―Bi illeboꞌ Abram,

ḻaꞌ nadꞌ chap chwiaꞌ liꞌ,

naꞌ goṉꞌ to dii wen inlleb c̱hoꞌ.

2 Naꞌ billii Abramaꞌ xtilleenaꞌ,

chiꞌe:

―Chios c̱haꞌ,

bibi zjanayin bi goṉoꞌ nadꞌ ḻaꞌ aga no biꞌ c̱haꞌ zoa.

Eliezeraꞌ,

beṉꞌ yell Damásconaꞌ,

beenaꞌ ngoo lallꞌ naꞌ yogꞌ dii de c̱haꞌ,

ḻechokzenꞌ igaaṉleneꞌ yogꞌḻoḻten.

3 Naꞌch wizeꞌ Abramaꞌ:

―Daa biṉꞌ goṉ tlishꞌgoꞌ biꞌ c̱haꞌ,

naꞌ wen llin c̱haꞌni goljə ḻoo yoo lillii ikee yogꞌḻoḻ dii de c̱haꞌ.

4 Naꞌ goll Chiozaꞌ ḻeꞌ:

―Aga beeni ikee daa de c̱hoꞌ,

san wzoakzə biꞌ c̱hoꞌ biꞌ ikaabꞌ yogꞌ dii napoꞌ.

5 Naꞌ wlejeꞌneꞌ chyoolə naꞌ chiꞌeneꞌ:

―Bwiakachi ḻee yabanaꞌ naꞌ blab beljdoꞌkaꞌ,

shi wak wlaboꞌn.

Kanꞌ shesh shan xiiṉ dia c̱hoꞌkaꞌ.

6 Naꞌ wyajḻeꞌ Abramaꞌ c̱he Chiozaꞌ naꞌ Chiozaꞌ wneꞌ nakeꞌ beṉꞌ ḻi beṉꞌ shaoꞌ laweꞌnaꞌ.

7 Naꞌ Chiozaꞌ golleꞌneꞌ:

―Nadꞌ nakꞌ X̱anoꞌ,

naꞌ wlejꞌ liꞌ yell Uraꞌ daa llia yell-lio c̱he caldeokaꞌ kwenc̱he goṉꞌ liꞌ yell-lioni gakin c̱hoꞌ.

8 Naꞌ Abramaꞌ golleꞌ Chiozaꞌ:

―Chios c̱haꞌ,

¿nakra gak iṉezidꞌ nan yell-lioni gakan lo naꞌ?

9 Naꞌ Chiozaꞌ golleꞌneꞌ:

―Da diwaꞌ to bak chbandoꞌ,

naꞌ to shib ba noolə,

naꞌ sto xilꞌ ba mash,

ba de shoṉ yiz wej,

naꞌ to torgogdoꞌ naꞌ sto ngolbex.

10 Naꞌ Abramaꞌ jwee yogꞌ bakaꞌ chṉabi Chiozaꞌ ḻeꞌ naꞌ beneꞌb c̱hop ḻaa wejə.

Naꞌ bx̱oeꞌ tḻaa tḻaab shḻaa wej.

Naꞌ bi len badoꞌkaꞌ zjazoa x̱ilin beneꞌ c̱hop ḻaa wejə.

11 Naꞌ llodkaꞌ chetjgakb ganaꞌ nkwaꞌ ba wetkaꞌ naꞌ Abramaꞌ chlagueꞌ ḻegakb.

12 Naꞌ ka ba chaḻ,

naꞌ bex̱ꞌ bishgalaꞌ Abramaꞌ wteslejeꞌ.

Naꞌ tokonganzi gok shgasj shc̱hoḻ inlleb naꞌ ḻe bllebchgueꞌ.

13 Naꞌch Chiozaꞌ golleꞌneꞌ:

―Chiyaḻꞌ iṉeziloꞌ xiiṉ dia c̱hoꞌkaꞌ lljazoagakeꞌ(*) lall lill beṉꞌ,

naꞌ beṉꞌkaꞌ lleꞌ naꞌ wgondadgakeꞌ ḻegakeꞌ xshineꞌkaꞌ naꞌ biya dii goni beṉꞌkaꞌ ḻegakeꞌ to shlak tap guiyoa yiz.

14 Naꞌ ḻekzkaꞌ nadꞌ wiꞌa yeḻꞌ ziꞌ c̱he yellaꞌ ganaꞌ wsakꞌziꞌgakeꞌ ḻegakeꞌ.

Naꞌtechlə xiiṉ dia c̱hoꞌkaꞌ yizaꞌgakeꞌ zinoaꞌ zinyegakeꞌ to yeḻꞌ wniꞌa xen.

15 Naꞌ liꞌ,

naa lla,

katꞌ ba nakoꞌ beṉꞌ goldoꞌ,

naꞌ guetoꞌ naꞌ yidiḻ yillagoꞌ dii x̱ozxtookaꞌ mbalaz.

16 Yiyoll te tap kwen dia c̱hoꞌkaꞌ naꞌ yiyedgakeꞌ ni sto shii,

katꞌ ba biyoll bido bllilj dii malaꞌ daa chon beṉꞌ amorreokaꞌ.

17 Naꞌ ka ba goḻ naꞌ ba nak shgasj shc̱hoḻ,

naꞌ wxe to gorn naꞌ chchej ḻoꞌinnaꞌ llen naꞌ bchej sto yiꞌ,

ka to yiꞌ yech,

chzeeniꞌn naꞌ wden gchoḻ ganaꞌ nkwaꞌ bayix̱ꞌkaꞌ.

18 Naꞌ lo llanaꞌ Chiozaꞌ bc̱hebeꞌ kon Abramaꞌ,

naꞌ chiꞌe:

―Yell-lioni wiꞌan xiiṉ dia c̱hoꞌkaꞌ,

zolozan yao c̱he Egíptonaꞌ yillinten yao xen daa le Éufrates:

19 daa nak yell-lio c̱he ceneokaꞌ,

cenezeokaꞌ,

cadmoneokaꞌ,

20 heteokaꞌ,

ferezeokaꞌ,

refaítakaꞌ,

21 amorreokaꞌ,

cananeokaꞌ,

gergeseokaꞌ naꞌ jebuseokaꞌ.