―Ḻi shaj sto shii,

ḻi lljx̱iꞌ zi latꞌ daa gaocho.

3 Naꞌ wne Judánaꞌ,

chiꞌe:

―Beenaꞌ chṉabiaꞌ Egíptonaꞌ wneꞌ netoꞌ:

“Shi bi nc̱heꞌle beṉꞌ bishꞌle beṉꞌ neshaa ka yidle ni,

naꞌ bichoklə yidwiale nadꞌ,

shi ṉaa.”

4 Naꞌ shi wiꞌo latj saꞌlemꞌ netoꞌ naꞌ shajntoꞌ lljx̱iꞌntoꞌ daa gaocho.

5 Naꞌ shi bi wiꞌo latj saꞌlemꞌ netoꞌ,

bi shajntoꞌ.

Ḻaꞌ beenaꞌ zoa Egíptonaꞌ wneꞌ netoꞌ:

“Shi bi wc̱heꞌle beṉꞌ bishꞌle beṉꞌ neshaa,

bichchoklə yidwiale nadꞌ,

shi ṉaa.”

6 Naꞌch cheꞌ Israelaꞌ:

―¿Bic̱he chonlikzile nadꞌ kaꞌ?

¿Bic̱he gollzle beenaꞌ nan zoa sto biꞌ bishꞌle?

7 Naꞌch cheꞌgakeꞌ:

―Ḻenꞌ biya dii wṉabileꞌ netoꞌ shi no beṉꞌ netoꞌ,

bin zjentoꞌ,

naꞌ nak chak c̱he bishꞌ ljwellntoꞌ.

Naꞌ wneꞌ netoꞌ:

“¿Ani zoa x̱ale?

¿Azoach beṉꞌ bishꞌle?”

Naꞌ netoꞌ billinntoꞌ daa chṉabileꞌ netoꞌ.

Naꞌ aga chakintoꞌ shi iṉalzə beenaꞌ:

“Ḻi zjaxiꞌ beṉꞌ bishꞌlenaꞌ ni.”

8 Naꞌch cheꞌ Judánaꞌ x̱eꞌ Israelaꞌ:

―Shi cheenicho ibanchcho,

beꞌ latj gak biꞌ c̱hoꞌni lallꞌ naꞌ,

naꞌ lii shajtentoꞌ,

naꞌ bi gueticho wbinnaꞌ,

ni liꞌ ni netoꞌ,

ni xiiṉntoꞌki.

9 Naꞌ gakbꞌ lallꞌ naꞌ,

naꞌ nadꞌ kwia yic̱hjꞌ shi bi gak c̱hebꞌ.

Shi ṉaa bi yizoaꞌbꞌ lawoꞌni naꞌ gakꞌ xbagaabꞌ lawoꞌni shnon mbanꞌ.

10 Sheḻꞌkaꞌ ki ba wllazintoꞌ ni,

ax̱t c̱hop ṉiꞌalə ba benntoꞌ sheḻꞌkaꞌ.

11 Naꞌch cheꞌ Israelaꞌ,

beenaꞌ nak x̱agakeꞌ:

―Bich de naklə ka goncho.

Ki ḻi gon:

Ḻi wllaꞌ ḻoo gush c̱helekaꞌ daa chzanileꞌ weꞌle beenaꞌ.

Ḻi wsaꞌ daa zeelo nakch wen daa de lallchoni.

Ḻi wsaꞌ latꞌ nillꞌ daa chḻaꞌ zix̱ c̱he yagdoꞌkaꞌ,

naꞌ shinꞌ baser,

naꞌ set daa chḻaꞌ zix̱,

naꞌ nillaa daa le mirra,

naꞌ nuezaꞌ,

naꞌch alméndranaꞌ.

12 Naꞌ ḻi wsaꞌ c̱hoplə ka to mechaꞌ daa bex̱ꞌle dii nech.

Naꞌ ḻi yiyoꞌen.

Shera shi gokllejzigakeꞌn.

13 Ḻi shaj ḻi wc̱heꞌ biꞌ bishꞌleni naꞌ ḻi lljawiashazə beenaꞌ sto shii.

