6 Naꞌ Judánaꞌ wṉabe to xoolə xiiṉeꞌ biꞌ nechaꞌ,

biꞌnaꞌ leꞌ Er.

Naꞌ wkaabꞌ noolaꞌ wle Tamar.

7 Naꞌ Eraꞌ,

biꞌ nech c̱he Judánaꞌ,

gokbꞌ to biꞌ mal lao Chiozaꞌ,

naꞌ Chiozaꞌ bikee yeḻꞌ mban c̱heꞌbaa.

8 Naꞌch Judánaꞌ chiꞌe Onánnaꞌ:

―Bikaa xool dii beṉꞌ bishoonaꞌ naꞌ benshazə ka chiyaḻꞌ gonoꞌ kwenc̱he soa dia c̱he dii beṉꞌ bishoonaꞌ.

9 Naꞌ Onánnaꞌ ṉezileꞌ nan biꞌdoꞌkaꞌ galjə bi gakgakbꞌ biꞌ c̱heꞌ,

san gakgakb biꞌ c̱he dii beṉꞌ bisheenaꞌ.

Naꞌ daan ka ches chnaleneꞌ ḻeꞌ naꞌ chsakee kwenc̱he bi waꞌ noolaꞌ naꞌ bi soa dia c̱he dii beṉꞌ bisheenaꞌ.

10 Naꞌ bi wyoolallꞌ Chiozaꞌ daa ben Onánnaꞌ kaꞌ,

naꞌ ḻekzkaꞌ bikee yeḻꞌ mban c̱heꞌnaꞌ.

11 Naꞌch cheꞌ Judánaꞌ xoolilleꞌ Tamaraꞌ:

―Jazoashazə liꞌ lill x̱oꞌnaꞌ.

Igolch Sélani,

biꞌ c̱haꞌni sto,

naꞌ ikaabꞌ liꞌ.

Ḻaꞌ Judánaꞌ gokileꞌ ḻekzkaꞌlja yizet Sélanaꞌ ka gok c̱he beṉꞌ bishꞌbꞌkaꞌ.

Naꞌ bizaꞌ Tamaraꞌ jazoeꞌ lill x̱eꞌnaꞌ.

12 Naꞌ bllin lla wit xoolə Judánaꞌ,

xiiṉ Súanaꞌ.

Naꞌ ka biyakshaoꞌlallꞌ Judánaꞌ daa wit xooleꞌnaꞌ,

naꞌ wyajeꞌ yellaꞌ le Timnat ganaꞌ lleꞌ beṉꞌkaꞌ chshibgakeꞌ xa xilꞌdoꞌkaꞌ napeꞌ.

Naꞌ wyajleneꞌ Híranaꞌ,

beṉꞌ Adulamaꞌ,

beenaꞌ nllaguileꞌ.

13 Ka gollgakeꞌ Tamáraꞌ nan ba ziyaj xtobiiṉ c̱heꞌnaꞌ Timnátaꞌ zjashibeꞌ xa xilꞌdoꞌkaꞌ,

14 naꞌ bishee xeꞌnaꞌ daa choꞌen dillꞌ nan noolə wizebzan,

naꞌ bkwashꞌ choꞌalaweꞌnaꞌ kon to lechꞌ kwenc̱he kono yiyombiaꞌ ḻeꞌ.

Naꞌ jc̱hiꞌe choꞌa yellaꞌ le Enaim daa llia tnezaꞌ zej Timnátalə.

Beneꞌ kaꞌ daa wṉezileꞌ nan ba bgol Sélanaꞌ,

naꞌ biṉꞌ yikaabꞌ ḻeꞌ.

15 Ka bleꞌi Judánaꞌ ḻeꞌ,

naꞌ gokileꞌ noolə wdan daa nkwashꞌ choꞌalaweꞌnaꞌ.

16 Naꞌ wḻee nezaꞌ zejeꞌ kwiteꞌnaꞌ,

naꞌ niki ṉezileꞌ shi xoolilleꞌnanꞌ.

Naꞌ chiꞌe:

―¿Aweeniloꞌ iṉelenꞌ liꞌ?

Naꞌ xoolilleꞌnaꞌ chiꞌeneꞌ:

―¿Bera goṉoꞌ nadꞌ daa iṉelenoꞌ nadꞌ?

17 Naꞌ cheꞌ Judánaꞌ:

―Naꞌ wseḻꞌtoaꞌ shibdoꞌ c̱hoꞌ bakaꞌ napꞌ.

Naꞌ cheꞌ xoolilleꞌnaꞌ:

―Wakzan shkaꞌ.

