19
Ka ba chzeḻes yelaꞌ,
bllin c̱hop anjl choꞌa yell Sodómanaꞌ,
naꞌ chiꞌ Lotaꞌ choꞌa yellaꞌ ganaꞌ chdop chllag beṉꞌ.
Ka bleꞌileꞌ beṉꞌki naꞌ wzollee jatiḻeꞌ ḻegakeꞌ naꞌ bc̱hekꞌ xibeꞌnaꞌ laweꞌkaꞌ naꞌ ax̱t lo yonaꞌ bllin loxgueꞌnaꞌ,
2 naꞌ golleꞌ ḻegakeꞌ:
―Leꞌ beṉꞌdoꞌ,
chṉabidꞌ leꞌ sheḻꞌkaꞌ saꞌle lillaa naꞌ de latj ga yigaaṉle ṉaanyel.
Naꞌ de nis c̱hibi ṉiꞌalekaꞌ naꞌ wx̱e zil yigoole nez.
Naꞌ gollgakeꞌneꞌ:
―Chox̱kenoꞌ noꞌ kaꞌ,
do nizə teyi netoꞌ yel.
3 Naꞌ Lotaꞌ gotꞌyoileꞌ ḻegakeꞌ naꞌ bc̱hebgakeꞌ shajlengakeꞌneꞌ lilleꞌnaꞌ.
Ka bllingakeꞌ,
Lotaꞌ bsiꞌniꞌe xsheꞌnaꞌ naꞌ beneꞌ yetxtil dii bi len levadúranaꞌ,
naꞌ biꞌen beṉꞌkaꞌ wdaogakeꞌn.
4 Naꞌ ka ba zoa gatꞌgakeꞌ,
yogꞌḻoḻ beṉꞌ yell Sodómanaꞌ,
beṉꞌ byokaꞌ,
ba nec̱hjgakeꞌ lill Lotaꞌ,
ka biꞌ wewꞌ naꞌ ka beṉꞌ golə.
5 Naꞌ wṉegakeꞌ Lotaꞌ,
chosyaagakeꞌ,
cheꞌgakeꞌ:
―¿Gaṉ beṉꞌkaꞌ blaꞌ lillooni ṉaanlleꞌ?
¡Wlejgakeꞌ nilə!
¡Cheenintoꞌ gatꞌntoꞌ kwiteꞌkaꞌ!
6 Naꞌ Lotaꞌ bchejeꞌ choꞌa yoonaꞌ,
naꞌ beꞌleneꞌ beṉꞌkaꞌ dillꞌ naꞌ bsejtipeꞌ choꞌa yoonaꞌ ka bchejeꞌ.
7 Naꞌ golleꞌ ḻegakeꞌ:
―Leꞌ beṉꞌ bishꞌdawaa,
chṉabidꞌ leꞌ bibi mal gongachile ḻegakeꞌ.
8 Nadꞌ napꞌ c̱hop biꞌ noolə wewꞌ naꞌ biṉꞌ soalengakbꞌ beṉꞌ byo.
Naꞌ goṉgakꞌbꞌ gonilegakbꞌ kon bi cheenile.
Naꞌ bibi gongachile beṉꞌki blaꞌ lillaꞌni ṉaanlleꞌ.
9 Naꞌ beṉꞌkaꞌ gollgakeꞌ:
―¡Kwas kaꞌlə!
Aga nakoꞌ liꞌ beṉꞌ wlall c̱hentoꞌ,
¿anti cheeniloꞌ iṉabiꞌo netonꞌ?
¡Naꞌ ṉaa ziꞌchlə gonintoꞌ liꞌ aga ka beṉꞌki blaꞌ lilloꞌni!
Naꞌ wzologakeꞌ chlligꞌx̱ax̱jgakeꞌ Lotaꞌ naꞌ wbigꞌgakeꞌ choꞌa yoonaꞌ nan wc̱hinjgakenꞌ.
10 Naꞌ beṉꞌkaꞌ bllin lill Lotaꞌ bigoyogakeꞌneꞌ ḻoo yoonaꞌlə naꞌ bisejgakeꞌ choꞌa yoonaꞌ.
11 Naꞌ bc̱hoḻgakeꞌ beṉꞌkaꞌ bgaaṉ choꞌa yoonaꞌ,
ka biꞌ wewꞌ naꞌ ka beṉꞌ golə.
