Chllin Jacobaꞌ Egíptonaꞌ
46
Naꞌ btop bsaꞌ Jacobaꞌ yogꞌḻoḻ dii napeꞌ naꞌ wloꞌe nez.
Ka bllineꞌ Beersébanaꞌ naꞌ beteꞌ bayix̱ꞌkaꞌ bzeyeꞌgakb kwenc̱he beꞌlawee Chiozaꞌ,
beenaꞌ beꞌlaꞌo dii x̱eꞌ Isaacaꞌ.
2 Naꞌ lo yelaꞌ Jacobaꞌ bleꞌdoꞌileꞌ Chiozaꞌ,
naꞌ chiꞌeneꞌ:
―Jacob,
Jacob.
Naꞌ ḻeꞌ chiꞌe:
―Ni ziaꞌ.
3 Naꞌ cheꞌ Chiozaꞌneꞌ:
―Nadaan Chios,
beenaꞌ beꞌlaꞌo dii x̱oꞌnaꞌ.
Bi illeboꞌ shajoꞌ Egíptonaꞌ,
ḻaꞌ naꞌ gonꞌ dia c̱hoꞌnaꞌ to yell xen inlleb.
4 Nadꞌkzə saꞌlenꞌ liꞌ Egíptonaꞌ,
naꞌ nadꞌkzan yibej dia c̱hoꞌkaꞌ naꞌ.
Naꞌ Josénaꞌkzə wwieꞌ liꞌ katꞌ guetoꞌ.
5 Naꞌ bizaꞌ Jacobaꞌ Beersébanaꞌ.
Naꞌ xiiṉeꞌkaꞌ blliagakeꞌ ḻeꞌ naꞌ xiiṉ xooleꞌkaꞌ ḻoo karretkaꞌ bseḻꞌ faraónnaꞌ kwenc̱he biaꞌgakan ḻegakeꞌ.
6 Jacobaꞌ naꞌ yogꞌḻoḻ xiiṉ c̱heꞌkaꞌ zejgakeꞌ Egíptonaꞌ.
Naꞌ bc̱heꞌgakeꞌ yogꞌḻoḻ bayix̱ꞌdoꞌ c̱heꞌkaꞌ naꞌ bsaagakeꞌ yogꞌḻoḻ daa wdapgakeꞌ Canaánnaꞌ.
7 Yogꞌḻoḻ xiiṉeꞌkaꞌ,
naꞌ xsoeꞌkaꞌ,
zejlengakeꞌ ḻeꞌ.
8 Kin wle beṉꞌkaꞌ wyaj Egíptonaꞌ,
beṉꞌkaꞌ gok xiiṉ Israelaꞌ,
beenaꞌ ḻekzkaꞌ wlieꞌ Jacob:
Rubénnaꞌ,
biꞌ nech c̱he Jacobaꞌ.
9 Naꞌ beṉꞌkaꞌ gok xiiṉ Rubénnaꞌ wlegakeꞌ Hanoc,
Falú,
Hezrón naꞌ Carmi.
10 Naꞌ beṉꞌkaꞌ gok xiiṉ Simeónnaꞌ wlegakeꞌ Jemuel,
Jamín,
Ohad,
Jaquín,
Zohar naꞌch Saúl,
beenaꞌ gok xiiṉ to noolə Canaán.
11 Naꞌ beṉꞌkaꞌ gok xiiṉ Levínaꞌ wlegakeꞌ Gersón,
Coat naꞌ Merari.
12 Naꞌ beṉꞌkaꞌ gok xiiṉ Judánaꞌ wlegakeꞌ Er,
Onán,
Sela,
Fares naꞌch Zara.
Beenaꞌ leꞌ Er naꞌ beenaꞌ leꞌ Onán witgakeꞌ Canaánnaꞌ.
Naꞌ beṉꞌkaꞌ gok xiiṉ Fárezaꞌ wlegakeꞌ Hezrón naꞌch Hamul.
13 Naꞌ beṉꞌkaꞌ gok xiiṉ Isacáraꞌ wlegakeꞌ Tola,
Fúa,
Job naꞌch Simrón.
14 Naꞌ beṉꞌkaꞌ gok xiiṉ Zabulónnaꞌ wlegakeꞌ Sered,
Elón naꞌch Jahleel.
15 Beṉꞌkanꞌ gok xiiṉ xsoa Jacobaꞌ len xooleꞌ Léanaꞌ kanaꞌ wzoagakeꞌ Padán-arámaꞌ naꞌ ḻekzkaꞌ wxaneꞌ sto noolaꞌ le Dina.
Yogꞌḻoḻgakeꞌ gokgakeꞌ shiiṉichoa.
16 Naꞌ beṉꞌkaꞌ gok xiiṉ Gadaꞌ wlegakeꞌ Zifión,
Hagui,
Ezbón,
Suni,
Eri,
Arodi naꞌch Areli.
17 Naꞌ beṉꞌkaꞌ gok xiiṉ Aseraꞌ wlegakeꞌ Imna,
Isúa,
Isúi,
Bería,
naꞌ Sera,
beenaꞌ nak beṉꞌ zangakeꞌ.
Naꞌ beṉꞌkaꞌ gok xiiṉ Beríanaꞌ wlegakeꞌ Heber naꞌ Malquiel.
