Esaúnaꞌ chjatiḻeꞌ Jacobaꞌ
32
Naꞌ Jacobaꞌ bigwee nez naꞌ jatiḻ x̱oṉj anjl c̱he Chiozaꞌ ḻeꞌ.
2 Naꞌ ka bleꞌi Jacobaꞌ anjlkaꞌ,
naꞌ wneꞌ:
“Anjl c̱he Chiozaꞌ chengakeꞌ ni.”
Naꞌ bsiꞌe latjaꞌ Mahanaim.
3 Naꞌch Jacobaꞌ bseḻee to c̱hop beṉꞌ jtix̱jeꞌgakileꞌ beṉꞌ bishee Esaúnaꞌ yaa yawaꞌ le Seir ganaꞌ mbani yell-lionaꞌ le Edom,
kwenc̱he iṉezileꞌ nan ba zoa yillineꞌ.
4 Naꞌ chiꞌe ḻegakeꞌ:
―Ḻi yeꞌsha beṉꞌ bishaa Esaúnaꞌ:
“Ba zizaꞌ beṉꞌ bishoo Jacobaꞌ ḻaꞌ ssha wal ba jsoaleneꞌ Labánnaꞌ.
Naꞌ ṉaach zizee naꞌ neꞌ yogꞌḻoḻ bi yooneꞌ goneꞌ ṉaa.
5 Naꞌ c̱hix̱jeꞌileꞌ liꞌ,
nakoꞌ x̱aneꞌ,
naꞌ neꞌ napeꞌ bak,
burr,
xilꞌ,
naꞌ napeꞌ beṉꞌ wen llin,
ka beṉꞌ byo ka noolə.
Naꞌ cheenileꞌ ileꞌshiiloꞌneꞌ katꞌ yiyedeꞌ.”
6 Ka billin beṉꞌkaꞌ jtix̱jeꞌgakileꞌ Esaúnaꞌ,
naꞌ cheꞌgakeꞌ Jacobaꞌ:
―Ba wyajntoꞌ jawiantoꞌ beṉꞌ bishoo Esaúnaꞌ.
Naꞌ ba zaꞌ kwinkzeꞌ kwenc̱he ilebeꞌ liꞌ,
naꞌ nc̱hiꞌe tap guiyoa beṉꞌ.
7 Naꞌ kon ka beni Jacobaꞌ dga,
bllebchgueꞌ naꞌ gokshejlallꞌchgueꞌ.
Naꞌ beneꞌ beṉꞌkaꞌ leneꞌ c̱hop kwenlə naꞌ ḻekzkaꞌ xilꞌkaꞌ,
bakkaꞌ,
naꞌ kameykaꞌ.
8 Ḻaꞌ gokileꞌ:
“Shi Esaúnaꞌ zee kwenc̱he tiḻ-leneꞌ beṉꞌki tkwen,
naꞌ beṉꞌkaꞌ zi shkwen wak ilagakeꞌ.”
9 Naꞌ lii wzolotieꞌ choeꞌḻwilleꞌ Chiozaꞌ,
chiꞌe:
“Chios c̱he dii x̱agolꞌ Abrahamaꞌ naꞌ x̱aꞌ Isaacaꞌ,
wnoꞌ nadꞌ yiyedꞌ gani goljꞌ,
gani lleꞌ beṉꞌ dialla c̱haꞌki.
Naꞌ wnoꞌ liꞌkzan gaklenoꞌ nadꞌ kwenc̱he gak wen c̱haꞌ.
10 Bi chidoḻꞌkzꞌ nadꞌ yeḻꞌ chiyeshꞌlallii c̱hoꞌnaꞌ naꞌ daa chap chwioꞌ nadꞌ kon ka bc̱heboꞌ gonoꞌ c̱haꞌ.
Nadꞌ ka wzaa wdiaꞌ yao Jordanni totgui yag bar c̱haꞌni nox̱aa,
naꞌ ṉaa zizaa ba napꞌ c̱hop kwen beṉꞌki.
11 Ben goklen bisla nadꞌ lo naꞌ beṉꞌ bishaa Esaúnaꞌ.
Ḻe chllebꞌ yidtiḻ-leneꞌ nadꞌ naꞌ witeꞌ noolki naꞌ biꞌdoꞌki.
12 Naꞌ liꞌ ba wnakzoꞌ nadꞌ wakzə wen c̱haꞌ,
naꞌ dia c̱haꞌkaꞌ gakgakeꞌ beṉꞌ zan inlleb ka yoxaꞌ daa chiꞌ choꞌa nisdoꞌnaꞌ daa kono chbabi.”
13 Naꞌ bigaaṉ Jacobaꞌ naꞌ do yel.
Naꞌ wlejeꞌ daa chzanileꞌ wiꞌe beṉꞌ bishee Esaúnaꞌ lawi daa napeꞌ.
14 Wlejeꞌ c̱hop guiyoa shib ba noolə,
naꞌ zi gaḻjə ba mash,
naꞌ c̱hop guiyoa xilꞌ ba noolə naꞌ zi gaḻjə ba mash,
15 naꞌ shichoa kamey ba noolə,
ba ziꞌ wxante,
len xiiṉdoꞌbkaꞌ,
c̱hoa bak,
naꞌ shi nobiy,
gaḻjə burr ba noolə naꞌ zi shi ba mash.
