Jacobaꞌ zoeꞌ Haránnaꞌ
29
Naꞌ Jacobaꞌ zejcheꞌ ngwee nez daa zejə yell-lio daa de zaakli ganaꞌ chlaꞌlə wbillaꞌ.
2 Naꞌ lo zejə ngwee nezaꞌ naꞌ bleꞌileꞌ to bej,
naꞌ gaozə choꞌa bejaꞌ naꞌ lleꞌ shoṉə kwen xilꞌdoꞌ,
ḻaꞌ nanꞌ llia nisaꞌ cheejgakb.
Naꞌ choꞌa bejaꞌ xoan to yaj taa xen.
3 Naꞌ katꞌ chjaweejgakeꞌ xilꞌdoꞌkaꞌ nisaꞌ naꞌ chbezgakeꞌ ka ba billag yogꞌ kwen xilꞌkaꞌ naꞌ chikwasgakeꞌ yajaꞌ kaꞌlə kwenc̱he gak yeejgakb.
Naꞌ chiyoll cheejgakb nisaꞌ naꞌ chix̱oagakeꞌn dii yoblə.
4 Naꞌ wṉabi Jacobaꞌ ḻegakeꞌ,
chiꞌe:
―Leꞌ beṉꞌ bishꞌdawaa,
¿ga beṉꞌ leꞌ?
Naꞌ cheꞌgakeꞌ:
―Beṉꞌ Harán netoꞌ.
5 Naꞌ chiꞌe ḻegakeꞌ:
―¿Anombiaꞌle Labánnaꞌ,
xsoa Nacoraꞌ?
Naꞌ cheꞌgakeꞌ:
―Awe,
nombiantoꞌneꞌ.
6 Naꞌ chiꞌe ḻegakeꞌ:
―¿Azoeꞌ wen,
lla?
Naꞌ cheꞌgakeꞌ:
―Awe,
zoeꞌ wen.
Bwiakachi,
ni zaꞌ xiiṉeꞌ,
Raquelaꞌ,
nc̱heꞌbꞌ xilꞌdoꞌ c̱heꞌkaꞌ.
7 Naꞌ goll Jacobaꞌ:
―Ni byob ṉaa.
Aga ba goḻ lljasejle ḻegakb.
¿Abi wweejlegakb nisaꞌ,
naꞌ lljtapchleb?
8 Naꞌ cheꞌgakeꞌneꞌ:
―Bi gakan.
Chonan byen kwezntoꞌ yidop yogꞌḻoḻ xilꞌdoꞌkaꞌ len beṉꞌkaꞌ chapgakeꞌ ḻegakb kwenc̱he wkwasntoꞌ yajaꞌ xoa choꞌa bejaꞌ,
naꞌ gak yeejgakb nisaꞌ.
9 Shlak chshaljlen Jacobaꞌ ḻegakeꞌ,
bllin Raquelaꞌ nc̱heꞌbꞌ xilꞌdoꞌ c̱he x̱abaa,
ḻaꞌ ḻebanꞌ chapbꞌ ḻegakb.
10 Naꞌ ka bleꞌi Jacobaꞌ Raquelaꞌ chapbꞌ xilꞌdoꞌ c̱he x̱abꞌ Labánnaꞌ,
naꞌch zejeꞌ jakwaseꞌ yajaꞌ xoa choꞌa bejaꞌ.
Naꞌ bweejeꞌ xilꞌdoꞌ c̱he Labánnaꞌ,
beṉꞌ zan xṉeenaꞌ.
11 Naꞌ bwap Jacobaꞌ Raquelaꞌ chiox naꞌ bnopeꞌbꞌ naꞌ wzoloeꞌ chbelleꞌ.
12 Naꞌ beꞌlen Jacobaꞌ ḻebꞌ dillꞌ nan ḻenꞌ xiiṉ Rebécanaꞌ,
beṉꞌ zan Labánnaꞌ.
Naꞌ ziyajdo Raquelaꞌ jayellbꞌ x̱abaa kaꞌ.
13 Naꞌ ka beni Labánnaꞌ dillaa choeꞌ Raquelaꞌ c̱he Jacobaꞌ,
xiiṉ beṉꞌ zaneꞌnaꞌ,
naꞌ bchejdoeꞌ zjatiḻeꞌneꞌ naꞌ bwapeꞌneꞌ chiox wdeḻeꞌneꞌ naꞌ bnopeꞌneꞌ,
naꞌ bic̱hiꞌeneꞌ lilleꞌnaꞌ.
Naꞌ bseesi Jacobaꞌ Labánnaꞌ yogꞌḻoḻ ka gok c̱heꞌ.
14 Naꞌ Labánnaꞌ golleꞌneꞌ:
“Dii ḻicha liꞌ nakoꞌ cheniza c̱hentoꞌ.”
―Aga ni c̱he nakoꞌ xiiṉ c̱hentoꞌ naꞌ iṉoꞌ bibi laxjoꞌ siꞌ.
Wna kaꞌkꞌ cheeniloꞌ c̱hixjꞌ liꞌ.
16 Naꞌ zoa c̱hop xiiṉ Labánnaꞌ,
biꞌ noolə.
Biꞌ nechaꞌ lebꞌ Lea,
naꞌ biꞌ neshaa lebꞌ Raquel.
