Salmo 122
1 Ḻe chibaidꞌ katꞌ nagakeꞌ nadꞌ:
“Shoꞌ ganaꞌ zoa lill xḻatj X̱ancho Chiozaꞌ.”
2 Yell Jerusalén,
ba yoontoꞌ ḻoo zee c̱hoꞌni,
nec̱hj liꞌ.
3 Jerusalénnaꞌ nakan to yell dii wxe wzil
kwenc̱he yidop yillagan beṉꞌ.
4 Naꞌ naꞌ chdop chllag yogꞌ kwen beṉꞌkaꞌ nak lallꞌ naꞌ X̱ancho Chiozaꞌ
kwenc̱he weꞌlaꞌogakeꞌneꞌ kon ka bllieꞌ biaꞌ gon beṉꞌ Israelkaꞌ.
5 Naꞌ naꞌ chak yeḻꞌ josc̱his c̱he beṉꞌ Israelkaꞌ,
ganaꞌ chṉabiaꞌ xiiṉ dia c̱he dii Davinaꞌ.
6 Ḻi iṉab gatꞌ yeḻꞌ mbalaz yell Jerusalénnaꞌ,
ḻi iṉa:
“Beṉꞌkaꞌ chaki liꞌ,
Jerusalén,
soashgagakeꞌ mbalaz.
7 Soashga beṉꞌkaꞌ lleꞌ ḻoo zee c̱hoꞌkaꞌ mbalaz;
naꞌ bibi dii nxoll gatꞌ ganaꞌ zoa beṉꞌ wṉabiaꞌ c̱hoꞌnaꞌ.”
8 Naꞌ ni c̱he beṉꞌ bishaakaꞌ naꞌ beṉꞌkaꞌ nllaguidꞌ
iṉiaꞌ liꞌ,
Jerusalén:
“Soashgoꞌ mbalaz.”
9 Naꞌ daa zoa lill xḻatj X̱ancho Chiozaꞌ lawoꞌnaꞌ iṉabidee gak wen c̱hoꞌ.