Jacobaꞌ naꞌ Esaúnaꞌ chiyoeꞌxen ljwellgakeꞌ
33
Ka bleꞌi Jacobaꞌ Esaúnaꞌ zejleneꞌ tap guiyoa beṉꞌkaꞌ,
naꞌ biyoneꞌ c̱helə Léanaꞌ len biꞌ c̱heꞌkaꞌ naꞌ c̱helə Raquelaꞌ len biꞌ c̱heꞌkaꞌ,
naꞌ ḻekzkaꞌ noolə wen llinkaꞌ c̱hop.
2 Zigaate noolə wen llinkaꞌ len biꞌ c̱heꞌkaꞌ bzoeꞌ laoteyin,
naꞌch lii zejte Léanaꞌ len biꞌ c̱heꞌkaꞌ.
Naꞌtech zej Raquelaꞌ len biꞌ c̱heꞌnaꞌ,
biꞌnaꞌ le José.
3 Naꞌch wllialoeꞌ laweꞌkaꞌ naꞌ bc̱hekꞌ xibeꞌnaꞌ gall shii bllinte loxgueꞌnaꞌ lo yonaꞌ,
ax̱t ka bllineꞌ lao beṉꞌ bisheenaꞌ.
4 Naꞌ Esaúnaꞌ zejdoeꞌ jatiḻeꞌneꞌ naꞌ wdeḻeꞌ yeneꞌnaꞌ naꞌ bnopeꞌneꞌ.
Naꞌch c̱hoptieꞌ wchell.
5 Naꞌch ka wde bleꞌi Esaúnaꞌ noolkaꞌ naꞌch biꞌdoꞌkaꞌ,
naꞌ wṉabileꞌneꞌ,
chiꞌe:
―¿Nora beṉꞌki?
Naꞌ cheꞌ Jacobaꞌ:
―Biꞌdoꞌkin ba beꞌ Chiozaꞌ xmosoꞌni.
6 Naꞌ noolə wen llinkaꞌ len biꞌ c̱heꞌkaꞌ wbigꞌgakeꞌ naꞌ bc̱hekꞌ xibeꞌkaꞌ ax̱t lo yonaꞌ bllin loxgueꞌkaꞌ.
7 Naꞌtechlə wbigꞌ Léanaꞌ len biꞌ c̱heꞌkaꞌ,
naꞌ ḻekzkaꞌ bengakeꞌ.
Naꞌ ka biya beṉꞌki,
naꞌ wbigꞌ Josénaꞌ len xṉaꞌbꞌ Raquelaꞌ,
naꞌ ḻekzkaꞌ bc̱hekꞌ xibeꞌkaꞌ.
8 Naꞌ wṉab Esaúnaꞌ,
chiꞌe:
―¿Beran chakiloꞌ goniloꞌ yogꞌ kwen bayix̱ꞌdoꞌkaꞌ ba billagꞌ?
Naꞌ c̱he Jacobaꞌ:
―Kwenc̱he yileꞌshiiloꞌ nadaan.
9 Naꞌ cheꞌ Esaúnaꞌ:
―Bi gak daa,
beṉꞌ bishꞌdawaa,
zankzə dii napꞌ nadꞌ.
Bigaaṉlen liꞌ dii nakkzə c̱hoꞌ.
10 Naꞌ Jacobaꞌ zeyideꞌ,
chiꞌeneꞌ:
―Bi gakan,
ben goklen.
Ḻaꞌ shi ba bileꞌshiiloꞌ nadꞌ,
wkaa diiki choṉꞌ liꞌ.
Daa chleꞌidꞌ liꞌ chonan ka iṉacho Chiozaꞌkzan chleꞌidꞌ,
ḻaꞌ ba bileboꞌ nadꞌ mbalaz inlleb.
11 Naꞌch ṉabidꞌ liꞌ,
wkaasha dga choṉꞌ liꞌ,
dga nsaa c̱hoꞌ.
Chiozaꞌ ba beneꞌ nadꞌ beṉꞌ wniꞌa,
naꞌ bich bi chyalljidꞌ.
―Bidoꞌ shkaꞌ.
Nadꞌ yibialoaꞌ lawoꞌnaꞌ.
13 Naꞌ cheꞌ Jacobaꞌ:
―X̱andawaa,
liꞌkz ṉeziloꞌ aga ba naḻ(*nal) biꞌdoꞌki.
Naꞌ ḻekzkaꞌ napꞌ xilꞌ naꞌ bak,
ba zi wxan.
Naꞌ shi yidolallꞌgakb,
tllazə wiyab guet,
shi ṉaa.
14 Wenchlə yibialoꞌ lawii naꞌ nadꞌ yidlenꞌ badoꞌki shoolallꞌ kon kaꞌkꞌ sogakib naꞌ kon kaꞌkꞌ soi biꞌdoꞌki,
ax̱t ki yillagcho Seíraꞌ.
15 Naꞌ cheꞌ Esaúnaꞌ:
―Wakzə shkaꞌ,
beꞌ latj yikwaaṉlentoaꞌ liꞌ beṉꞌki zaꞌlen nadꞌ.
Naꞌ cheꞌ Jacobaꞌ:
―Bi gakan.
Ben goklen bi seḻzoꞌ wṉeyi c̱haꞌ nadꞌ.
16 Naꞌ lo llanaꞌtezə bizaꞌ Esaúnaꞌ ziyajeꞌ Seíraꞌ.
17 Naꞌ Jacobaꞌ biyajeꞌ gan yoblə ganaꞌ leꞌ Sucot.
Naꞌ ben to lilleꞌ naꞌ beneꞌ sto daa bx̱olan bayix̱ꞌdoꞌ c̱heꞌkaꞌ.
Daan bsiꞌe latjaꞌ Sucot.
18 Ka bizaꞌ Jacobaꞌ Padán-arámaꞌ,
naꞌ billineꞌ shiꞌa shaoꞌ yell Canaánnaꞌ,
naꞌ wzoeꞌ gaozə yell xen daa leꞌ Siquem.
19 Naꞌ biziꞌe to yell-lio c̱he xiiṉ Hamoraꞌ,
x̱a Siquemaꞌ,
naꞌ biꞌe to guiyoa mech c̱hegakeꞌ.
Naꞌ naꞌ wcheneꞌ.
20 Naꞌtech beneꞌ to x̱oṉj ga wzeyeꞌ bayix̱ꞌkaꞌ chiteꞌ kwenc̱he weꞌlawee Chiozaꞌ naꞌ bsiꞌe latjaꞌ El-Elohe-Israel.a