Naꞌ biban faraónnaꞌ.

5 Naꞌtech biyeseꞌ sto naꞌ wṉeyileꞌ yel yoblə.

Naꞌ bleꞌileꞌ txanzə trígonaꞌ llia gall do c̱heyin naꞌ gap inlleb llian naꞌ mbalazi nlleb chgolan.

6 Naꞌtech bleꞌileꞌ zi txan trígonaꞌ dii llia gall do bill dii bi nak wen daa zechga beꞌ ḻanaꞌ.

7 Naꞌ do billkaꞌ,

wdaogakan yogꞌte donaꞌ daa nak mbalaz inlleb(*).

Naꞌ ka biban faraónnaꞌ naꞌ gokbeꞌileꞌ yelzan wṉeyileꞌ.

8 Ka wyeeniꞌ shzilaꞌ,

chakshejlallꞌchgueꞌ naꞌ goxeꞌ yogꞌ beṉꞌ wiṉeyaakaꞌ naꞌ beṉꞌ sinꞌkaꞌ lleꞌ Egíptonaꞌ.

Naꞌ bseesileꞌ ḻegakeꞌ yelaꞌ daa wṉeyileꞌ,

naꞌ ni togazgakeꞌ bi gok yizajniꞌgakileꞌneꞌ bi zejin yelaꞌ wṉeyileꞌ.

9 Naꞌch beenaꞌ ngoo lallꞌ nee beṉꞌkaꞌ chde daa cheej faraónnaꞌ chiꞌeneꞌ:

―Ḻe mal ba benꞌ.

Ṉaach chjadinidꞌ to dii biṉꞌ gonꞌ.

10 X̱anꞌ faraón,

kanaꞌ bshaantoꞌ liꞌ,

len beenaꞌ wloo lallꞌ nee wen yetxtilkaꞌ,

naꞌ bseḻoo netoꞌ jetꞌntoꞌ lillyanaꞌ ganaꞌ zoa beenaꞌ ngoo lo nee beṉꞌkaꞌ chap lillyanaꞌ.

11 To lleꞌ,

ḻeꞌ naꞌ nadꞌ wṉeyintoꞌ yel.

Naꞌ to to yelkaꞌ zejin dii zejin.

12 Naꞌ ganaꞌ wyoontoꞌ naꞌ yoo to biꞌ wewꞌ,

biꞌ hebreo,

chaklemꞌ beenaꞌ ngoo lallꞌ nee beṉꞌkaꞌ chap lillyanaꞌ.

Naꞌ bseesintoꞌbꞌ yelkaꞌ wṉeyintoꞌ naꞌ bizajniibꞌ netoꞌ bin zejin.

13 Naꞌ gok kon ka wnabꞌ netoꞌ.

Nadꞌ biyoꞌa llin c̱haꞌni naꞌ beenaꞌ sto bwaḻꞌgakeꞌneꞌ to lo yag.

14 Naꞌ biyoll goll beenaꞌ kaꞌ,

faraónnaꞌ lii bseḻꞌdotieꞌ beṉꞌkaꞌ jalejgakeꞌ Josénaꞌ lillyanaꞌ.

Naꞌ Josénaꞌ ṉaa lii bshibte yishꞌ yic̱hjbaa,

naꞌ bishaꞌtebꞌ xaḻaamaa naꞌ wyajbꞌ lao faraónnaꞌ.

15 Naꞌ cheꞌ faraónnaꞌ ḻebꞌ:

―Wṉeidꞌ to yel,

naꞌ kono zoa yizajnii nadꞌ bin zejin.

Naꞌ ba wṉezidꞌ liꞌ chak yizajniiloꞌ bi zejin yelkaꞌ chṉeyi beṉꞌ.

16 Naꞌ Josénaꞌ cheꞌbꞌ:

―Aga nadaan chonꞌ daa.

Chiozaꞌ yizajniileꞌ liꞌ bi zejin diikaꞌ,

x̱anꞌ faraón.

17 Naꞌ faraónnaꞌ chiꞌe Josénaꞌ:

―Yelaꞌ daa wṉeidꞌ nan ziaꞌ choꞌa yao Nilonaꞌ.