Kon bkwaaṉlen nadꞌ to dii naki c̱hoꞌ,

naꞌ yiyoṉaꞌn katꞌ goṉoꞌ shibdoꞌnaꞌ.

18 Naꞌ cheꞌ Judánaꞌ:

―¿Bera cheeniloꞌ wkwaaṉaa?

Naꞌ cheꞌ xoolilleꞌnaꞌneꞌ:

―Beṉ nadꞌ seyaꞌ len do c̱heyinnaꞌ,

naꞌ yag bar c̱hoꞌnaꞌ daa noxoo.

Naꞌ beꞌ Judánaꞌn,

naꞌch wṉeleneꞌneꞌ,

naꞌ biꞌatieꞌ.

19 Naꞌ zjada Tamaraꞌ,

naꞌ bikwaseꞌ lechaa choꞌalaweꞌnaꞌ naꞌ biyakweꞌ sto shii xeꞌnaꞌ daa choꞌen dillꞌ nan noolə wizebzan.

20 Naꞌ bseḻꞌ Judánaꞌ beṉꞌ Adulamaꞌ,

beenaꞌ nllaguileꞌ,

zjwee shibdoꞌnaꞌ,

kwenc̱he yiyoꞌe noolaꞌ daa bkwaaṉꞌleneꞌneꞌ.

Naꞌ beenaꞌ bich bllagueꞌ noolaꞌ.

21 Naꞌ wṉabileꞌ beṉꞌkaꞌ lleꞌ yell Enaimaꞌ,

chiꞌe:

―¿Galə bikaa noolə wdanaꞌ wzoa choꞌa nezi?

Naꞌ cheꞌgakeꞌneꞌ:

―Aga noṉꞌ noolə wda soa ni.

22 Naꞌ bizee ziyajeꞌ ganaꞌ zoa Judánaꞌ,

naꞌ chiꞌe:

―Aga no noolaꞌ billelidꞌ,

naꞌ leyi wna beṉꞌkaꞌ nadꞌ:

“Aga noṉꞌ noolə wda zoa ni.”

23 Naꞌch cheꞌ Judánaꞌ:

―Yigaaṉlenshazeꞌ diikaꞌ kwenc̱he kono gonḻezi choꞌ.

Kon ba bseḻꞌlenꞌ liꞌ shibdoꞌnaꞌ,

naꞌ bi billeliloꞌneꞌ.

24 Gok ka shoṉə beoꞌ bllin beṉꞌ lao Judánaꞌ,

cheꞌgakeꞌneꞌ:

―Xoolilloꞌ Tamaraꞌ ba wṉeleneꞌ beṉꞌ byo yoblə naꞌ biaꞌtieꞌ.

Naꞌ besyaa Judánaꞌ,

chiꞌe:

―¡Ḻi kwejeꞌ naꞌ ḻi wzeyee!

25 Naꞌ ka nan chbejgakeꞌneꞌ naꞌ bseḻee rson lao xtobiiṉ c̱heꞌnaꞌ,

chiꞌe:

“Beenaꞌ beṉ nadꞌ diiki nox̱aa ni,

ḻenꞌ bwee nadꞌ.

Bwiashki no c̱heyi seyi naꞌ doni,

naꞌch yag bari.”

26 Ka biyombiaꞌ Judánaꞌ diikaꞌ,

naꞌch wneꞌ:

“Wenan ben beeni,

naꞌ nadaan bi benꞌ wen daa bi biꞌa latj ikaa biꞌ c̱haꞌ Sélanaꞌ ḻeꞌ.”

Naꞌ Judánaꞌ,

bichga gotꞌleneꞌ ḻeꞌ.

27 Ka wxan Tamaraꞌ naꞌ wxaneꞌ biꞌ bḻidꞌdoꞌ.

28 Ka ba chaljgakbꞌ,

tobꞌ wlej naꞌbaa nech,

naꞌ noolə winanaꞌ bc̱hejeꞌ to do xṉa naꞌbaa,

naꞌ chiꞌe:

“Biꞌnin biꞌ nechaꞌ.”

29 Naꞌ lii bigoote naꞌbaa sto shii,

naꞌ biꞌ bishꞌbaa stolə golj nech.

Naꞌ noolə winanaꞌ golleꞌ:

“¿Nak benoꞌ bchejoꞌ?”

Daan bsiꞌebꞌ Fares.

30 Naꞌ lii goljte biꞌdoꞌnaꞌ bc̱hejeꞌ do xṉanaꞌ *naꞌyinnaꞌ,

naꞌ bsiꞌebꞌ Zara.