Naꞌ bich billelgakileꞌ ganaꞌ zoa choꞌa yoonaꞌ.
12 Naꞌ gollgakeꞌ Lotaꞌ:
―¿Azoach bishꞌ ljwelloꞌ yelli?
Bc̱heꞌ xiiṉoꞌki c̱hop,
naꞌ beṉꞌkaꞌ gak xoolloo,
naꞌ yogꞌ beṉꞌ nllaguiloꞌ,
wlejgakeꞌ yelli.
13 Ḻaꞌ wlliayiꞌntoꞌ yelli,
daa ba wyante saaxya c̱he beṉꞌki lao Chiozaꞌ.
Naꞌchan ba bseḻee netoꞌ kwenc̱he wlliayiꞌntoꞌn.
14 Naꞌ Lotaꞌ wyajeꞌ jawieꞌ beṉꞌkaꞌ gak xoollee,
naꞌ golleꞌ ḻegakeꞌ:
―¡Ḻi shoo,
ḻi ichej ni,
ḻaꞌ Chiozaꞌ wlliayee yelli!
―Btalalloo bchej ni.
Bc̱heꞌ nool c̱hoꞌni naꞌ biꞌ noolə c̱hoꞌki c̱hop kwenc̱he bi kwiayiꞌlenle beṉꞌki lleꞌ yelli.
16 Naꞌ bikzə chta lallꞌ Lotaꞌ,
naꞌ daa chiyeshꞌlalli Chiozaꞌ ḻegakeꞌ,
naꞌ anjlkaꞌ wdoyogakeꞌ neenaꞌ,
len xooleꞌnaꞌ,
naꞌ len xiiṉeꞌkaꞌ zi c̱hop,
wlejgakeꞌ ḻegakeꞌ yellaꞌ kwenc̱he bi kwiayiꞌgakeꞌ.
17 Naꞌ ka ba wlejgakeꞌ ḻegakeꞌ yellaꞌ,
naꞌ to anjlaꞌ chiꞌe ḻeꞌ:
―Wyaj ṉaa,
bisla yeḻꞌ mban c̱hoꞌnaꞌ;
bi yiyec̱hjoꞌ naꞌ bi shailoꞌ leshii.
Wyajdo ga nak yaa yao shi cheeniloꞌ yisla yeḻꞌ mban c̱hoꞌnaꞌ.
18 Naꞌ Lotaꞌ chiꞌe:
―Bilja gakan,
leꞌ beṉꞌdoꞌ.
19 Leꞌ ba goklenle nadꞌ dii xen wal ba biyeshile nadꞌ bislale yeḻꞌ mban c̱haꞌni.
Per bilja gak shaꞌ yaa yawaꞌ,
shera shi dga chak yidoḻiin nadꞌ tnezaꞌ naꞌ dekzi de guetꞌ.
20 Gaozə ni llia to yelldoꞌ ga gak shaꞌ,
sheḻꞌ weꞌle latj shaꞌ naꞌ,
kwenc̱he yisla yeḻꞌ mban c̱haꞌni.
21 Naꞌ anjlaꞌ golleꞌneꞌ:
―Wakzə shajoꞌ ganaꞌ noꞌ kaꞌ,
naꞌ bi wlliayaa yellaꞌ.
22 ¡Bta lalloo shkaꞌ wyajze!,
ḻaꞌ aga bi gak gonꞌ shi biṉꞌ illinoꞌ naꞌ.
Daan bsiꞌgakeꞌ yellaꞌ Zoar naꞌ zejin yelldoꞌzə.
23 Ba zaꞌ x̱en wbillaꞌ ka bllin Lotaꞌ yell Zoaraꞌ.
24 Naꞌ Chiozaꞌ beneꞌ ka ga chak yej,
bḻetjeꞌ yiꞌ naꞌ nc̱hix̱an azúfrenaꞌ daa bzey bten yell Sodómanaꞌ naꞌ Gomórranaꞌ.
25 Naꞌ blliayee yellkaꞌ naꞌ yogꞌḻoḻ beṉꞌkaꞌ lleꞌ naꞌ,
naꞌ yogꞌḻoḻ dii chashj chḻeb doxen leshaa.