18 Beṉꞌkanꞌ gok xiiṉ xsoa Jacobaꞌ len Zílpanaꞌ wen llin c̱he Léanaꞌ beenaꞌ beꞌ Labánnaꞌ.
Yogꞌḻoḻgakeꞌ gokgakeꞌ shinꞌto.
19 Naꞌ beṉꞌkaꞌ gok xiiṉ Raquelaꞌ xoolə Jacobaꞌ wlegakeꞌ José naꞌch Benjamín.
20 Naꞌ beṉꞌkaꞌ gok xiiṉ Josénaꞌ,
biꞌkaꞌ wxan xooleꞌ Asenataꞌ,
wlegakeꞌ Manasés naꞌch Efraín biꞌkaꞌ goljə Egíptonaꞌ.
Asenataꞌ gokeꞌ xiiṉ Potiféranaꞌ bx̱oz c̱he yellaꞌ le On.
21 Naꞌ beṉꞌkaꞌ gok xiiṉ Benjamínnaꞌ wlegakeꞌ Bela,
Bequer,
Asbel,
Gera,
Naamán,
Ehi,
Ros,
Mupim,
Hupim naꞌ Ard.
22 Beṉꞌkanꞌ xiiṉ xsoa Jacobaꞌ len xooleꞌ Raquelaꞌ.
Yogꞌḻoḻgakeꞌ gokgakeꞌ lldaꞌ.
23 Naꞌ xiiṉ Dannaꞌ wlieꞌ Husim.
24 Naꞌ beṉꞌkaꞌ gok xiiṉ Neftalínaꞌ wlegakeꞌ Jahzeel,
Guni,
Jezer naꞌ Silem.
25 Beṉꞌkanꞌ gok xiiṉ xsoa Jacobaꞌ len Bílhanaꞌ,
wen llin c̱he Raquelaꞌ beenaꞌ beꞌ Labánnaꞌ.
Yogꞌḻoḻgakeꞌ gokgakeꞌ gall.
26 Yogꞌḻoḻ beṉꞌkin wyajlen Jacobaꞌ Egíptonaꞌ nakgakeꞌ xiiṉ xsoeꞌ gokgakeꞌ guiyon x̱op naꞌ bi blabeꞌ beṉꞌkaꞌ gok xooleꞌ naꞌ no xoolilleꞌ.
27 Naꞌ zi c̱hop xiiṉ Josénaꞌ,
beṉꞌkaꞌ goljə Egíptonaꞌ,
naꞌ Josénaꞌ len Jacobaꞌ,
yogꞌḻoḻtieꞌ gokgakeꞌ guiyon shi.
28 Naꞌ bseḻꞌ Jacobaꞌ Judánaꞌ kwenc̱he jelleꞌ Josénaꞌ lljḻezeꞌ x̱eꞌnaꞌ Gosénnaꞌ.
Naꞌ bllingakeꞌ lo yell-lio daan mbani Gosénnaꞌ.
29 Naꞌ goll Josénaꞌ beṉꞌkaꞌ chon llin c̱heꞌnaꞌ lljx̱iꞌgakeꞌ karret c̱heꞌnaꞌ,
kwenc̱he lljatiḻeꞌ x̱eꞌnaꞌ Gosénnaꞌ.
Naꞌ ka bllineꞌ laweꞌnaꞌ wdeḻeꞌneꞌ naꞌ de nyeḻꞌzileꞌneꞌ wchelleꞌ ssha nlleb.
30 Naꞌch Israelaꞌ golleꞌ Josénaꞌ:
―Ḻaa ṉaa guetꞌ nadꞌ,
kon ba bleꞌidꞌ ni mbanoꞌ.
31 Naꞌ Josénaꞌ golleꞌ beṉꞌ bisheekaꞌ naꞌ yogꞌḻoḻ beṉꞌkaꞌ ntop nshag x̱eꞌnaꞌ:
―Lljawiachꞌ faraónnaꞌ naꞌ yepee:
“Beṉꞌ bishaakaꞌ naꞌ yogꞌḻoḻ beṉꞌkaꞌ ntop nshag x̱aꞌnaꞌ,
beṉꞌkaꞌ zoa Canaánnaꞌ,
ba bidgakeꞌ ni,
zidsoalengakeꞌ nadꞌ.
32 Naꞌ nakgakeꞌ beṉꞌ chisgol bayix̱ꞌ;
naꞌ nc̱heꞌgakeꞌ no xilꞌ,
no gooṉ naꞌ yogꞌḻoḻ dii napgakeꞌ.”
33 Naꞌ katꞌ gax faraónnaꞌ leꞌ,
naꞌ iṉeꞌ:
“¿Bi noni xshinle?,”
34 naꞌ yeꞌleneꞌ:
“Beṉꞌ chisgol bayix̱ꞌdoꞌ nakntoꞌ,
naꞌ zoantoꞌ xḻatjin gonntoꞌ kon bi iṉoꞌ netoꞌ.
Dii beṉꞌ gol c̱hentoꞌkaꞌte chisgolgakeꞌ bayix̱ꞌdoꞌki,
naꞌ dezd naktentoꞌ biꞌdoꞌ ax̱t ṉaa yoolontoꞌ chisgolntoꞌgakb.”
Kaꞌ yeꞌleneꞌ kwenc̱he wiꞌe latj soale Gosénni.
Ḻaꞌ beṉꞌ Egíptoki ḻe chakzbangakileꞌ beṉꞌ chap xilꞌ.