Josénaꞌ naꞌch xoolə Potifaraꞌ
39
Kanaꞌ bc̱heꞌgakeꞌ Josénaꞌ Egíptonaꞌ,
to beṉꞌ Egipto lieꞌ Potifar wxiꞌebꞌ lao madianitakaꞌ,
beṉꞌkaꞌ bc̱heꞌ ḻebꞌ naꞌ.
Naꞌ Potifaraꞌ nakeꞌ to beṉꞌ wen llin c̱he faraónnaꞌ naꞌ chṉabiꞌe beṉꞌkaꞌ chap faraónnaꞌ.
2 Naꞌ X̱ancho Chiozaꞌ zoaleneꞌ Josénaꞌ naꞌ ḻe wen gok c̱hebꞌ shlak wzoabꞌ lill x̱amaa.
3 Naꞌ gokbeꞌi x̱amaa nan X̱ancho Chiozaꞌ zoaleneꞌ ḻebꞌ,
naꞌ daan chak wen c̱heꞌ.
4 Naꞌ bleꞌshii x̱amaa ḻebꞌ,
naꞌ bzoeꞌbꞌ kwenc̱he koo lo nabꞌ lilleꞌnaꞌ naꞌ yogꞌḻoḻ daa napeꞌ.
5 Naꞌ kon ka gok lallꞌ naꞌ Josénaꞌ daa nap Potifaraꞌ,
X̱ancho Chiozaꞌ benḻeeyeꞌ Potifaraꞌ ka ḻoo yoo lilleꞌnaꞌ,
naꞌ kaꞌkzə llin lyix̱ꞌ c̱heꞌnaꞌ.
6 Toz Josénaꞌ gok lallꞌ nabꞌ yogꞌḻoḻ daa napeꞌ.
Naꞌ Potifaraꞌ bich bi wloo yic̱hjeꞌ dii yoblə san toz daa gaweꞌ.
Naꞌ Josénaꞌ ḻe xochi nakbꞌ.
7 Ka ba wlla zoabꞌ naꞌ,
xoolə Potifaraꞌ wzelalleebꞌ,
naꞌ to lla golleꞌbꞌ:
―Cheenidꞌ iṉelenoꞌ nadꞌ.
8 Naꞌ bi gooni Josénaꞌ,
naꞌ cheꞌbꞌ:
―Bwiakachi.
Yogꞌḻoḻ daa nap x̱anꞌnaꞌ noneꞌn lallꞌ naꞌ.
Naꞌ daa zoaꞌ ni,
bibi chiꞌ yic̱hjkzeꞌ.
9 Ḻoo yoo ni bich nzoeꞌ sto beṉꞌ llialotech ka nadꞌ.
X̱anꞌnaꞌ bi biṉꞌ wllonileꞌ nadꞌ san zeelo liꞌ daa nakoꞌ xooleꞌ.
Naꞌ bi gak gonꞌ dii mal wali daa noꞌ kaꞌ,
naꞌ gonzꞌ saaxya lao Chiozaꞌ.
10 Naꞌ ḻaꞌkzi wzeyideꞌ lao Josénaꞌ yogꞌ lla kwenc̱he iṉelemꞌ ḻe,
bi bemꞌ ka chiꞌebꞌ.
11 Naꞌ bllin to lla wyoo Josénaꞌ ḻoo yoonaꞌ kwenc̱he gomꞌ llinnaꞌ.
Naꞌ daa kono lleꞌ naꞌ
12 lii bex̱ꞌte noolaꞌ xabaa,
chiꞌe:
―Cheenidꞌ iṉelenoꞌ nadꞌ.
Naꞌ lii bichejtebꞌ chxoṉjdobꞌ naꞌ bgaaṉzə xabaa lo naꞌ noolaꞌ.
13 Naꞌ ka bleꞌileꞌ bichejbꞌ naꞌ bgaaṉzə xabaa lo neenaꞌ,
14 naꞌ wṉieꞌ beṉꞌ wen llinkaꞌ,
naꞌ chiꞌe:
―Ḻi wwiakachi.
Beṉꞌ c̱haꞌnaꞌ wxiꞌlzeꞌ to biꞌ hebreo,
naꞌ ṉaa chonḻezibꞌ netoꞌ.
Wyoolzbꞌ ḻoo yooni cheenibꞌ gonḻeyibꞌ nadꞌ.
Naꞌ besyaa zilljə wal.
15 Naꞌ ka benibꞌ chosyaa zilljə wal,
naꞌ bichejbꞌ ziyajdobꞌ naꞌ nizə bgaaṉ xabaa.
16 Naꞌ wlooshawee xa Josénaꞌ ax̱t ka billinch beṉꞌ c̱heꞌnaꞌ kwiteꞌnaꞌ.
17 Naꞌch bshaljleneꞌneꞌ,
chiꞌeneꞌ:
―Biꞌ wen llinnaꞌ,
biꞌ hebrewaꞌ,
biꞌnaꞌ bic̱heꞌlzoꞌ,
wyoobꞌ ḻoo yoo c̱haꞌni naꞌ goklallibꞌ gonḻeyibꞌ nadꞌ.
18 Naꞌ ka besyaa zilljə wal,
naꞌ bichejdobꞌ chxoṉjbꞌ naꞌ nizə bgaaṉ xabaa.
19 Kaꞌ beni biꞌ wen llin c̱hoꞌnaꞌ nadꞌ.
Naꞌch x̱an Josénaꞌ bllaachgueꞌ ka goll xooleꞌnaꞌ ḻeꞌ kaꞌ.
20 Naꞌ bex̱ee Josénaꞌ naꞌ wloꞌebꞌ lillya ganaꞌ lleꞌ pres c̱he faraónnaꞌ.
Naꞌ ḻaꞌkzi ba debꞌ lillyanaꞌ,
21 X̱ancho Chiozaꞌ ni zoalenkzeꞌ Josénaꞌ,
naꞌ benileꞌbꞌ wen naꞌ gokleneꞌbꞌ kwenc̱he beenaꞌ chṉabiaꞌ ḻoo lillyanaꞌ bleꞌshiileꞌbꞌ.
22 Naꞌ beneꞌ beṉꞌkaꞌ de lillyanaꞌ lallꞌ naꞌ Josénaꞌ.
Naꞌ Josénaꞌ wloo lallꞌ nabꞌ yogꞌḻoḻ diikaꞌ chak ḻoo lillyanaꞌ.
23 Naꞌ beenaꞌ chṉabiaꞌ ḻoo lillyanaꞌ bi benan byen sieꞌ wṉeyi wwieꞌ diikaꞌ nak lallꞌ naꞌ Josénaꞌ.
Ḻaꞌ X̱ancho Chiozaꞌ zoalenkzeꞌ Josénaꞌ naꞌ yogꞌḻoḻ diikaꞌ chomꞌ chchejan wen.