14 Chios,

beṉꞌ yeḻꞌ wak choo yeḻꞌ wak xennaꞌ,

gox̱ee yic̱hjlallꞌdoꞌ beenaꞌ,

naꞌ gapeꞌ yeḻꞌ chiyeshꞌlallꞌ c̱hele kwenc̱he yisaneꞌ beṉꞌ bishꞌlenaꞌ sto,

naꞌch Benjamínni.

Ka nakꞌ nadꞌ,

shi daꞌidꞌ kochno biꞌ c̱haꞌ yigaaṉ naꞌ wakshazə yigaaṉaꞌ tozꞌ.

15 Naꞌ beṉꞌkaꞌ nak xiiṉ Jacobaꞌ bsaꞌgakeꞌ daa chzangakileꞌ,

naꞌ c̱hoplə mech ka to daa bex̱ꞌgakeꞌ dii nechaꞌ naꞌ bc̱heꞌtegakeꞌ Benjamínnaꞌ.

Naꞌ zjaakeꞌ Egíptonaꞌ sto shii.

Naꞌ bllingakeꞌ lao Josénaꞌ,

16 naꞌ ka bleꞌi Josénaꞌ len Benjamínnaꞌ ḻegakeꞌ,

naꞌ golleꞌ wen llin c̱heꞌnaꞌ chṉabiꞌa ḻoo yoo lilleꞌnaꞌ:

―Jwaꞌsha beṉꞌki lillaꞌnaꞌ.

Naꞌ bet tlishꞌ bak,

naꞌ bsiniꞌateb kwenc̱he gaolengakee xwenaꞌ.

17 Naꞌ beṉꞌ wen llinnaꞌ beneꞌ ka golleꞌ ḻeꞌ,

naꞌ bic̱hiꞌe ḻegakeꞌ lill Josénaꞌ.

18 Naꞌ ḻe bllebgakeꞌ daa zejgakeꞌ lill Josénaꞌ.

Naꞌ cheꞌ ljwellgakeꞌ:

―Ni c̱he mechaꞌ daa ziyoo ḻoo gush c̱hechokaꞌ dii nechaꞌ kanaꞌ bidcho,

daan zizaꞌcho lilleꞌni.

Kaꞌzan goneꞌ,

siꞌ seneꞌ gox̱ee choꞌ kwenc̱he wgoneꞌ choꞌ xshineꞌnaꞌ len burr c̱hechoki.

19 Naꞌ daan ka bllingakeꞌ choꞌa lill Josénaꞌ naꞌ wbigꞌgakeꞌ kwit beenaꞌ chṉabiaꞌ ḻoo yoo lilleꞌnaꞌ kwenc̱he wshaljlengakeꞌneꞌ.

20 Naꞌ cheꞌgakeꞌneꞌ:

―Beṉꞌdoꞌ,

ka bidntoꞌ dii nechaꞌ bidx̱iꞌntoꞌ trígonaꞌ

21 naꞌ ka billinntoꞌ ganaꞌ bigaaṉntoꞌ wdeyintoꞌ yel,

naꞌ bsaljntoꞌ choꞌa gush c̱hentoꞌkaꞌ naꞌ to to choꞌa gush c̱hentoꞌkaꞌ zixoa mechaꞌ nzaꞌ mbaban.

Naꞌ ṉaa zaꞌntoꞌ zidsanntoꞌn.

22 Naꞌ ḻekzkaꞌ nox̱ꞌchntoꞌ mechi kwenc̱he siꞌchntoꞌ trígonaꞌ.

Naꞌ bi ṉezintoꞌ no bigoo mechkaꞌ daa beṉntoꞌ dii nechaꞌ ḻoo gush c̱hentoꞌkaꞌ.

23 Naꞌch cheꞌ beṉꞌ wen llinnaꞌ ḻegakeꞌ:

―Bi illeble.

Chios c̱helenaꞌ,

naꞌ Chios c̱he x̱alenaꞌ,

ḻeꞌ bigwee daa ḻoo gush c̱helekaꞌ.

Nadꞌ bex̱aa mechaꞌ daa wdixjle.

Naꞌch beṉꞌ wen llinnaꞌ jasaljeꞌ Simeónnaꞌ naꞌ bic̱hiꞌeneꞌ ganaꞌ lleꞌ beṉꞌ bisheekaꞌ.

