Génesis 37

Chitꞌ biꞌ bishꞌ Josénaꞌ ḻebꞌ

Naꞌ wzoa Jacobaꞌ yell-lio Canaánnaꞌ ganaꞌ wzoa dii x̱eꞌnaꞌ.

2 Ki gok c̱he Jacobaꞌ len xiiṉ c̱heꞌkaꞌ:

Kanaꞌ zeji Josénaꞌ shinꞌc̱hop yiz,

chapbꞌ xilꞌdoꞌkaꞌ len biꞌ bishꞌbꞌkaꞌ,

xiiṉ Bílhanaꞌ naꞌch xiiṉ Zílpanaꞌ,

beṉꞌkaꞌ gok xoolə Jacobaꞌ.

Naꞌ Josénaꞌ toshiizi chjadaobꞌ xya daa bikzə nsaꞌ c̱he beṉꞌ bishꞌbꞌkaꞌ wen.

3 Israelaꞌ ḻech gokileꞌ Josénaꞌ aga ka beṉꞌ bishꞌbꞌkaꞌ,

daa goljbꞌ kanaꞌ ba nakeꞌ beṉꞌ golə naꞌ beneꞌ to xabꞌ dii ḻe nakchga.

4 Ka gokbeꞌi beṉꞌ bishꞌbꞌkaꞌ nan x̱eꞌkaꞌ chakchileꞌ Josénaꞌ aga ka ḻegakeꞌ,

naꞌ gokzbangakileꞌ ḻebꞌ naꞌ ni bich chṉegakeꞌ ḻebꞌ.

5 Bllin to lla wṉei Josénaꞌ to yel naꞌ bseesibaꞌn beṉꞌ bishꞌbꞌkaꞌ,

naꞌ zizikchli bllaagakeꞌ ḻebꞌ

6 daa gollbꞌ ḻegakeꞌ:

―Ḻi wzenagkachi,

wseesaa to yel dii wṉeidꞌ

7 nazan yogꞌḻoḻcho lleꞌcho lyix̱aa naꞌ choncho trigokaꞌ x̱oṉj wej,

katꞌkzali wzoachayi daa bc̱hejꞌ naꞌ wzoan shḻicha.

Naꞌ diikaꞌ bc̱hejle leꞌ ṉaa,

wyec̱hjgakan c̱haꞌnaꞌ naꞌ bchekꞌgakan lawinnaꞌ.

8 Naꞌch cheꞌ beṉꞌ bishꞌbꞌkaꞌ:

―¿Anaꞌ chakiloꞌ liꞌ iṉabiꞌo netoꞌ shkaꞌ,

naꞌ goniloꞌ netoꞌ kon daa nan c̱hoꞌ?

Naꞌ zizikchli gokzbangakileꞌ ḻebꞌ daa wṉeibꞌ yelaꞌ,

naꞌ daa bi wyoolallꞌgakeꞌ ka gollbꞌ ḻegakeꞌ.

9 Naꞌch Josénaꞌ wṉeibꞌ sto yel naꞌ ḻekzkaꞌ bseesibaꞌn beṉꞌ bishꞌbꞌkaꞌ.

Naꞌ cheꞌbꞌ:

―¿Aṉezile wṉeidꞌ sto yel?

Naꞌ bleꞌidꞌ wbillaꞌ naꞌch bewaa naꞌ zi shnej belj bchekꞌgakan lawaꞌ.

10 Ka bseesꞌ Josénaꞌ yel c̱heꞌbaa lao x̱abaa naꞌ lao beṉꞌ bishꞌbꞌkaꞌ,

naꞌ x̱abaa bsheshleneꞌbꞌ,

chiꞌe:

―¿Beran chon nalenzoꞌ yeli dga wṉeiloꞌ?

¿Achakiloꞌ nadꞌ,

naꞌ xṉoꞌnaꞌ naꞌch beṉꞌ bishooki wc̱hekzꞌ xibntoꞌ lawoꞌnaꞌ?

11 Naꞌ beṉꞌ bishꞌbꞌkaꞌ ḻe chakzbangakileꞌ ḻebꞌ.

Naꞌ x̱abaa ḻe wṉeyi wzieꞌ c̱he yel c̱he Josénaꞌ.

