Kop c̱he Josénaꞌ
44
Ka biyoll bidaogakeꞌ,
naꞌch cheꞌ Josénaꞌ beenaꞌ chṉabiaꞌ ḻoo yoo lilleꞌnaꞌ:
―Bisshaꞌ gush c̱he beṉꞌki trígonaꞌ kon kaꞌkꞌtezan yizogakileꞌ yiyoaꞌgakeꞌ.
Naꞌ bigoo xmecheꞌkaꞌ ḻoo gush c̱heꞌkaꞌ.
2 Naꞌ wloo kop c̱haꞌ de plataꞌ ḻoo gush c̱he beṉꞌ neshaa biyoṉtezan toz len xmecheꞌnaꞌ daa wdixjileꞌ trígonaꞌ.
Naꞌ beenaꞌ chṉabiaꞌ ḻoo yoo lilleꞌnaꞌ jeneꞌ daa golleꞌneꞌ.
3 Ka wyeeniꞌḻes,
naꞌch bisee ḻegakeꞌ kwenc̱he yiyajlen burr c̱heꞌkaꞌ.
4 Latꞌchga ba bichejgakeꞌ yellaꞌ katꞌ cheꞌ Josénaꞌ beenaꞌ chṉabiaꞌ ḻoo yoo lilleꞌnaꞌ:
―Wyaj,
jaxen beṉꞌkaꞌ.
Naꞌ katꞌ idoḻiloꞌgakeꞌ,
naꞌ gollgakeꞌ:
“¿Bic̱he wlanzle kop de plat c̱he x̱anꞌnaꞌ
5 daa chc̱hineꞌ cheejileꞌ naꞌ chc̱hintieꞌn katꞌ chṉeyee?
Ḻe mal-likazə ba benle c̱he beenaꞌ ba bweej bwaweꞌ leꞌ” ―yeꞌgakoꞌneꞌ.
6 Ka bidoḻi beenaꞌ chṉabiaꞌ ḻoo yoo lill Josénaꞌ ḻegakeꞌ,
naꞌch golleꞌ ḻegakeꞌ kon ka goll Josénaꞌ.
7 Naꞌch cheꞌgakeꞌneꞌ:
―¿Bic̱he nazoꞌ netoꞌ kaꞌ?
Nezganzə gonntoꞌ ka dga noꞌ.
8 Len shi ax̱t Canaánnaꞌ wzaꞌntoꞌ sto shii zidsanntoꞌ mechaꞌ daa billelintoꞌ ḻoo gush c̱hentoꞌkaꞌ ¿berac̱he kwanzntoꞌ or plat daa de ḻoo yoo lill x̱anoꞌnaꞌ?
9 ¡Guetshazə nottezntoꞌ yillel kopaꞌ ḻoo gush c̱heyinnaꞌ!
Naꞌ kaꞌkz netoꞌ gakshazntoꞌ wen llin c̱hoꞌ,
shi ṉaa.
10 Naꞌch beenaꞌ chṉabiaꞌ ḻoo yoo lill Josénaꞌ chiꞌe:
―Gakshazə kon ka ba wnale.
Naꞌ beenaꞌ yillel kopaꞌ ḻoo gush c̱heꞌnaꞌ,
toz ḻenꞌ gakeꞌ wen llin c̱haꞌ.
Naꞌ leꞌ bibi benle,
bibi idobile.
11 To togakeꞌ lii bḻetjte gush c̱heꞌkaꞌ naꞌ bsaljgakeꞌn.
12 Naꞌ beenaꞌ chṉabiaꞌ ḻoo yoo lill Josénaꞌ biyiljeꞌn to to ḻoo gush c̱heꞌkaꞌ wzolozeꞌ c̱he beṉꞌ nechaꞌ ax̱t biyollteyin beṉꞌ neshaa,
beenaꞌ le Benjamín.
Naꞌ billel kopaꞌ ḻoo gush c̱heꞌnaꞌ.
13 Naꞌ bshoꞌ bc̱hezꞌ xeꞌkaꞌ daa ḻe jeḻgakileꞌ.
Naꞌch biwaꞌgakeꞌ burr c̱heꞌkaꞌ yoaꞌnaꞌ sto shii naꞌ bibiigakeꞌ.
14 Ni zoate Josénaꞌ lilleꞌnaꞌ ka billin Judánaꞌ len beṉꞌ bisheekaꞌ sto shii.
Naꞌ bc̱hekꞌ xibeꞌkaꞌ laweꞌnaꞌ ax̱t lo yonaꞌ bllin loxgueꞌkaꞌ.
15 Naꞌch cheꞌ Josénaꞌ ḻegakeꞌ:
―¿Beran benle?
¿Abi ṉezile to beṉꞌ sinꞌ ka nadꞌ chak iṉeyee?
16 Naꞌch cheꞌ Judánaꞌ:
―¿Bera ka iṉantoꞌ liꞌ,
beṉꞌdoꞌ?
¿Nak gonntoꞌ wliintoꞌ liꞌ nan bibi benntoꞌ?
Chiozaꞌ ba biliꞌe laontoꞌ nan nakntoꞌ beṉꞌ mal.
Ni zoantoꞌ ṉaa gakntoꞌ wen llin c̱hoꞌ len beeni billel kopaꞌ ḻoo gush c̱heꞌnaꞌ.