26 Naꞌ nool c̱he Lotaꞌ noeꞌneꞌ naꞌ biyec̱hjeꞌ bwieꞌ yell Sodómanaꞌ,
naꞌ ḻegatega bgaaṉeꞌ naꞌ biyakeꞌ to beṉꞌ de yaj zedꞌ.
27 Naꞌ betiyo shzilaꞌ wyaj Abrahamaꞌ ganaꞌ bshaljleneꞌ Chiozaꞌ,
28 naꞌ bwieꞌ Sodómanaꞌ naꞌ Gomórranaꞌ naꞌ doxen leshaa,
naꞌ bleꞌileꞌ chic̱hoḻ llennaꞌ chiyasan ka llen c̱he gorn.
29 Kaꞌ gok blliayiꞌ Chiozaꞌ yellkaꞌ naꞌ leshaa ganaꞌ wzoa Lotaꞌ,
naꞌ daa yoo yic̱hj Chiozaꞌ Abrahamaꞌ bibejeꞌ Lotaꞌ latjaꞌ ganaꞌ blliayee.
Ki gok wxe beṉꞌ moabkaꞌ naꞌ beṉꞌ amonítakaꞌ
30 Naꞌ blleb Lotaꞌ yigaaṉeꞌ yell Zoaraꞌ,
naꞌ wzee zejeꞌ ganaꞌ nak yaa yao len biꞌ c̱heꞌkaꞌ c̱hop,
naꞌ jsoagakeꞌ to ga ze blej.
31 Naꞌ xiiṉeꞌ biꞌ nechaꞌ gollbꞌ biꞌ neshaa:
―X̱acho ni ba nakeꞌ beṉꞌ gol naꞌ gani zoacho aga noch no beṉꞌ byo zoa kwenc̱he ikee choꞌ naꞌ soa xiiṉcho kon ka chak yell-lioni.
32 Ṉaa wsollichoneꞌ naꞌ gatꞌcho kwiteꞌnaꞌ kwenc̱he soa xiiṉcho naꞌ bi yinit dia c̱heꞌnaꞌ.
33 Naꞌ lo lleꞌnaꞌ bweejgakbꞌ ḻeꞌ kwenc̱he wzollileꞌ naꞌ biꞌ nechaꞌ gotbꞌ kwit x̱abaa,
naꞌ bi gokbeꞌileꞌ ka gotbꞌ kwiteꞌnaꞌ ni bi gokbeꞌileꞌ ka biyasbꞌ.
34 Naꞌ betiyo,
biꞌ nechaꞌ cheꞌbꞌ biꞌ neshaa:
―Daa nlleyiꞌ gotaa kwit x̱achonaꞌ;
naꞌ ṉaanlleꞌ ḻekzkaꞌ wsollichoneꞌ kwenc̱he gatoo kwiteꞌnaꞌ,
naꞌ c̱hoptecho soa xiiṉcho len ḻeꞌ kwenc̱he bi yinit dia c̱heꞌnaꞌ.
35 Naꞌ lo lleꞌnaꞌ beꞌgakbꞌ daa weej x̱abꞌkaꞌ naꞌ biꞌ neshaa gotbꞌ kwiteꞌnaꞌ.
Naꞌ ḻekzkaꞌ bi gokbeꞌileꞌ ka gotbꞌ kwiteꞌnaꞌ ni ka biyasbꞌ.
36 Naꞌ c̱hopte biꞌ noolkaꞌ biaꞌgakbꞌ xiiṉ x̱abꞌkaꞌ.
37 Naꞌ biꞌ nechaꞌ wxamꞌ to biꞌ byo naꞌ bsiꞌbꞌ ḻebꞌ Moab,
naꞌ gokbꞌ x̱a beṉꞌ Moabkaꞌ nombiaꞌcho ṉaa.
38 Naꞌ ḻekzkaꞌ biꞌ neshaa wzoa to xiiṉbꞌ naꞌ bsiꞌbꞌ ḻebꞌ Ben-ammi,
naꞌ gokbꞌ x̱a amonítakaꞌ nombiaꞌcho ṉaa.