Abramaꞌ naꞌ Lotaꞌ chḻaa ljwelleꞌ
13
Naꞌ ka bichej Abramaꞌ yell-lio Egíptonaꞌ kon nool c̱heꞌnaꞌ naꞌ bitop bisee yogꞌ dii napeꞌ,
naꞌ ziyajeꞌ yell-lio daa le Neguev,
naꞌ len Lotaꞌ,
xiiṉ dii beṉꞌ bisheenaꞌ,
ziyajleneꞌ ḻegakeꞌ.
2 Abramaꞌ nakchgueꞌ beṉꞌ wniꞌa nlleb.
Napeꞌ or,
plat naꞌ ba zan inlleb bayix̱ꞌ.
3 Naꞌ bizee Neguevaꞌ naꞌ ziyajeꞌ shkwen shkwen wej billintieꞌ yaa yawaꞌ daa zoa gchoḻ Bet-elaꞌ naꞌ Hainaꞌ ganaꞌ bgaaṉeꞌ shloll dii nechte,
4 latj ganaꞌ beneꞌ to x̱oṉj de yaj ganaꞌ bzeyeꞌ bayix̱ꞌkaꞌ beteꞌ kwenc̱he beꞌlawee X̱ancho Chiozaꞌ.
Naꞌ naꞌ beꞌḻwilleꞌneꞌ.
5 Ḻekzkaꞌ Lotaꞌ,
beenaꞌ chdaleneꞌ Abramaꞌ txen,
nakeꞌ beṉꞌ wniꞌa nlleb,
napeꞌ xilꞌ,
bak,
naꞌ ḻekzkaꞌ beṉꞌ zan chon xshineꞌnaꞌ.
6 Naꞌ ganaꞌ zoagakeꞌ bich chakin kwenc̱he gao yogꞌḻoḻ bayix̱ꞌ c̱heꞌkaꞌ.
Naꞌ bich chak soagakeꞌ toz.
7 Ḻaꞌ beṉꞌkaꞌ chapgakeꞌ bayix̱ꞌ c̱he Abramaꞌ chdiḻ-lengakeꞌ beṉꞌkaꞌ chapgakeꞌ bayix̱ꞌ c̱he Lotaꞌ.
Naꞌ leyi naꞌ ni zoa cananeokaꞌ naꞌ ferezeokaꞌ.
8 Naꞌ bllin to lla Abramaꞌ beꞌleneꞌ Lotaꞌ dillꞌ,
chiꞌeneꞌ:
“Choꞌ nakcho dialla,
naꞌ bi nakan wen tiḻ-lenzə ljwellcho,
naꞌ ni bi nakan wen tiḻ-lenzə ljwell beṉꞌki chap bayix̱ꞌ c̱hechoki.
9 Yell-lio xen wal de.
Ben goklen wḻaa ljwellcho.
Shi liꞌ shajoꞌ chaꞌlə naꞌ nadꞌ shaꞌ lliꞌlə*,
wa shi liꞌ shajoꞌ lliꞌlə* naꞌ nadꞌ shaꞌ chaꞌlə.”
10 Naꞌ bleꞌi Lotaꞌ leshꞌ xennaꞌ daa chiꞌ choꞌa yao Jordánnaꞌ den nis zil,
ax̱t chidiḻten yell-lio c̱he yell Zoaraꞌ.
Naꞌ bleꞌileꞌn nakan ka yell-lio daa benshaoꞌ X̱ancho Chiozaꞌ Edénnaꞌ,
naꞌ ka yell-lio c̱he beṉꞌ Egíptokaꞌ.
(Kanaꞌ ziꞌ wlliayiꞌ Chiozaꞌ yell xenkaꞌ le Sodoma naꞌ Gomorra.)
11 Naꞌ Lotaꞌ wzee zejeꞌ ka de ganaꞌ chlaꞌlə wbillaꞌ naꞌ jsoeꞌ leshaa chiꞌ choꞌa yao Jordánnaꞌ.
Naꞌ kaꞌ gok bḻaa ljwelleꞌ kon Abramaꞌ.
12 Naꞌ bigaaṉ Abramaꞌ yell-lio Canaánnaꞌ,
naꞌ Lotaꞌ wzee jsoeꞌ yellkaꞌ llia leshaa de gaozə yell xen daa le Sodoma.
13 Naꞌ beṉꞌkaꞌ lleꞌ yell Sodómanaꞌ ḻe beṉꞌ mal nakgakeꞌ,
naꞌ chx̱iṉj chḻengakeꞌ lao Chiozaꞌ.
14 Naꞌ ka ba wzaꞌ Lotaꞌ,
Chiozaꞌ wṉieꞌ Abramaꞌ,
chiꞌeneꞌ:
“Gani zioꞌ bwiakachi ka chaꞌlə ka lliꞌlə,
naꞌ ka de ganaꞌ chlaꞌlə wbillaꞌ naꞌ ka de ganaꞌ chxoalan.
15 Naꞌ yell-lionaꞌ daa chleꞌiloꞌ,
goṉaꞌn c̱hoꞌ naꞌ c̱he xiiṉ dia c̱hoꞌkaꞌ toshiizi.
16 Nadꞌ gonꞌ ka shesh shan xiiṉ dia c̱hoꞌkaꞌ,
gakgakeꞌ beṉꞌ zan inlleb ka bishte yonaꞌ daa kono yibabi.
17 Naꞌ ṉaa jta doxen yell-lioni dga goṉꞌ liꞌ ikoo.”
18 Naꞌ Abramaꞌ bishee xishṉaꞌyi ganaꞌ zoeꞌ naꞌ jazoeꞌ ganaꞌ ḻe lleꞌchga yag zilljə c̱he to beṉꞌ le Mamré,
gaozə yell xen daa le Hebrón.
Naꞌ beneꞌ to x̱oṉj de yaj ga bzeyeꞌ bayix̱ꞌkaꞌ beteꞌ kwenc̱he beꞌlawee Chiozaꞌ.