12 Naꞌ bllin to lla wyaj beṉꞌkaꞌ nak beṉꞌ bishꞌ Josénaꞌ Siquemaꞌ nc̱heꞌgakeꞌ bayix̱ꞌdoꞌkaꞌ nap x̱eꞌkaꞌ chyiljgakeꞌ ga de dii gaogakb.

13 Naꞌch goll Israelaꞌ Josénaꞌ:

―Lleꞌtꞌ beṉꞌ bishookaꞌ Siquemaꞌ chapgakbꞌ xilꞌkaꞌ.

Cheenidꞌ lljawioꞌgakeꞌ.

Naꞌ cheꞌ Josénaꞌ:

―Wakkzə,

naꞌ shaꞌ.

14 Naꞌ cheꞌ Israelaꞌ:

―Wyajshki,

jawia nak chak c̱he beṉꞌ bishookaꞌ naꞌ xilꞌkaꞌ naꞌ lii yiyeddotioꞌ iṉoꞌ nadꞌ nak chak.

Naꞌ bseḻee Josénaꞌ,

naꞌ wzaꞌbꞌ leshꞌ c̱he Hebrónnaꞌ.

Naꞌ ka bllimꞌ ganaꞌ le Siquem

15 naꞌ wnitbꞌ lyix̱aa.

Naꞌ billag to beṉꞌ ḻebꞌ,

naꞌ chiꞌebꞌ:

―¿Beran chiyiljoꞌ?

16 Naꞌ cheꞌ Josénaꞌ:

―Beṉꞌ bishaakanꞌ chiyiljꞌ.

¿Abi ṉeztogayiloꞌ gan chapgakeꞌ xilꞌkaꞌ?

Naꞌ cheꞌ beenaꞌ:

17 ―Ba bizaꞌ beṉꞌkaꞌ ni.

Benzidꞌ cheꞌgakeꞌ:

“Yiyajcho Dotánnaꞌlə.”

Naꞌ jadilj Josénaꞌ beṉꞌ bishꞌbꞌkaꞌ,

naꞌ billagbꞌ ḻegakeꞌ Dotánnaꞌ.

18 De zitꞌlə ni zejbꞌ ka bleꞌgakileꞌ ḻebꞌ,

naꞌ ka ziꞌ illimꞌ kwiteꞌkaꞌ beꞌgakeꞌ dillꞌ witgakeꞌbꞌ.

19 Naꞌ cheꞌ ljwellgakeꞌ:

―¡Naꞌ zaꞌ biꞌnaꞌ chṉeyi yelaꞌ!

20 Ḻi da,

witchobꞌ naꞌ wzalꞌchobꞌ to ḻoo yechki choll nisaꞌ.

Naꞌ iṉatezcho to ba zṉian wdaob ḻebꞌ.

Naꞌ wwiakachicho bi gak daa wṉeibꞌ yel.

21 Ka beni Rubénnaꞌ dga,

goklalleꞌ yisleꞌ ḻebꞌ lo naꞌ beṉꞌ bishꞌbꞌkaꞌ.

Naꞌ chiꞌe:

―Bi witlebꞌ.

22 Ḻi wzaḻꞌbꞌ ḻoo yechi dga zoa gani bibi chashj chḻeb,

naꞌ bi witlebꞌ.

Rubénnaꞌ golleꞌ kaꞌ ḻaꞌ gokileꞌ yisleꞌ biꞌ bisheenaꞌ,

naꞌ yiseḻee ḻebꞌ lao x̱eꞌkaꞌ.

23 Naꞌ ka bllin Josénaꞌ ganaꞌ lleꞌ beṉꞌ bishꞌbꞌkaꞌ lii goljtegakeꞌ xabaa daa nakwbꞌ daa ḻe nakchga,

24 naꞌ lii bex̱ꞌtegakeꞌ ḻebꞌ bzaḻꞌgakeꞌbꞌ ḻoo yechaꞌ ganaꞌ ba bibill nisaꞌ.

25 Naꞌtech wcheꞌgakeꞌ wdaogakeꞌ.

Katꞌkzali bleꞌgakileꞌ zejə x̱oṉj madianitakaꞌ^a zizaꞌgakeꞌ Galaadaꞌlə.

