Génesis 23

Chet Sáranaꞌ

Sáranaꞌ wbaneꞌ x̱oplalj gall yiz.

2 Naꞌ witeꞌ ganaꞌ le Quiriat-arba,

naꞌ ḻekzkaꞌ len Hebrón,

daa llia ganaꞌ mbani Canaánnaꞌ.

Naꞌ Abrahamaꞌ wcheꞌleneꞌneꞌ shlak [*]xoa neteꞌ naꞌ wchellileꞌneꞌ.

3 Naꞌ bichejeꞌ ganaꞌ de beṉꞌ wetaꞌ naꞌ wṉieꞌ beṉꞌkaꞌ zoa naꞌ,

beṉꞌkaꞌ nak xiiṉ dia c̱he Hetaꞌ,

naꞌ bshaljleneꞌ ḻegakeꞌ,

chiꞌe:

4 ―Ḻaꞌkzi nakꞌ beṉꞌ zitꞌ ladjleni,

ḻi witꞌ latꞌ yell-lio ganaꞌ gak wkwashaa nool c̱haꞌni.

5 Naꞌ xiiṉ dia c̱he Hetaꞌ billiigakeꞌ xtilleenaꞌ,

gollgakeꞌneꞌ:

6 ―Ben goklen beṉꞌdoꞌ,

bzenag dga iṉantoꞌ liꞌ.

Liꞌ nakoꞌ ladjntoꞌni to beṉꞌ zakii.

Wak wkwashoo nool c̱hoꞌnaꞌ kon ga cheeniloꞌ.

Wdilj ganaꞌ ḻiizelozi nak mbalaz,

ni to kono wllonan.

7 Naꞌch Abrahamaꞌ wzollee naꞌ bc̱hekꞌ yic̱hjeꞌnaꞌ lao xiiṉ dia c̱he Hetaꞌ.

8 Naꞌ golleꞌ ḻegakeꞌ:

―Shi lekzile cheenile wkwashaa nool c̱haꞌnaꞌ ni,

ḻi gon goklen iṉabile Efrónni xiiṉ Zoharaꞌ

9 shi witee blejaꞌ ze choꞌa yell-lio c̱heꞌnaꞌ daa zoa ganaꞌ le Macpela.

Naꞌ c̱hixjkzaꞌn kaꞌkꞌtezə iṉabeꞌn naꞌ gakin c̱haꞌ.

10 Naꞌ ladj beṉꞌkaꞌ chiꞌ Efrónnaꞌ,

beenaꞌ ḻekzkaꞌ gokeꞌ xiiṉ dia c̱he Hetaꞌ,

naꞌ beni yogꞌ beṉꞌkaꞌ lleꞌ choꞌa yellaꞌ ka golleꞌ Abrahamaꞌ:

11 ―Bi iṉoꞌ kaꞌ,

beṉꞌdoꞌ.

Nadꞌ goṉꞌ liꞌ yell-lionaꞌ kaꞌzə naꞌ blejaꞌ daa ze lawinnaꞌ.

Beṉꞌ wlall c̱haꞌki chengakileꞌ choṉaꞌn liꞌ.

Bkwashꞌ nool c̱hoꞌnaꞌ naꞌ.

12 Naꞌ Abrahamaꞌ bc̱hekꞌ yic̱hjeꞌnaꞌ sto shii lao beṉꞌkaꞌ lleꞌ naꞌ,

13 naꞌ golleꞌ Efrónnaꞌ lao yogꞌḻoḻ beṉꞌkaꞌ lleꞌ naꞌ:

―Ben goklen bzenag,

wkaagach mech c̱he yell-lionaꞌ naꞌ techlə wkwashaa nool c̱haꞌnaꞌ.

14 Naꞌch Efrónnaꞌ chiꞌe Abrahamaꞌ:

15 ―Bzenaggach c̱haꞌ,

beṉꞌdoꞌ.

Yell-lionaꞌ zakaan tap guiyoa mech plat.

Naꞌ aga ni c̱he daazə gakguedcho.

Jakwashꞌgach nool c̱hoꞌnaꞌ naꞌ.

16 Naꞌ Abrahamaꞌ bc̱hebeꞌ c̱hixjeꞌ ka to daa wṉabi Efrónnaꞌ ḻeꞌ lao beṉꞌ wlall c̱heꞌkaꞌ,

beṉꞌkaꞌ nak xiiṉ dia c̱he Hetaꞌ.

Naꞌ wdixjeꞌn kon ka chiyaḻꞌ gaxjan.

17 Naꞌ yell-lio c̱he Efrónnaꞌ daa de Macpélanaꞌ,

daa llia ganaꞌ le Mamré,

ka yell-lio,

ka blej naꞌ ka yagkaꞌ lleꞌ lawinnaꞌ,

18 gokan ḻoo naꞌ Abrahamaꞌ.

Naꞌ yogꞌ beṉꞌkaꞌ nak xiiṉ dia c̱he Hetaꞌ naꞌ beṉꞌkaꞌ chaj chde choꞌa yellaꞌ wṉezgakileꞌn.

19 Naꞌtechlə,

Abrahamaꞌ bkwashee nool c̱heꞌnaꞌ ḻoo blejaꞌ daa ze lo yell-lio c̱he Macpélanaꞌ daa de shḻaalə Mamrénaꞌ ka de ganaꞌ chlaꞌlə wbillaꞌ,

naꞌ ḻekzkaꞌ nsiꞌgakeꞌn Hebrón,

yell-lio c̱he Canaánnaꞌ.

20 Naꞌ gok lallꞌ naꞌ Abrahamaꞌ yell-lionaꞌ,

naꞌ blejaꞌ,

daa betꞌ xiiṉ dia c̱he Hetaꞌ kwenc̱he bkwashee nool c̱heꞌnaꞌ.