Génesis 18

Chiozaꞌ chc̱hebeꞌ wiꞌe to xiiṉ Abrahamaꞌ

X̱ancho Chiozaꞌ bliꞌlaweꞌ Abrahamaꞌ ganaꞌ lleꞌ yag zilljkaꞌ c̱he Mamrénaꞌ shlak chiꞌe choꞌa lilleꞌnaꞌ do ka gobill.

2 Ka bḻis yic̱hj Abrahamaꞌ naꞌ bleꞌileꞌ ze shoṉə beṉꞌ gaozə ganaꞌ chiꞌe.

Ka bleꞌileꞌ ḻegakeꞌ chakz ki chak wzollee jawapeꞌ ḻegakeꞌ chiox,

naꞌ bc̱hekꞌ xibeꞌnaꞌ laweꞌkaꞌ naꞌ ax̱t lo yonaꞌ bllin loxgueꞌnaꞌ,

3 naꞌ golleꞌ:

―Beṉꞌdoꞌ,

chatꞌyoidꞌ liꞌ gongachoꞌ goklen yigaaṉoꞌ shloll,

bi yiyajzioꞌ.

* Zoaꞌ xlatjin gonꞌ kon bi iṉoꞌ nadꞌ.

4 Iṉablatchꞌ nis c̱hibi ṉiꞌalekaꞌ naꞌ yiyollaꞌ yiziꞌlallꞌle shloll xan yag xolaꞌ.

5 Shategali ba wdele gani zoaꞌ lljx̱ichꞌ(iꞌ*) latꞌ dii gaole kwenc̱he ba biyakshaoꞌlallꞌle ka yigoole nez.

Naꞌ ḻegakeꞌ cheꞌgakeꞌ:

―Wakkzan shkaꞌ.

6 Naꞌ biyoodo Abrahamaꞌ ḻoo lilleꞌnaꞌ naꞌ golleꞌ Sáranaꞌ:

―Bta lalloo wdoyo to gush yezjaꞌ naꞌ bzeedaan naꞌ ben yetxtilkaꞌ.

7 Naꞌ zejdo Abrahamaꞌ ganaꞌ lleꞌ gooṉkaꞌ,

naꞌ wdoyoeꞌ to meꞌdoꞌ badoꞌ ḻe nak,

naꞌ biꞌeb beṉꞌ wen llin c̱heꞌnaꞌ naꞌ lii benshaoꞌtieꞌb kwenc̱he wdaogakeꞌb.

8 Ka biyoll bllieꞌ yeḻꞌ wawaꞌ daa bengakeꞌ naꞌ jtoyoꞌe xillꞌ gooṉ daa ba bsiꞌe yeejgakeꞌ.

Naꞌ wzieꞌ wṉeyi shi bi chyalljch shlak chiꞌ beṉꞌkaꞌ chaogakeꞌ xan yagaꞌ.

9 Naꞌ ka biyoll wdaogakeꞌ,

cheꞌgakeꞌ Abrahamaꞌ:

―¿Gaṉ nool choꞌ Sáranaꞌ?

Naꞌ chiꞌe ḻegakeꞌ:

―Zete ḻoo yoonaꞌ. ^a

10 Naꞌch beenaꞌ to chiꞌe:

―Yizaꞌ daa zaꞌ sto yidwiaꞌ liꞌ naꞌ kanaꞌyeṉꞌ san nool c̱hoꞌ Sáranaꞌ to biꞌ byo c̱hoꞌ.

Shlak ka chshaljgakeꞌ Sáranaꞌ zieꞌ chzenagueꞌ ganaꞌ yoꞌe.

11 Abrahamaꞌ naꞌ Sáranaꞌ ba nakgakeꞌ beṉꞌ goldoꞌ naꞌ Sáranaꞌ bich noneꞌ lez soa xiiṉeꞌ.

12 Naꞌ bxill Sáranaꞌ,

chakileꞌ:

“¿Awibachzidꞌ soa biꞌ c̱haꞌ ṉaa ba nakꞌ beṉꞌ gol naꞌ ḻekzkaꞌ beṉꞌ c̱haꞌnaꞌ ba nakeꞌ beṉꞌ gol?”

13 Naꞌ Chiozaꞌ golleꞌ Abrahamaꞌ:

―¿Berac̱he chxillzə Sáranaꞌ?

¿Abi chajḻiꞌe soa biꞌ c̱heꞌ ḻaꞌkzi ba nakeꞌ beṉꞌ gol?

14 ¿Ade dii nak dii lallj c̱he Chiozaꞌ dii bi gak goneꞌ?

Yizaꞌ daa zaꞌ sto yidwiaꞌ liꞌ,

naꞌ kanaꞌ Sáranaꞌ saneꞌ to biꞌ byodoꞌ.

15 Naꞌ Sáranaꞌ bllebeꞌ naꞌ bi bc̱hebeꞌ nan bxilleꞌn,

naꞌ chiꞌe:

―Aga bxillaꞌn.

Naꞌ chiꞌeneꞌ:

―Nazoꞌn,

bxillkzoꞌn.

Abrahamaꞌ chṉabileꞌ Chiozaꞌ ni c̱he yell Sodómanaꞌ

16 Naꞌ bizollaꞌ beṉꞌkaꞌ naꞌ zjayaakeꞌ Sodómanaꞌlə,

naꞌ bigoo Abrahamaꞌ ḻegakeꞌ nezaꞌ.

17 Naꞌ wna Chiozaꞌ:

“Chiyaḻꞌ wzenidꞌ Abrahami daa gonꞌ.

18 Ḻaꞌ ḻeꞌ gakeꞌ x̱axṉaꞌ to yell xen yell wal,

naꞌ ni c̱heꞌ gonꞌ dii wen c̱he yogꞌḻoḻ beṉꞌ lleꞌ doxen zbii zkaaṉ yell-lioni.