18 Naꞌ ḻoo nisaꞌ bllesh gall bak,

ba ḻe chakshaoꞌlallii,

chaogakb yix̱ꞌkaꞌ ze choꞌa yawaꞌ.

19 Naꞌtech bllesh zi gall bak ba nllitchga,

ba bikzə nak wen.

Bigaṉꞌ ilekzidꞌ ba nak kaꞌ doxen Egíptoni.

20 Naꞌ bakkaꞌ bi nak wen,

wdaogakb gallte bakkaꞌ ḻe chakshaoꞌlallii,

bakaꞌ bleꞌidꞌ nech.

21 Naꞌ ḻaꞌkzi wdaogakb bakaꞌ ḻe nakchga,

niki nakbiaꞌzgakb*;

toz ka nllitgakb.

Naꞌ bibanꞌ.

22 Naꞌtech biyesꞌ sto naꞌ ḻetez kaꞌ wṉeidꞌ sto yel.

Naꞌ bleꞌidꞌ txanzə trígonaꞌ llia gall do c̱heyin naꞌ gap inlleb llian naꞌ mbalaz inlleb chgolan.

23 Naꞌtech bizleꞌidꞌ zi txanz trígonaꞌ dii llia gall do les billdoꞌ,

bikzə nakan wen daa zechga beꞌ ḻanaꞌ.

24 Naꞌ do billkaꞌ wdaogakan dokaꞌ daa nak mbalaz inlleb.

Naꞌ nadꞌ ba bseesaa diiki lao beṉꞌ wiṉeyaakaꞌ,

naꞌ ni togakeꞌ bi gok iṉagakeꞌ nadꞌ bin zejin.

25 Naꞌ Josénaꞌ billiibꞌ xtillꞌ faraónnaꞌ,

cheꞌbꞌ:

―X̱anꞌ faraón,

c̱hopte yelkaꞌ daa wṉeiloꞌ toz ka zejin.

Chiozaꞌ ba bliileꞌ liꞌ daa ziꞌ goneꞌ.

26 Bakkaꞌ bleꞌiloꞌ gall,

bakaꞌ ḻe chakshaoꞌlallii,

zejin gall yiz.

Naꞌ gall do c̱he trígonaꞌ daa ḻe mbalaz nak,

ḻekzkaꞌ zejin gall yiz.

Toz ka zeji diiki.

27 Naꞌ ḻekzkaꞌ gall bak xallitkaꞌ,

bakaꞌ bikzə nak wen bllesh ka biyoll bllesh bakaꞌ ḻe chakshaoꞌlallii,

zejin gall yiz.

Naꞌ ḻekzkaꞌ zeji c̱he gall do bill c̱he trígonaꞌ,

dokaꞌ ba chde c̱heyin daa zechga beꞌ ḻanaꞌ.

Naꞌ zejin gall yiz gatꞌ wbinnaꞌ.

28 X̱anꞌ faraón,

kon ka ba wṉiaꞌyeṉaa linꞌ gak.

Chiozaꞌ ba bliileꞌ liꞌ bin goneꞌ.

29 Zaꞌ gall yiz gatꞌchga dii yeej gao beṉꞌ doxen Egíptoni.

30 Naꞌtech gatꞌ wbinnaꞌ zi gall yiz naꞌ ni kochno lljadini c̱heyi dii wen dii shawaa gotꞌ Egíptoni,

ḻaꞌ wbinnaꞌ zaꞌ wdezinꞌ beṉꞌ Egíptoki.

31 Ḻaꞌ ziꞌtegalan gatꞌ wbinnaꞌ ax̱t bich bi biaꞌ bṉebə gatꞌ c̱heyi dii wen dii shawaa gotꞌ dii nech.

32 X̱anꞌ faraón,

yelki wṉeiloꞌ c̱hop shii toz ka nakan,

ḻaꞌ Chiozaꞌ ba bc̱hoglallee goneꞌ diiki,

naꞌ aga wllachileꞌ,

goneꞌn.

