Josénaꞌ chizajniileꞌ bi zejin yel bishgal c̱he c̱hop beṉꞌ
40
Naꞌ ka wde gok kaꞌ,
bi biyoolallꞌ faraónnaꞌ ka chon c̱hop beṉꞌ wen llin c̱heꞌkaꞌ,
toeꞌ ngoo lallꞌ nee beṉꞌkaꞌ chdegakeꞌ daa cheejeꞌ,
naꞌ beenaꞌ sto ngoo lallꞌ nee beṉꞌ wen yetxtilkaꞌ.
2 Naꞌ faraónnaꞌ ḻe bllee beṉꞌkaꞌ c̱hop,
beenaꞌ ngoo lallꞌ nee beṉꞌkaꞌ chde daa cheejeꞌ naꞌ beenaꞌ ngoo lallꞌ nee beṉꞌ wen yetxtilkaꞌ.
3 Naꞌ bseḻee ḻegakeꞌ lao beenaꞌ ngoo lallꞌ nee beṉꞌkaꞌ chap lillyanaꞌ naꞌ bsejeꞌ ḻegakeꞌ lillyanaꞌ ganaꞌ nsejeꞌ Josénaꞌ.
4 Naꞌ beenaꞌ ngoo lallꞌ nee beṉꞌkaꞌ chap lillyanaꞌ beneꞌ lo naꞌ Josénaꞌ wwiabꞌ beṉꞌki bllin c̱hop.
Naꞌ beṉꞌki ssha wyoogakeꞌ lillyanaꞌ.
5 Naꞌ to lleꞌ beṉꞌki c̱hop de lillyanaꞌ,
beṉꞌkaꞌ ben xshin faraónnaꞌ,
wṉegakileꞌ yel.
Naꞌ yelaꞌ daa wṉeyi to toeꞌ zejin dii zejin.
6 Ka wyeeniꞌ,
wyaj Josénaꞌ jawiabꞌ ḻegakeꞌ naꞌ bleꞌibꞌ ḻe chibangakileꞌ.
7 Naꞌ wṉabibꞌ ḻegakeꞌ,
cheꞌbꞌ:
―¿Berac̱he lleꞌzle nyeshiꞌ nlleb ṉaa?
8 Naꞌ cheꞌgakeꞌbꞌ:
―Wṉeyintoꞌ twejə yel naꞌ kono zoa yizajniileꞌ netoꞌ bin zeji yelkaꞌ.
Naꞌ cheꞌ Josénaꞌ:
―Chiozaꞌkzə chizajniileꞌ choꞌ bi zejin bittezə yel.
Ḻi wseesꞌshkayi nadꞌ bin na yel c̱helekaꞌ wṉeyile.
9 Naꞌ beenaꞌ wloo lallꞌ nee beṉꞌkaꞌ chdegakeꞌ daa cheej faraónnaꞌ wzolo chseesee yelaꞌ daa wṉeyileꞌ lao Josénaꞌ,
naꞌ chiꞌe:
―Yeli dga wṉeyidꞌ nan bleꞌidꞌ xoa to ḻba daa chbia uvanaꞌ,
10 nakan shoṉə xozꞌ naꞌ chigaachgan naꞌ lliaten yej.
Naꞌ ka chwiaꞌ ba lliaten tx̱iḻ tx̱iḻ uva dii wa.
11 Naꞌ nadꞌ nox̱aa to kop c̱he faraónnaꞌ naꞌ nan chshibꞌ uvakaꞌ naꞌ chsiaꞌn lo kopaꞌ,
naꞌ jagox̱aan faraónnaꞌ.
12 Naꞌ Josénaꞌ gollbꞌ ḻeꞌ:
―Yel c̱hoꞌnaꞌ daa wṉeyiloꞌ zejin dga:
ḻbakaꞌ shoṉə,
naꞌ zejin shoṉə lla.
13 Naꞌ zi shoṉə lla faraónnaꞌ wiꞌe latj yichejoꞌ lillyani,
naꞌ yiyookzoꞌ llinnaꞌ daa chonkzoꞌ c̱heꞌ naꞌ lljagox̱ooneꞌ kopaꞌ kon ka benkzoꞌ kanaꞌ.
14 Naꞌ katꞌ ba chiyak wen c̱hoꞌ,
naꞌ lljadingachiloꞌ nadꞌ,
naꞌ ben goklen bshaljtogayi faraónnaꞌ c̱haꞌ kwenc̱he yibejeꞌ nadꞌ gani yoꞌa.
15 Ḻaꞌ wlanzgakeꞌ nadꞌ ganaꞌ mbani hebreokaꞌ naꞌ bidwaꞌgakeꞌ nadꞌ ni,
naꞌ aga chidoḻaa gataa lillya ni,
ḻaꞌ aga bi dii mal benꞌ.
16 Naꞌ ka chwia beenaꞌ wloo lallꞌ nee beṉꞌ wen yetxtilkaꞌ ḻe wen bizajnii Josénaꞌ beenaꞌ yel c̱heꞌnaꞌ,
naꞌ golleꞌbꞌ:
―Nadꞌ ḻekzkaꞌ wṉeyidꞌ yelaꞌ llia shoṉə xetꞌ yetxtilkaꞌ yic̱hjii.
17 Naꞌ xetaꞌ daa llia chaꞌte yoon chiya yetxtil shaoꞌ dii chidoḻꞌ faraónnaꞌ.
Naꞌ zaꞌ byiṉdoꞌkaꞌ chidlaꞌogakb daa yoo ḻoo xetaꞌ llia yic̱hjaa.
18 Naꞌ Josénaꞌ billiibꞌ xtillꞌ beeni:
―Yel c̱hoꞌnaꞌ daa wṉeyiloꞌ zejin dga:
Xetꞌkaꞌ shoṉə,
naꞌ zejin shoṉə lla.
19 Naꞌ zi shoṉ lla faraónnaꞌ wseḻee beṉꞌ yidx̱iꞌe liꞌ naꞌ wwaḻꞌgakeꞌ liꞌ to lo yag,
naꞌ bakaꞌ chda xan yabanaꞌ gaogakb liꞌ.
20 Naꞌ ka gok shoṉə lla,
kanaꞌyeṉꞌ wyaꞌi faraónnaꞌ yiz,
naꞌ beneꞌ to lṉi xen kwenc̱he weꞌlaweꞌ yogꞌḻoḻ beṉꞌkaꞌ nzoeꞌ chṉabiaꞌ.
Naꞌ ka ba lleꞌ yogꞌḻoḻ beṉꞌkaꞌ btopeꞌ,
naꞌ faraónnaꞌ biṉabeꞌ beṉꞌkaꞌ c̱hop de lillyanaꞌ,
beenaꞌ to wloo lallꞌ nee beṉꞌkaꞌ chde daa cheej faraónnaꞌ,
naꞌ beenaꞌ sto wloo lallꞌ nee wen yetxtilkaꞌ.
21 Naꞌ beenaꞌ chde daa cheejeꞌ,
naꞌ bigweeneꞌ llinnaꞌ daa chonkzeꞌ.
Naꞌ bizoloeꞌ chidieꞌ daa cheej faraónnaꞌ.
22 Naꞌ beṉꞌ wen yetxtilaꞌ bwaḻꞌgakeꞌneꞌ to lo yag.
Naꞌ gok kon ka bizajnii Josénaꞌ c̱hoptegakeꞌ.
23 Naꞌ beenaꞌ bizolo chidieꞌ daa cheej faraónnaꞌ niki jadinzileꞌ Josénaꞌ to goḻꞌlallꞌzeꞌbꞌ.