Génesis 12

Chiozaꞌ chṉieꞌ Abramaꞌ

Chiozaꞌ golleꞌ Abramaꞌ: “Bkwaaṉ yell c̱hoꞌni, naꞌ bkwaaṉ no bishꞌ ljwelloꞌ naꞌ yogꞌḻoḻ beṉꞌ lleꞌ lill xḻatjə x̱oꞌnaꞌ, naꞌ shajoꞌ to yell-lio dii wliidꞌ liꞌ. 2 Gonꞌ kwenc̱he shesh shan xiiṉ dia c̱hoꞌkaꞌ yell-lioni. Naꞌ gonꞌ ka gak wen c̱hoꞌ, naꞌ seyi c̱hoꞌ, naꞌ gak wen c̱he beṉꞌ yoblə ni c̱hoꞌ liꞌ. 3 Gonꞌ ka gak wen c̱he beṉꞌkaꞌ gongakileꞌ liꞌ wen, naꞌ beṉꞌkaꞌ bi ileꞌi liꞌ wen nadꞌ gonꞌ ka bi gak wen c̱hegakeꞌ. Naꞌ ni c̱hoꞌ liꞌ gak wen c̱he yogꞌ beṉꞌ lleꞌ zbii zkaaṉ yell-lioni.”

4 Naꞌ ben Abramaꞌ kon ka goll Chiozaꞌneꞌ goneꞌ, naꞌ wno Lotaꞌneꞌ. Naꞌ zeji Abramaꞌ guiyon shinꞌ yiz ka bchejeꞌ yell Haránnaꞌ. 5 Naꞌ bc̱heꞌ Abramaꞌ nool c̱heꞌ, Saraínaꞌ, naꞌ len Lotaꞌ, xiiṉ dii beṉꞌ bisheenaꞌ. Naꞌ btopeꞌ yogꞌḻoḻ daa napeꞌ naꞌ yogꞌ beṉꞌkaꞌ napeꞌ, beṉꞌkaꞌ chon xshineꞌnaꞌ yell Haránnaꞌ, naꞌ bchejgakeꞌ zjaakeꞌ yell-lio Canaánnaꞌ. 6 Naꞌ wde Abramaꞌ yell-lio Canaánnaꞌ bllintieꞌ ganaꞌ le Siquem ganaꞌ zoa to yag zilljə c̱he Morénaꞌ. Naꞌ kanaꞌ beṉꞌ Canaánkaꞌ ni lleꞌgakeꞌ naꞌ. 7 Naꞌ bliꞌlao Chiozaꞌ Abramaꞌ, naꞌ golleꞌneꞌ: “Xiiṉ dia c̱hoꞌkaꞌ weꞌgakee yell-lioni.”

Naꞌ beneꞌ to x̱oṉj de yaj ga wzeyeꞌ bayix̱ꞌkaꞌ chiteꞌ kwenc̱he beꞌlawee Chiozaꞌ daa bliꞌlaweꞌneꞌ naꞌ. 8 Naꞌ wzee zejeꞌ yaa yao daa zoa gchoḻ yell Bet-elaꞌ naꞌ yell Hainaꞌ, naꞌ beneꞌ to ga bgaaṉeꞌ shloll. Naꞌ yell Bet-elaꞌ chgaaṉan shḻaa ganaꞌ chxoa wbillaꞌ naꞌ Hainaꞌ chgaaṉan shḻaa ganaꞌ chlaꞌlə wbillaꞌ. Naꞌ beneꞌ to x̱oṉj de yaj ga wzeyeꞌ bayix̱ꞌkaꞌ chiteꞌ kwenc̱he beꞌlawee Chiozaꞌ, naꞌ beꞌḻwilleꞌneꞌ. 9 Naꞌ bizgoo Abramaꞌ nez shkwen shkwen wej, zejeꞌ ganaꞌ delə yell-lio daa le Neguev.

Abramaꞌ chajeꞌ Egíptonaꞌ

10 Naꞌ wcheꞌ wbinnaꞌ doxen ganaꞌ wzoa Abramaꞌ, naꞌ wyajeꞌ Egíptonaꞌlə kwenc̱he jsoeꞌ naꞌ shloll, ḻaꞌ dii wal nak wbinnaꞌ daa de ganaꞌ wzoeꞌ. 11 Naꞌ ka ba zoa shoꞌgakeꞌ yell-lio Egíptonaꞌ, naꞌ golleꞌ nool c̱heꞌ, Saraínaꞌ: “Ni iṉiaꞌ liꞌ ṉaa, daa nakoꞌ to noolə xochi, 12 ka ileꞌi beṉꞌ Egíptokaꞌ liꞌ, naꞌ iṉagakeꞌ: “Nool c̱heꞌ beeni”, naꞌ witgakeꞌ nadꞌ naꞌ bibi gongakileꞌ liꞌ. 13 Ben goklen golltezgakeꞌ beṉꞌ zanꞌ liꞌ kwenc̱he bibi gongakileꞌ nadꞌ naꞌ bi witgakeꞌ nadꞌ daa yeꞌgakoꞌneꞌ kaꞌ.”

14 Naꞌ ka wyoo Abramaꞌ yell-lio Egíptonaꞌ, beṉꞌ Egíptokaꞌ bleꞌgakileꞌ nool c̱heꞌnaꞌ xochi nlleb. 15 Naꞌ beṉꞌkaꞌ nzoa faraónnaꞌ de wṉabiaꞌ bleꞌgakileꞌ noolaꞌ naꞌ wyajgakeꞌ lao faraónnaꞌ cheꞌgakeꞌneꞌ: “Ḻe xochi nak to noolə ba blaꞌ yelli”. Naꞌ jx̱iꞌgakeꞌneꞌ naꞌ bc̱heꞌgakeꞌneꞌ lill faraónnaꞌ.

16 Naꞌ ni c̱he Saraínaꞌ ḻe wen bleꞌi faraónnaꞌ Abramaꞌ. Naꞌ biꞌe xilꞌ, bak, burr mash naꞌ burr ba noolə, naꞌ beṉꞌ goneꞌ xshineꞌnaꞌ, ka noolə ka beṉꞌ byo, naꞌch kamey c̱heꞌ. 17 Ḻaꞌkzi beneꞌ kaꞌ Chiozaꞌ bseḻee to yillweꞌ xen lill faraónnaꞌ daa wkee xool Abramaꞌ. 18 Naꞌ faraónnaꞌ wṉieꞌ Abramaꞌ naꞌ golleꞌneꞌ:

―¿Bic̱he benziloꞌ nadꞌ kaꞌ? ¿Bic̱he ki wnoꞌ nadꞌ shi nool c̱hoꞌ beeni? 19 ¿Bic̱he wnazoꞌ “beṉꞌ zanꞌ beeni”? Naꞌ wzelallaaneꞌ kwenc̱he gakeꞌ nool c̱haꞌ. ¡Bikaa nool c̱hoꞌni, biyajleneꞌ!

* 20 Naꞌ faraónnaꞌ beneꞌ byen bibejgakeꞌ Abramaꞌ len nool c̱heꞌnaꞌ naꞌ yogꞌḻoḻ dii napeꞌ yell-lio Egíptonaꞌ.