17 Naꞌ biꞌnaꞌ le Lea nakbꞌ jalao xochi naꞌ Raquelaꞌ naktechlbꞌ xochich.
18 Naꞌ Jacobaꞌ wyoolallee Raquelaꞌ,
naꞌ chiꞌe:
―Gonꞌ xshinoꞌnaꞌ gall yiz shi goṉoꞌ Raquelaꞌ,
xiiṉoꞌ biꞌ neshaa,
ikaa.
19 Naꞌ Labánnaꞌ chiꞌe:
―Wenkzan ikoobꞌ liꞌ aga ka daa wiaꞌbꞌ beṉꞌ yoblə.
Naꞌ ṉaa igaaṉlenoꞌ nadꞌ.
20 Naꞌ kaꞌ gok ben Jacobaꞌ llinnaꞌ gall yiz,
naꞌ gokileꞌ latꞌchganaꞌ daa ḻe chakileꞌ Raquelaꞌ.
21 Ka gok gall yiz,
naꞌ cheꞌ Jacobaꞌ Labánnaꞌ:
―Goṉoꞌ nool c̱haꞌnaꞌ ṉaa ikaaneꞌ,
ḻaꞌ ba bzaa yiz c̱haꞌnaꞌ daa wṉiaꞌ kaꞌ.
22 Naꞌch Labánnaꞌ btopeꞌ yogꞌḻoḻ beṉꞌ wlill c̱heꞌnaꞌ naꞌ beneꞌ to lṉi.
23 Naꞌ ka gol,
naꞌ beꞌ Labánnaꞌ xiiṉe Léanaꞌ Jacobaꞌ naꞌ bigaaṉleneꞌbꞌ.
24 Naꞌ Labánnaꞌ biꞌe sto noolə goneꞌ xshin Léanaꞌ,
naꞌ lieꞌ Zilpa.
25 Naꞌ betiyo,
ka wyeeniꞌ,
Jacobaꞌ gokbeꞌileꞌ Léanaꞌlan wkee.
Naꞌ jeꞌleneꞌ Labánnaꞌ dillꞌ,
chiꞌeneꞌ:
―¿Berac̱he benziloꞌ nadꞌ kaꞌ?
¿Agaga beꞌcho dillꞌ ni c̱he Raquelanꞌ gonꞌ llinnaꞌ?
Naꞌ ¿berac̱he wxiyeꞌzoꞌ nadꞌ?
26 Naꞌ Labánnaꞌ billiꞌe xtilleenaꞌ,
chiꞌeneꞌ:
―Bi yoolontoꞌ ni wshagnaꞌ biꞌ neshaa zigaate ka biꞌ nechaꞌ.
27 Benkz liꞌ lṉinaꞌ to xman daa ba wkoo biꞌni shkaꞌ.
Naꞌ goṉꞌ biꞌnaꞌ sto ka yiyoll lṉinaꞌ,
kon shi wc̱heboꞌ gonoꞌ xshinꞌnaꞌ zi gall yiz.
28 Naꞌ bc̱heb Jacobaꞌ.
Naꞌ ka biyoll xmannaꞌ,
Labánnaꞌ biꞌe Raquelaꞌ gokbꞌ nool c̱heꞌ.
29 Naꞌ ḻekzkaꞌ beꞌ Labánnaꞌ to noolə goneꞌ xshin Raquelaꞌ,
naꞌ lieꞌ Bilha.
30 Naꞌ Jacobaꞌ wkee Raquelaꞌ naꞌ gokchileꞌneꞌ aga ka Léanaꞌ.
Naꞌ beneꞌ xshin Labánnaꞌ zi gall yiz.
Xiiṉ Jacobaꞌ
31 Naꞌ chwia X̱ancho Chiozaꞌ Jacobaꞌ bi choolallꞌyeṉeꞌ Léanaꞌ,
naꞌ gokleneꞌ ḻeꞌ wzoa xiiṉeꞌ.
Naꞌ Raquelaꞌ gokeꞌ noolə will.
32 Naꞌ biaꞌ Léanaꞌ to bdoꞌ naꞌ wxaneꞌ to biꞌ byodoꞌ,
naꞌ wneꞌ:
“Ba bleꞌi Chiozaꞌ ka chak c̱haꞌ.
Naꞌ ṉaa gakchi beṉꞌ c̱haꞌni nadꞌ.”
Daan bsiꞌebꞌ Rubén.
33 Naꞌ biyoꞌe sto shii,
naꞌ wxaneꞌ sto biꞌ byodoꞌnaꞌ,
naꞌ wneꞌ:
“Daa ba bzenag Chiozaꞌ ka chak c̱haꞌ,
naꞌ ba beneꞌ sto biꞌ c̱haꞌ.”
Daan bsiꞌebꞌ Simeón.
34 Naꞌ biyoꞌe sto shii,
naꞌ wxaneꞌ sto biꞌ byodoꞌ,
naꞌ wneꞌ:
“Ṉaach gakchi beṉꞌ c̱haꞌni nadꞌ daa ba nak shoṉ biꞌ c̱hentoꞌki.”
Daan bsiꞌebꞌ Leví.
35 Naꞌ biyoꞌe sto,
naꞌ wxaneꞌ stokzə biꞌ byodoꞌ,
naꞌ wneꞌ:
“Ṉaa weꞌlaꞌochꞌ Chiozaꞌ.”
Daan bsiꞌebꞌ Judá.
Naꞌ wlezan shloll bich wzoa xiiṉeꞌ.