19 Ḻaꞌ nadꞌ ba wlejee kwenc̱he kwee xiiṉeꞌkaꞌ naꞌ xiiṉ dia c̱heꞌkaꞌ lo x̱nezaa.

Naꞌch gongakeꞌ dii wen dii shaoꞌ naꞌ dii nak shḻi kwenc̱he gonꞌ c̱he Abrahami ka ba bc̱hebꞌ.”

20 Naꞌ Chiozaꞌ golleꞌ Abrahamaꞌ:

―Beṉꞌ Sodómakaꞌ naꞌ beṉꞌ Gomórrakaꞌ zechgayi c̱hegakeꞌ chx̱iṉj chḻengakeꞌ ga wde lawin.

21 Naꞌ ṉaa shaꞌ lljawiaꞌ shi dii ḻikzan chongakeꞌ ka na beṉꞌkaꞌ,

kwenc̱he iṉezidꞌ shi nakan kaꞌ.

22 Naꞌ bizaꞌ beṉꞌkaꞌ c̱hop zejgakeꞌ Sodómanaꞌlə naꞌ Abrahamaꞌ ni zieꞌ lao Chiozaꞌ.

23 Naꞌ wbigꞌ Abrahamaꞌ laweꞌnaꞌ golleꞌneꞌ:

―¿Alen beṉꞌ ḻi beṉꞌ shaoꞌkaꞌ wlliayiꞌlenoꞌ beṉꞌ malkaꞌ?

24 Shi zoa shiyon beṉꞌ nak beṉꞌ ḻi beṉꞌ shaoꞌ yellaꞌ,

¿aḻaꞌkzi kaꞌ wlliayikzoꞌ yellaꞌ?

¿Abi yiziꞌxenoꞌ daa lleꞌ beṉꞌkaꞌ shiyon?

25 Bi gaktekan wlliayiꞌlenoꞌ beṉꞌ ḻi beṉꞌ shaoꞌkaꞌ kon beṉꞌkaꞌ bi chon wen.

Ḻaꞌ aga toz ka nak daa gonoꞌ c̱he beṉꞌ wennaꞌ naꞌ c̱he beṉꞌ malaꞌ.

¡Bat gonoꞌ kaꞌ!

Liꞌ chc̱hogbiꞌo c̱he yogꞌ beṉꞌ yell-lioni,

wak wkwaaṉshaoꞌgachoꞌ dga.

26 Naꞌ Chiozaꞌ golleꞌneꞌ:

―Shi ba bchej shiyon beṉꞌ choneꞌ wen yell Sodómanaꞌ,

naꞌ yiziꞌxen c̱he yogꞌḻoḻ beṉꞌkaꞌ lleꞌ naꞌ ni c̱he beṉꞌkaꞌ shiyon.

27 Naꞌ Abrahamaꞌ golleꞌneꞌ sto shii:

―Wxiꞌxen c̱haꞌ ka dillꞌki iṉiaꞌ liꞌ,

ḻaꞌ liꞌ nakoꞌ Chios,

naꞌ nadꞌ nakꞌ beṉꞌ bishte yell-liochozə.

28 Shera shi lleꞌ gayiyonga beṉꞌ wenkaꞌ,

¿awlliayiꞌkzoꞌ yellaꞌ daa chyallj beṉꞌkaꞌ zi gayꞌ?

Naꞌ Chiozaꞌ golleꞌneꞌ:

―Shi ba gokeꞌ gayiꞌyon naꞌ bi wlliayaa yellaꞌ.

29 Naꞌ goll Abrahamaꞌneꞌ sto shii:

―¿Shera shi c̱hoachga beṉꞌ wenkaꞌ lleꞌ?

Naꞌ golleꞌneꞌ:

―Bi wlliayaa yellaꞌ daa lleꞌ beṉꞌkaꞌ c̱hoa.

30 Naꞌ Abrahamaꞌ golleꞌneꞌ sto shii:

―Chṉabidꞌ liꞌ bi illoo nadꞌ daa chonidꞌ liꞌ zed.

¿Shera shi shichoachga beṉꞌ wenkaꞌ lleꞌ?

Naꞌ Chiozaꞌ golleꞌneꞌ:

―Ḻekzkaꞌ bi wlliayaa yellaꞌ daa lleꞌ beṉꞌkaꞌ shichoa.

31 Abrahamaꞌ wzeyidcheꞌ chiꞌe:

―Chios c̱haꞌ,

ziꞌtelə beṉꞌ lallꞌ chog wal chonꞌ niaꞌ liꞌ,

¿nakra gak shi galjchga beṉꞌ wenkaꞌ lleꞌ?

Naꞌ Chiozaꞌ golleꞌneꞌ:

―Daa lleꞌ beṉꞌkaꞌ gaḻjə naꞌ bi wlliayaa yellaꞌ.

32 Naꞌ ni zeyidch Abrahamaꞌ,

chiꞌe:

―Ben goklen,

Chios c̱haꞌ,

bi gakzediloꞌ nadꞌ dga zeelo iṉiaꞌ liꞌ,

naꞌ bich gonidꞌ liꞌ zed.

¿Nakra ka gonoꞌn shi zeelo shichga beṉꞌ wenkaꞌ lleꞌ naꞌ?

Naꞌ Chiozaꞌ golleꞌneꞌ:

―Shi lleꞌ beṉꞌkaꞌ shi naꞌ bi wlliayaa yellaꞌ.

33 Ka biyoll bshaljlen Chiozaꞌ Abrahamaꞌ naꞌ bizee,

naꞌ Abrahamaꞌ ziyajeꞌ lill xḻatjeꞌnaꞌlə.