33 ’Naꞌ ṉaa,

x̱anꞌ faraón,

chiyaḻꞌ c̱hiljoꞌ to beṉꞌ sinꞌ beṉꞌ nteyi kwenc̱he gak lallꞌ nee doxen yell-lio Egíptoni.

34 Naꞌ ṉaa,

x̱anꞌ faraón,

dga chiyaḻꞌ gonoꞌ:

chiyaḻꞌ c̱hiljoꞌ beṉꞌ koo lo naꞌgakeꞌ dga,

naꞌ shajgakeꞌ doxen Egíptoni naꞌ itopgakeꞌ daa tkwen lao gayꞌ kwen daa yiziꞌ yilap beṉꞌ shlak gatꞌ dii wen dii shawaa gall yiz.

35 Naꞌ diikaꞌ wtopgakeꞌ latꞌ wejə lo yiz shaoꞌkaꞌ zaꞌ,

kooshaoꞌgakeꞌn yell xenkaꞌ naꞌ gakan lallꞌ noo,

x̱anꞌ faraón.

36 Naꞌ kaꞌ gak shoꞌshaoꞌ trígonaꞌ kwenc̱he gatꞌ dii yeej gao yogꞌ beṉꞌ lleꞌ yell Egíptoni naꞌ bi guetgakileꞌ yelꞌ chdonnaꞌ shlak gatꞌ wbinnaꞌ gall yiz.

37 Naꞌ dga goll Josénaꞌ wyoolallꞌ faraónnanꞌ len beṉꞌkaꞌ zakii nzoeꞌ chgoogakeꞌ xṉezin daa nllieꞌ biaꞌ gak.

38 Naꞌ faraónnaꞌ chiꞌe ḻegakeꞌ:

―¿Awlleltkicho sto beṉꞌ ka biꞌni zoalen Espíritu c̱he Chiozaꞌ,

lla?

39 Naꞌ chiꞌe Josénaꞌ:

―Kochno beṉꞌ yoblə zoa napeꞌ yeḻꞌ sinꞌnaꞌ naꞌ nteyileꞌ ka liꞌ.

Ḻaꞌ Chiozanꞌ ba bzajniileꞌ liꞌ yogꞌte dga.

40 Naꞌ liꞌ gak lallꞌ noꞌ gani chiꞌa chṉabiꞌa,

naꞌ yogꞌḻoḻ beṉꞌ lleꞌ yell Egíptoni wzenagueꞌ c̱hoꞌ bi dillaan wiꞌo.

Naꞌ tochokzə nadꞌ zakꞌchꞌ ka liꞌ daa nakꞌ rey.

41 Naꞌ nadꞌ wzoaꞌ liꞌ koo lallꞌ noꞌ doxente yell-lio Egíptoni.

42 Naꞌch lii bitoljtieꞌ niyaꞌ daa nllin xbeneꞌnaꞌ,

daa daꞌ sey c̱heꞌnaꞌ,

naꞌ billineꞌn xben Josénaꞌ.

Naꞌch golleꞌ beṉꞌkaꞌ wwakwgakeꞌneꞌ xalaaneꞌ(*ee) dii zakii naꞌ wwaḻꞌgakeꞌ yeneꞌnaꞌ to bga de or.

43 Naꞌch wloogakeꞌneꞌ ḻoo karretaꞌ daa lii chjanote karret c̱he faraónnaꞌ.

Naꞌ wllialo to beṉꞌ lao karretaꞌ chosyee,

chiꞌe:

“Ḻi weꞌ latj te beeni.”

Kaꞌ gok wloo lallꞌ naꞌ Josénaꞌ yogꞌḻoḻ beṉꞌ lleꞌ yell-lio Egíptonaꞌ.

44 Naꞌ faraónnaꞌ chiꞌeneꞌ:

―Ḻaꞌkzi nadꞌ chṉabiꞌa doxen Egíptoni,

ni to beṉꞌ bibi gak goneꞌ shi liꞌ bi wiꞌo latj.

45 Naꞌ faraónnaꞌ wloꞌe sto lieꞌ de dillꞌ Egipto,

naꞌ bsiꞌeneꞌ Zafnat-panea.