24 Naꞌ wloꞌe ḻegakeꞌ ḻoo lill Josénaꞌ,

naꞌ biꞌe ḻegakeꞌ nisaꞌ kwenc̱he wdib ṉiꞌekaꞌ,

naꞌ ḻekzkaꞌ biꞌe dii gao burrkaꞌ.

25 Naꞌ ḻegakeꞌ wlejgakeꞌ diikaꞌ nsaꞌgakeꞌ kwenc̱he weꞌgakeꞌn Josénaꞌ.

Naꞌ wlezgakeꞌ billineꞌ gobillaꞌ daa ba ṉezgakileꞌ nan lilleꞌnaꞌ gaogakeꞌ xwenaꞌ.

26 Ka billin Josénaꞌ lilleꞌnaꞌ naꞌ beꞌgakeꞌneꞌ diikaꞌ nsaꞌgakeꞌ,

naꞌ bc̱hekꞌ xibeꞌkaꞌ laweꞌnaꞌ ax̱t lo yonaꞌ bllin loxgueꞌkaꞌ.

27 Naꞌ wṉabi Josénaꞌ ḻegakeꞌ nak chak c̱hegakeꞌ.

Naꞌ ḻekzkaꞌ wṉabeꞌ,

chiꞌe:

―¿Nak chak c̱he x̱alenaꞌ,

beenaꞌ nale zoa?

¿Ani mbaneꞌ?

28 Naꞌch ḻegakeꞌ bc̱hekꞌ yic̱hjeꞌkaꞌ,

cheꞌgakeꞌ:

―X̱antoꞌnaꞌ,

beenaꞌ nak xmosoꞌ,

ni mbanchgueꞌ naꞌ zoeꞌ wen.

29 Ka bleꞌi Josénaꞌ Benjamínnaꞌ,

beṉꞌ bishꞌ goljeꞌnaꞌ,

naꞌch chiꞌe:

―¿Abiꞌnin biꞌ bishꞌlenaꞌ,

biꞌ neshaa wnale kaꞌ?

Naꞌ chiꞌebꞌ:

―Chiozaꞌ goneꞌ ka gak wen c̱hoꞌ,

xiiṉdawaa.

30 Naꞌ gokyeshii Josénaꞌ daa bleꞌileꞌ beṉꞌ bisheenaꞌ.

Naꞌch biyoꞌe ḻoo yoonaꞌ sto ganaꞌ jc̱helleꞌ.

31 Naꞌ beneꞌ dii byen bich wchelleꞌ,

naꞌ wdib choꞌalaweꞌnaꞌ,

naꞌ bchejeꞌ chiꞌe:

“Ḻi wlliashki yeḻꞌ wawaꞌ gaontoꞌ.”

32 Naꞌ blliagakeꞌ c̱helə yeḻꞌ wao c̱he Josénaꞌ,

naꞌ c̱helə beṉꞌ bisheekaꞌ,

naꞌ ḻekzkaꞌ c̱helə beṉꞌ Egíptokaꞌ,

beṉꞌkaꞌ nak Josénaꞌ txen.

Ḻaꞌ beṉꞌ Egíptokaꞌ bi de lsens yeej gaolengakeꞌ toz hebreokaꞌ,

ḻaꞌ chakgakileꞌ nakan zban gaolengakeꞌ ḻegakeꞌ toz.

33 Naꞌ wlekeꞌ ḻegakeꞌ kon ka goljgakeꞌ de beṉꞌ nechaꞌ ax̱t beenaꞌ zeelo beṉꞌ neshaa.

Naꞌch bibangakileꞌ chwia lao ljwellgakeꞌ.

34 Naꞌ beꞌ Josénaꞌ daa llia lo mes c̱heꞌnaꞌ kwenc̱he gao beṉꞌ bisheekanꞌ.

Naꞌ biꞌe Benjamínnaꞌ dii xench aga ka beṉꞌkaꞌ sto.

Josénaꞌ naꞌch beṉꞌ bisheekaꞌ weej wdaogakeꞌ txen naꞌ wzoagakeꞌ mbalaz.