17 Naꞌch goll Josénaꞌ:
―Aga waklatꞌ daa ka(*?)
nale.
San toz beeni billel kopaꞌ ḻoo gush c̱heꞌnanꞌ gakeꞌ wen llin c̱haꞌ.
Leꞌ bibi benle.
Wak yiyajle mbalaz lill x̱alenaꞌ.
Judánaꞌ chṉabileꞌ Josénaꞌ yisaneꞌ Benjamínnaꞌ
18 Naꞌch wbigꞌ Judánaꞌ kwit Josénaꞌ chiꞌe:
―Beṉꞌdoꞌ,
chatꞌyoidꞌ liꞌ,
beꞌgach latj weꞌlenꞌ liꞌ to c̱hop choꞌa dillꞌ.
Ben goklen bi illoo nadꞌ.
Ṉezidꞌ linꞌ zoꞌ lwaa faraónnaꞌ.
19 Liꞌ wṉabiloꞌ netoꞌ shi ni mban x̱antoꞌnaꞌ wa shi zoa sto beṉꞌ bishꞌntoꞌ.
20 Naꞌ netoꞌ wnantoꞌ liꞌ zoa to x̱antoꞌ naꞌ ba nakeꞌ beṉꞌ goldoꞌ naꞌ sto beṉꞌ bishꞌntoꞌ beṉꞌ xkwidꞌch ka netoꞌ,
naꞌ goljeꞌ kanaꞌ ba nak x̱antoꞌnaꞌ beṉꞌ golə.
Naꞌ beṉꞌ bishꞌntoꞌnaꞌ sto beenaꞌ nakyeṉꞌ toz xṉaꞌgakeꞌ witeꞌ,
naꞌ stochga ḻenꞌ bgaaṉeꞌ,
naꞌ x̱anntoꞌnaꞌ ḻe chakileꞌneꞌ.
21 Naꞌ liꞌ wnoꞌ netoꞌ lljaxiꞌntoꞌbꞌ daa cheeniloꞌ gombiꞌobꞌ.
22 Naꞌ netoꞌ wnantoꞌ liꞌ aga wak wkwaaṉbꞌ toz x̱antoꞌnaꞌ.
Ḻaꞌ shi ba bkwaaṉbꞌ tozeꞌ naꞌ gueteꞌ.
23 Naꞌ liꞌ wnoꞌ netoꞌ shi bi yidlenntoꞌbꞌ,
aga wlebchoꞌ netoꞌ,
shi ṉaa.
24 ’Naꞌ ka billinntoꞌ kwit x̱antoꞌnaꞌ,
naꞌ gollntoꞌneꞌ yogꞌḻoḻ daa wnoꞌ netoꞌ.
25 Naꞌch x̱antoꞌnaꞌ wneꞌ:
“Ḻi shaj ḻi lljx̱iꞌ zi latꞌ daa gaocho.”
26 Naꞌ netoꞌ cheꞌntoꞌneꞌ:
“Bi shajntoꞌ shi bi saꞌlen biꞌ bishꞌntoꞌ biꞌ neshii netoꞌ.
Ḻaꞌ shi ḻebꞌ bi saꞌlemꞌ netoꞌ aga wak lljawiantoꞌ beenaꞌ sto shii.”
27 Naꞌ x̱aꞌnaꞌ,
wneꞌ netoꞌ:
“Leꞌ ṉezikzileꞌ nool c̱haꞌnaꞌ wxaneꞌ c̱hoptki biꞌ c̱haꞌkaꞌ.
28 Tobꞌ bich zoalemꞌ nadꞌ naꞌ ax̱t ṉaa bichgaṉꞌ ileꞌidꞌbꞌ.
Naꞌ chakidꞌ to bayix̱ꞌ ba zṉia bxoxj btim ḻebꞌ.
29 Naꞌ shi ṉaa wc̱heꞌle biꞌ c̱haꞌni sto,
naꞌ gak bi gak c̱hebꞌ,
leꞌ gaple doḻꞌ daa guetidꞌ yeḻꞌ chakyeshiinaꞌ.”
30 ’Naꞌ ḻe nllagchgayi x̱aꞌnaꞌ biꞌni.
Shi ṉaa bi yillinlenntoꞌbꞌ,
31 wet x̱antoꞌnaꞌ shi bi ileꞌileꞌbꞌ.
Naꞌ gak xbagꞌntoꞌ x̱antoꞌnaꞌ shi ba witeꞌ daa ḻe gakyeshiileꞌ.
32 Nadꞌ goshꞌ x̱aꞌnaꞌ:
“Gak lallꞌ naa biꞌni,
naꞌ shi bi yizoaꞌbꞌ lawoꞌnaꞌ naꞌ gak xbagaabꞌ shnon mbanꞌ.”
33 Naꞌ daan niaꞌ liꞌ,
beꞌgach latj yigaaṉaꞌ gakꞌ wen llin c̱hoꞌ lwaa biꞌni.
Bisangachbꞌ yiyajlemꞌ beṉꞌ bishaaki.
34 ¿Nakra gonꞌ yiyaa kwit x̱aꞌnaꞌ shi bi zinc̱hiꞌabꞌ yillinꞌ?
Bi cheenidꞌ ileꞌidꞌ yeḻꞌ ziꞌnaꞌ gak c̱he x̱aꞌnaꞌ.