16 Naꞌ biꞌe tkwen wejb beṉꞌ wen llin c̱heꞌkaꞌ.
Naꞌ chiꞌe ḻegakeꞌ:
―Ḻi kwialo lawaꞌ,
naꞌ ḻi wḻaa ljwellgakb latꞌ wejə.
17 Beṉꞌ nechaꞌ beenaꞌ bseḻee,
naꞌ chiꞌeneꞌ:
―Katꞌ yillag beṉꞌ bishaa Esaúnaꞌ liꞌ,
naꞌ iṉabileꞌ liꞌ:
“¿No nak x̱anoꞌ?”
naꞌ “¿Gan shajoꞌ?”
naꞌ “¿No ba c̱heyi baki nlagoꞌ?”
18 Naꞌ yooneꞌ:
“Ba c̱hoꞌ baki,
x̱anꞌ Esaú.
Xmosoꞌ Jacobaꞌ bseḻeegakb.
Naꞌ ba zizaꞌkzeꞌ zidnoeꞌ netoꞌ.”
19 Ḻekzkaꞌ beṉꞌ wchopinaꞌ,
naꞌ beṉꞌ wyoṉinaꞌ,
naꞌ yogꞌ beṉꞌkaꞌ nḻag tkwen tkwen wejgakb,
chiꞌe ḻegakeꞌ:
―Ka yillagle Esaúnaꞌ,
toz ka yeꞌleneꞌ.
20 Naꞌ ḻekzkaꞌ yeꞌleneꞌ:
“Xmosoꞌ Jacobaꞌ ba zizee zidnoeꞌ netoꞌ.”
Jacobaꞌ biyiljlallee bseḻꞌgaxjeꞌ bayix̱ꞌdoꞌkaꞌ,
chakileꞌ:
“Shicholə kazə gonꞌ bich illee,
naꞌ ileꞌshiileꞌ nadꞌ ka yillagntoꞌ.”
21 Naꞌ ka gok bseḻꞌgaxjeꞌ bayix̱ꞌdoꞌkaꞌ bzanileꞌ,
naꞌ ḻeꞌ bgaaṉeꞌ naꞌzə lo lleꞌnaꞌ ganaꞌ cheneꞌ.
Jacobaꞌ chdiḻ-leneꞌ beenaꞌ chishaꞌ lieꞌnaꞌ
22 Lo yelaꞌ wyas Jacobaꞌ naꞌ bic̱hiꞌe c̱hopte xooleꞌkaꞌ naꞌ c̱hopte noolə wen llin c̱heꞌkaꞌ naꞌ biꞌ c̱heꞌkaꞌ shnej,
naꞌ bidieꞌ ḻegakeꞌ yawaꞌ le Jaboc,
23 len yogꞌḻoḻ diikaꞌ napeꞌ.
24 Ka bgaaṉ toz Jacobaꞌ,
naꞌ bllin to beṉꞌ wdiḻ-leneꞌ ḻeꞌ ax̱t ka wyeeniꞌ.
25 Naꞌ ka gokbeꞌi beenaꞌ bi choneꞌ Jacobaꞌ gan,
naꞌ beneꞌ begꞌ xaneꞌnaꞌ ziꞌ bdoljte llitaꞌ shlak chdiḻ-leneꞌneꞌ.
26 Naꞌ beenaꞌ chdiḻ-len Jacobaꞌ chiꞌe:
―Bsan nadꞌ,
ḻaꞌ ba cheeniꞌ.
Naꞌ cheꞌ Jacobaꞌ:
―Shi bi gonḻeeyoꞌ nadꞌ,
bi wsankzꞌ liꞌ.
27 Naꞌ wṉab beenaꞌ,
chiꞌe:
―¿Beran lioꞌ?
Naꞌ chiꞌeneꞌ:
―Jacobaꞌn liaꞌ.
28 Naꞌ cheꞌ beenaꞌ ḻeꞌ:
―Bich lioꞌ Jacob ṉaa,
san Israelan yilioꞌ ṉaa,
ḻaꞌ ba wdiḻ-lenoꞌ Chiozaꞌ,
naꞌ ba wdiḻ-lentioꞌ beṉꞌ,
naꞌ benoꞌ gan.
29 Naꞌ cheꞌ Jacobaꞌ ḻeꞌ:
―Wnashki liꞌ ṉaa,
bin lioꞌ.
Naꞌ cheꞌ beenaꞌ:
―¿Berac̱he cheenziloꞌ iṉeziloꞌ bin liaꞌ?
Naꞌ benḻeeyeꞌneꞌ naꞌtezə.
30 Naꞌ Jacobaꞌ bsiꞌe latjaꞌ Peniel,
ḻaꞌ wneꞌ:
“Ḻaꞌkzi ba bleꞌidꞌ choꞌalao Chiozaꞌ,
naꞌ ni mbankzꞌ.”