞌ kaꞌ! Nadꞌ nakꞌ wen llin c̱he Chiozaꞌ ka liꞌ naꞌ ka bishꞌ ljwelloꞌkaꞌ, beṉꞌkaꞌ choꞌe choꞌa xtillꞌ Chiozaꞌ, naꞌ ka yogꞌ beṉꞌkaꞌ zegakeꞌ kwent wṉeyi daa llia ḻee libri. Toz Chiozanꞌ chiyaḻꞌ weꞌlawoo.
10 Naꞌ ḻekzkaꞌ wneꞌ nadꞌ:
―Bi wkwashoo dga ba bzejoꞌ ḻee libri, dga chyix̱jeꞌn c̱he diikaꞌ wna Chiozaꞌ gak, ḻaꞌ ba zoa gaoshosh gakan.
11 Beṉꞌ malaꞌ shajlenshazeꞌ dii malaꞌ choneꞌ, naꞌ beenaꞌ ndaꞌ nchen saaxyanaꞌ shajlenshazeꞌ saaxya c̱heꞌnaꞌ; naꞌ beṉꞌ wennaꞌ soatezi soeꞌ goneꞌ wen, naꞌ beenaꞌ nak lallꞌ naꞌ Chiozaꞌ soatezi soeꞌ goncheꞌ daa cheeni Chiozaꞌ.
12 ―¡Ba zoa gaoshosh yiyedꞌ! Naꞌ wiꞌa daa chidoḻꞌ to to beṉꞌ kon ka nak daa ben to toeꞌ.
13 Nadaan zaklebidꞌ letr nechaꞌ le Aa daa ba zoakzꞌ ka wxe wzil yell-lioni, naꞌ daa zoakzꞌ katꞌ te c̱heyin zaklebidꞌ letraꞌ chiyollin daa le Z,b Nadꞌkzan bx̱e bsilꞌ yogꞌḻoḻ dii de naꞌ nadꞌkzan gonꞌ ka te c̱heyin.
14 Chakomba beṉꞌkaꞌ chṉabgakileꞌ nadꞌ yix̱is yiyibꞌ yic̱hjlallꞌdoꞌekaꞌ, kwenc̱he idoḻꞌgakeꞌ gaogakeꞌ dii zix̱aꞌ llia lo yagaꞌ daa nsaꞌ yeḻꞌ mbannaꞌ, naꞌ shoꞌgakeꞌ choꞌa puert c̱he yellaꞌ.
15 San bi gak shoꞌ beṉꞌ malkaꞌ, beṉꞌkaꞌ nḻan yeḻꞌ willaꞌnaꞌ, beṉꞌkaꞌ chṉelen ljwellin, beṉꞌ wen xyakaꞌ, beṉꞌkaꞌ choeꞌlaꞌo lwaa lsakꞌ diikaꞌ non chios c̱hegakeꞌ, naꞌch yogꞌ beṉꞌkaꞌ chibayi siyeꞌ.
16 Nadꞌ, Jesús, ba bseḻaa anjl c̱haꞌnaꞌ kwenc̱he bzajniileꞌ liꞌ diiki ba bzejoꞌ naꞌ wiꞌon dillꞌ lao beṉꞌkaꞌ chdop chllag choeꞌlaꞌogakeꞌ nadꞌ. Nadꞌ nakꞌ xiiṉ dia c̱he dii Davinaꞌ, naꞌ zaklebidꞌ belj xsilaꞌ daa chṉaꞌtit.
17 Naꞌ Espíritu c̱he Chiozaꞌ, naꞌ choꞌ zaklebicho noolaꞌ wshagnaꞌleneꞌ Jesucrístonaꞌ daa nonḻilallꞌchoneꞌ, cheꞌchoneꞌ:
―¡Bida!
Naꞌ beenaꞌ yeni dillꞌki yeeneꞌ:
―¡Bida!
Nottezꞌ beṉꞌ chbiḻi, wak yideꞌ naꞌ yeejeꞌ nisaꞌ daa nsaꞌ yeḻꞌ mbannaꞌ, naꞌ aga bi sakileꞌn.
18 Nadꞌ chsiꞌnidꞌ yogꞌ beṉꞌ yeni dillꞌki llia ḻee libri c̱heyi diikaꞌ wna Chiozaꞌ gak: Shi no chix̱oatelə c̱heyin lo dillꞌki, Chiozaꞌ wdieꞌneꞌ lao yeḻꞌ zakꞌziꞌkaꞌ ba bzetjeꞌ ḻee libri.
19 Naꞌ shi no yikwas baḻ dillꞌki llia ḻee libri c̱heyi diikaꞌ wna Chiozaꞌ gak, Chiozaꞌ bi wiꞌe latj gaweꞌ dii zix̱aꞌ llia yagaꞌ daa nsaꞌ yeḻꞌ mbannaꞌ, ni bi wiꞌe latj shoꞌe yell c̱heꞌnaꞌ, diiki choeꞌ libri dillꞌ c̱heyin.
20 Jesúzaꞌ, beenaꞌ bzajnii nadꞌ diiki, neꞌ:
―Dii ḻi, ba zoa gaoshosh yiyedꞌ.
Kanꞌ nakan. ¡Bidagach, X̱anꞌ Jesús!
21 Naꞌ yeḻꞌ goklen c̱he X̱ancho Jesucrístonaꞌ soalenshgan yogꞌḻoḻtele. Kanꞌ gakan.