Génesis 17

Seṉ daa le circuncisión

Ka goki Abramaꞌ taplalj twalj yiz bliꞌlao Chiozaꞌ ḻeꞌ,

naꞌ golleꞌneꞌ:

―Nadꞌ nakꞌ Chios,

beṉꞌ yeḻꞌ wak choo beṉꞌ yeḻꞌ wak xen,

naꞌ gok to beṉꞌ ḻi beṉꞌ shaoꞌ lawaꞌni.

2 Naꞌ chc̱hebꞌ gonꞌ wen c̱hoꞌ naꞌ gonꞌ ka shesh shan xiiṉ dia c̱hoꞌkaꞌ.

3 Naꞌ Abramaꞌ bc̱hekꞌ xibeꞌnaꞌ,

naꞌ ax̱t lo yonaꞌ bllin loxgueꞌnaꞌ,

naꞌ cheꞌ Chiozaꞌ ḻeꞌ:

4 ―Dga chc̱hebꞌ gonꞌ c̱hoꞌ:

Gakoꞌ liꞌ x̱axṉaꞌ beṉꞌ zan inlleb.

5 Naꞌ bich wsiꞌ beṉꞌ liꞌ Abram,

san ṉaa yisiꞌgakeꞌ liꞌ Abraham daa ba nzoaꞌ liꞌ gakoꞌ x̱axṉaꞌ beṉꞌ zan inlleb.

6 Nadꞌ gonꞌ ka shesh shan xiiṉ dia c̱hoꞌkaꞌ naꞌ ladjeꞌkaꞌ ichej no beṉꞌ wṉabiaꞌ naꞌ ichej yell zan.

7 Naꞌ dga chc̱hebꞌ gonꞌ c̱hoꞌ naꞌ c̱he xiiṉ dia c̱hoꞌkaꞌ ziꞌ zaak:

nadꞌ nakꞌ Chios c̱hoꞌ naꞌ Chios c̱he xiiṉ dia c̱hoꞌkaꞌ ziꞌ zaak,

naꞌ soalenꞌ leꞌ zejḻi kaṉi.

8 Liꞌ naꞌ xiiṉ dia c̱hoꞌkaꞌ,

goṉꞌ leꞌ doxen yell-lio Canaánni gani zoꞌ.

Goṉaꞌn c̱hele naꞌ gakan lallꞌ naꞌ xiiṉ dia c̱hoꞌkaꞌ toshiizi,

naꞌ nadꞌ gakꞌ Chios c̱hegakeꞌ.

9 Naꞌ ḻekzkaꞌ goll Chiozaꞌ Abrahamaꞌ:

―Chiyaḻꞌ gonoꞌ daa iṉiaꞌ liꞌ naꞌ len xiiṉ dia c̱hoꞌkaꞌ beṉꞌkaꞌ ziꞌ zaak.

10 Dga niaꞌ liꞌ chiyaḻꞌ gonoꞌn,

naꞌ ḻekzkaꞌ yogꞌ xiiṉ dia c̱hoꞌkaꞌ chiyaḻꞌ gongakeꞌn:

yogꞌḻoḻ-le leꞌ beṉꞌ byo chiyaḻꞌ shoꞌ kwerp c̱helekaꞌ seṉ daa le circuncisión.

11 Chiyaḻꞌ shoꞌle seṉ daa le circuncisión kwenc̱he gatꞌbiaꞌ nan chzenagle daa niaꞌ leꞌ.

12 Naꞌ ṉaa solo shoꞌle seṉnaꞌ,

naꞌ yogꞌḻoḻ biꞌ byodoꞌ ziꞌ galjə lo dia c̱hoꞌnaꞌ ka gakibꞌ x̱onꞌ lla naꞌ shoobꞌ seṉnaꞌ,

naꞌ no xiiṉ wen llin c̱hoꞌnaꞌ,

naꞌ no beṉꞌ chziꞌyiloꞌ lao beṉꞌ zitꞌ kwenc̱he goneꞌ xshinoꞌnaꞌ,

beṉꞌkaꞌ bi nak xiiṉ dia c̱hoꞌ.

13 Chiyaḻꞌ shoꞌ yogꞌḻoḻ beṉꞌkaꞌ seṉnaꞌ,

ka beṉꞌ chalj lilloꞌnaꞌ,

ka beṉꞌ chziꞌyiloꞌ choneꞌ xshinoꞌnaꞌ.

Naꞌ ḻen goṉan biaꞌ nan zoalenꞌ leꞌ zejḻi kaṉi ka ba bc̱hebꞌ gonꞌ c̱hele.

14 Naꞌ beenaꞌ bi shoꞌe seṉnaꞌ,

chiyaḻꞌ yibejleneꞌ ladjlenaꞌ daa bi chzoeꞌ xtillaanaꞌ.

15 Naꞌ ḻekzkaꞌ goll Chiozaꞌ Abrahamaꞌ:

―Nool c̱hoꞌnaꞌ bich wsiꞌoneꞌ Saraí,

san ṉaa yisiꞌoneꞌ Sara.

16 Gonꞌ ka gak wen c̱heꞌ,

naꞌ saneꞌ to xiiṉoꞌ biꞌ byo.

Ba nakten gonꞌ ka gak wen c̱heꞌ,

naꞌ gakeꞌ xṉaꞌ beṉꞌ yell zan naꞌ lo dia c̱heꞌnaꞌ ichej no beṉꞌ iṉabiaꞌ lo yellkaꞌ.

17 Naꞌ Abrahamaꞌ bc̱hekꞌ xibeꞌnaꞌ naꞌ ax̱t lo yonaꞌ bllin loxgueꞌnaꞌ,

naꞌ bxilleꞌ chakileꞌ:

“¿Gara zoa to beṉꞌ ba zeji to guiyoa yiz soa xiiṉeꞌ?

Naꞌ Sáranaꞌ ba gokileꞌ taplalj shi yiz,

¿awak soa xiiṉeꞌ?”

18 Naꞌ Abrahamaꞌ golleꞌ Chiozaꞌ:

―Sheḻꞌ gaklenoꞌ Ismaelaꞌ gak wen c̱hebꞌ.

19 Naꞌ Chiozaꞌ golleꞌ:

―Dii ḻicha nool c̱hoꞌ Sáranaꞌ saneꞌ to biꞌ byo c̱hoꞌ,

naꞌ wsiꞌobꞌ Isaac,

naꞌ ka daa ba bc̱hebꞌ gonꞌ c̱hoꞌ,

kaꞌkzə gonꞌ c̱hebꞌ naꞌ len xiiṉ dia c̱hebaꞌ zejḻi kaṉi.

20 Ḻekzkaꞌ ba benidꞌ chṉaboꞌ c̱he Ismaelaꞌ naꞌ ḻekzkaꞌ gonꞌ dii wen c̱hebꞌ soa xiiṉbꞌ biꞌ zan naꞌ shesh shamꞌ.

Naꞌ lo xiiṉ dia c̱hebaꞌ ichej shlliṉ beṉꞌ wṉabiaꞌ,

naꞌ ḻebꞌ wx̱ebꞌ to yell xen wal.

21 Naꞌ daa bc̱hebꞌ gonꞌ c̱hoꞌ ḻekzkaꞌ chc̱hebꞌ gonꞌ c̱he Isaacaꞌ,

biꞌ c̱hoꞌnaꞌ,

biꞌnaꞌ san Sáranaꞌ zi twiz ka ṉaa.

22 Ka wde bshaljlen Chiozaꞌ Abrahamaꞌ naꞌ bizee kwiteꞌnaꞌ.

23 Naꞌ lo lla naꞌtezə Abrahamaꞌ wloꞌe xiiṉeꞌ Ismaelaꞌ seṉ naꞌ len beṉꞌ wen llinkaꞌ goljə lilleꞌnaꞌ naꞌ beṉꞌkaꞌ wxiileꞌ mech,

naꞌ yogꞌzə beṉꞌ byokaꞌ zoa lilleꞌnaꞌ wloꞌe seṉ daa le circuncisión,

beneꞌ kon ka goll Chiozaꞌneꞌ goneꞌ.

24 Ba goki Abrahamaꞌ taplalj twalj yiz ka wloꞌe kwerp c̱heꞌnaꞌ seṉ.

25 Naꞌ biꞌ c̱heꞌ,

Ismaelaꞌ,

ba gokibꞌ shiiṉ yiz ka wloꞌe kwerp c̱heꞌbaa seṉ.

26 Tozə lla wyoꞌ Abrahamaꞌ seṉ len biꞌ c̱heꞌ Ismaelaꞌ,

27 naꞌ len yogꞌte beṉꞌ byokaꞌ goljə lilleꞌnaꞌ,

naꞌ beṉꞌ wen llin c̱heꞌkaꞌ wxiileꞌ mech lao beṉꞌ zitꞌkaꞌ,

wyoolengakeꞌneꞌ seṉ toz lla.