Naꞌ biꞌe noolaꞌ wkee beenaꞌ leꞌ Asenat,

xiiṉ beenaꞌ leꞌ Potifer,

beenaꞌ nak bx̱oz c̱he yellaꞌ leꞌ On.

Naꞌ kaꞌ gok wṉabiaꞌ Josénaꞌ Egíptonaꞌ.

46 Shichoa yizi Josénaꞌ ka bllineꞌ lao faraónnaꞌ,

beenaꞌ chṉabiꞌe Egíptonaꞌ.

Naꞌ wzaꞌ Josénaꞌ ganaꞌ chiꞌ faraónnaꞌ chṉabiꞌe naꞌ wloꞌe nez zejeꞌ doxen yell-lio Egíptonaꞌ.

47 Naꞌ lawi dga gall yiz gotꞌchga yogꞌte dii goz wlek beṉꞌ.

48 Shlak gotꞌ dii wen dii shawaa gall yiz,

Josénaꞌ bitopeꞌ yogꞌḻoḻte trígonaꞌ daa gotꞌ doxen yell-lio Egíptonaꞌ naꞌ wlooshaween yell xenkaꞌ.

Naꞌ to to yell xenkaꞌ wlooshawee daa bitopeꞌ yell-liokaꞌ mbanigakan.

49 Naꞌ Josénaꞌ bitopeꞌ dii zan wal trígonaꞌ,

kakzə(*) yoxaꞌ daa chiꞌ choꞌa nisdoꞌnaꞌ.

Naꞌ daa ḻe gotꞌ trigo c̱he beṉꞌkaꞌ bichkzə bizoileꞌ wchix̱eꞌn.

50 Kanaꞌ biṉꞌ solote wbinnaꞌ,

Josénaꞌ wzoa c̱hop xiiṉeꞌ len xooleꞌ beenaꞌ leꞌ Asenat.

51 Bi nechaꞌ bsiꞌebꞌ Manasés,

ḻaꞌ wneꞌ:

“Chiozaꞌ ba beneꞌ goklen goḻ-lallaa lill xḻatj x̱aꞌnaꞌ naꞌ yogꞌḻoḻ yeḻꞌ ziꞌkaꞌ ba gok c̱haꞌ.”

52 Naꞌ biꞌ wchopinaꞌ bsiꞌebꞌ Efraín,

ḻaꞌ wneꞌ:

“Chiozaꞌ ba gokleneꞌ nadꞌ wzoa biꞌ c̱haꞌki gani ba wdiaꞌ lo yeḻꞌ zakꞌziꞌkaꞌ.”

53 Naꞌ ka wde gall yizaꞌ daa gotꞌ wcheꞌ daa weej wdaogakeꞌ Egíptonaꞌ,

54 naꞌ wzolo wbinnaꞌ daa wcheꞌ zi gall yiz,

ka dillaa daa beꞌ Josénaꞌ.

Naꞌ gotꞌ wbinnaꞌ doxen yell-lionaꞌ.

Tozə Egíptonaꞌ bi byallj dii yeej gaogakeꞌ.

55 Naꞌ ka wzolo byallj daa gao beṉꞌ Egíptokaꞌ,

naꞌ wyajgakeꞌ jaṉabgakeꞌ trígonaꞌ lao faraónnaꞌ.

Naꞌ faraónnaꞌ golleꞌ yogꞌ beṉꞌ yell Egíptonaꞌ:

“Ḻi shaj lao Josénaꞌ naꞌ ḻi gon kon bin iṉeꞌ gonle.”

56 Ka wzolo chiꞌcha wbinnaꞌ doxen yell-lio Egíptonaꞌ,

naꞌ bsalj Josénaꞌ yookaꞌ ganaꞌ wlooshawee diikaꞌ kwenc̱he witeen ikaa beṉꞌ Egíptokaꞌn.

Naꞌ zizikchli chatꞌch wbinnaꞌ.

57 Naꞌ ax̱t len beṉꞌ zitꞌkaꞌ ba chajgakeꞌ Egíptonaꞌte chjx̱iꞌgakeꞌ trígonaꞌ daa chitꞌ Josénaꞌ.

Ḻaꞌ doxente bichkzə gotꞌ dii gaogakeꞌ.