Babel
11
Beṉꞌki kaniꞌyi yogꞌḻoḻgakeꞌ chṉegakeꞌ toz dillꞌ.
2 Naꞌ ka bllesh beṉꞌki ka de ganaꞌ chlaꞌlə wbillaꞌ,
naꞌ bllingakeꞌ to ga de to leshꞌ yell-lio c̱he Sinaraