Agáraꞌ naꞌ xiiṉeꞌ Ismaelaꞌ
16
Saraínaꞌ, nool c̱he Abramaꞌ, bi wzoa biꞌ c̱hegakeꞌ. Naꞌ zoa to noolə Egipto choneꞌ xshineꞌkaꞌ, wlieꞌ Agar. 2 Naꞌch goll Saraínaꞌ Abramaꞌ:―Ṉezkziloꞌ X̱anchonaꞌ noneꞌ nadꞌ noolə will, naꞌ chṉabidꞌ liꞌ ikoo nool wen llin c̱haꞌni, shera shicholə soa xiiṉcho len ḻeꞌ.
Naꞌ ben Abramaꞌ ka goll Saraínaꞌ ḻeꞌ. 3 Naꞌ ka gok shi yiz zoa Abramaꞌ yell-lio Canaánnaꞌ, naꞌ Saraínaꞌ, biꞌe latj wzoalen Abramaꞌ Agáraꞌ, noolə Egíptonaꞌ, beṉꞌ wen llin c̱heꞌnaꞌ. 4 Naꞌ Abramaꞌ bdiꞌe Agáraꞌ naꞌ biꞌe. Naꞌ ka gokbeꞌi Agáraꞌ ba noꞌe naꞌ wzoloeꞌ bleꞌzbanileꞌ x̱aneꞌ Saraínaꞌ. 5 Naꞌ Saraínaꞌ chiꞌe Abramaꞌ:
―¡Linꞌ napoꞌ doḻꞌ daa chleꞌzbani beeni nadꞌ! Len nadaan biꞌa latj soalenoꞌneꞌ, naꞌ ṉaa ba noeꞌ naꞌ chleꞌzbanzileꞌ nadꞌ. ¡Naꞌ Chiozaꞌ iṉeꞌ nocho napə doḻꞌ shi liꞌ wa nadꞌ!
6 Naꞌ Abramaꞌ chiꞌeneꞌ:
―Beni beenaꞌ kon bi cheeniloꞌ, ḻaˈ lallꞌ naꞌkzonꞌ nakeꞌ.(*was missing here)
Naꞌ wzolo Saraínaꞌ bsakꞌziꞌe Agáraꞌ, naꞌ bizee. 7 Naꞌ ka ba ziyajeꞌ zingwee nez, naꞌ billagueꞌ to anjl c̱he Chiozaꞌ to latj llib ga chal nis choꞌa nez daa zej ganaꞌ le Sur. 8 Naꞌ golleꞌneꞌ:
―Agar, nool wen llin c̱he Saraí, ¿garalan zizoo naꞌ galan shajoꞌ?
Naꞌ ḻeꞌ billiꞌe xtilleenaꞌ, chiꞌeneꞌ:
―Chixoṉjidꞌ x̱anꞌ Saraínaꞌ.
9 Naꞌ anjl c̱he Chiozaꞌ chiꞌeneꞌ:
―Biyaj kwit x̱anoꞌnaꞌ naꞌ jayen kon bi iṉeꞌ liꞌ.
10 Naꞌ ḻekzkaꞌ goll anjl c̱he Chiozaꞌneꞌ:
“Wzesh wzanꞌ xiiṉ dia c̱hoꞌkaꞌ,
ax̱t kokzno ibabi ḻegakeꞌ.”
11 Naꞌ beꞌlencheꞌneꞌ dillꞌ, chiꞌeneꞌ:
“Ṉaa ba noꞌ, naꞌ soa to biꞌ byo choꞌ, naꞌ wsiꞌobꞌ Ismael,
ḻaꞌ Chiozaꞌ bzenagueꞌ c̱hoꞌ ka nak yeḻꞌ ziꞌ c̱hoꞌnaꞌ.
12 Naꞌ gakbꞌ ka bayix̱ꞌ ba nak ba ziꞌlallꞌ wal,
naꞌ tiḻ-lemꞌ yogꞌḻoḻ beṉꞌ, naꞌ yogꞌḻoḻ beṉꞌ tiḻ-lengakeꞌ ḻebꞌ,
ni no biꞌ bishꞌbꞌkaꞌ bi yidiḻibꞌ.”
13 Naꞌ Agáraꞌ daa ba bshaljleneꞌ Chiozaꞌ naꞌ bsiꞌeneꞌ: “Chios, beṉꞌ chleꞌi nadꞌ”, ḻaꞌ ba bleꞌidꞌ Chiozaꞌ, beenaꞌ chleꞌileꞌ nadꞌ. 14 Naꞌ daan bsiꞌgakeꞌ ganaꞌ chal nisaꞌ: “Bej c̱he beṉꞌ mban beṉꞌ chleꞌileꞌ nadꞌ”. Naꞌ bejaꞌ llian ladj Cádezaꞌ naꞌ Beredaꞌ.