Naꞌ zinwaꞌgakeꞌ kamey c̱heꞌkaꞌ za dii chḻaꞌ zix̱ naꞌ nillꞌ c̱he yagaꞌ chḻaꞌ zix̱ daa le mirra kwenc̱he lljayetꞌgakenꞌ Egíptonaꞌ.

26 Naꞌch Judánaꞌ chiꞌe beṉꞌ bisheekaꞌ:

―¿Bitgui de goncho gan witcho biꞌ bishꞌchoni,

naꞌch wkwashꞌzcho yeḻꞌ wit c̱hebaꞌ?

27 Wenchlə witꞌchobꞌ lao madianitaki naꞌ bi witchobꞌ,

ḻaꞌ chaktek biꞌ bishꞌchobꞌ.

Naꞌ bzenag beṉꞌ bisheekaꞌ daa golleꞌ ḻegakeꞌ.

28 Naꞌ ka wde madianitakaꞌ^b ,

beṉꞌ wen delgenskaꞌ,

naꞌ beṉꞌkaꞌ nak biꞌ bishꞌ Josénaꞌ bibejgakeꞌbꞌ lo yechaꞌ naꞌ betꞌgakeꞌbꞌ lao beṉꞌkaꞌ,

naꞌ wdixjgakeꞌbꞌ galj mech de plat.

Naꞌ bc̱heꞌgakeꞌ Josénaꞌ Egíptonaꞌ.

29 Ka billin Rubénnaꞌ choꞌa yechaꞌ aga noch no Josénaꞌ yoonaꞌ,

naꞌ bshoꞌ bc̱hezꞌ xeꞌnaꞌ daa ḻe jeḻchgayileꞌ.

30 Naꞌch ziyajeꞌ ganaꞌ lleꞌ beṉꞌ bisheekaꞌ,

naꞌ chiꞌe ḻegakeꞌ:

―Kochno biꞌ xkwidaa yoo naꞌ.

¿Nakra gonaꞌn ṉaa?

31 Naꞌch wdoyogakeꞌ xa Josénaꞌ daa ḻe nakchga,

btop bshilgakeꞌn xc̱hen shibdoꞌ banaꞌ betgakeꞌ.

32 Naꞌ biseḻꞌgakeꞌn kwit x̱eꞌkaꞌ,

cheꞌgakeꞌ:

“Billelzintoꞌ dga.

Bwiayeṉꞌshkin,

shi xa biꞌ c̱hoꞌnaꞌn,

wa shi aga ḻennanꞌ.”

33 Ka biyombiꞌe xabaa,

naꞌ chiꞌe:

“Xa biꞌ c̱haꞌnanꞌ.

Nochodꞌ ba zṉian bxoxj btim biꞌ c̱haꞌnaꞌ naꞌ wdaob ḻebꞌ.”

34 Naꞌ Jacobaꞌ bshoꞌ bc̱hezꞌ xeꞌnaꞌ daa ḻe jeḻileꞌ,

naꞌ biyakweꞌ to xeꞌ dii zeshꞌ daa chc̱hingakeꞌ katꞌ chet beṉꞌ,

naꞌ ssha gokyeshiileꞌ daa wit biꞌ c̱heꞌnaꞌ.

35 Naꞌch yogꞌḻoḻ xiiṉeꞌkaꞌ,

ka noolə ka beṉꞌ byo,

wllagdiagakeꞌ ḻeꞌ,

choeꞌlengakeꞌneꞌ dillꞌ yeḻꞌ chxenlallꞌ,

naꞌ ḻeꞌ bi gonileꞌ no yiyonxenlallii(*) ḻeꞌ.

Zizikli wchelleꞌ c̱he xiiṉeꞌnaꞌ,

naꞌ chiꞌe:

“Bi wsankzꞌ kwellidꞌ biꞌ c̱haꞌnaꞌ ax̱t ki yillag yidiḻꞌbꞌ ladj beṉꞌ wetkaꞌ.”

36 Naꞌ madianitakaꞌ biyitꞌgakeꞌ Josénaꞌ Egíptonaꞌ,

naꞌ biziꞌ to beṉꞌ le Potifar ḻebꞌ,

beenaꞌ chon xshin faraónnaꞌ,

beenaꞌ chṉabiaꞌ Egíptonaꞌ.

Naꞌ goktieꞌ beṉꞌ chṉabiaꞌ beṉꞌkaꞌ chap faraónnaꞌ.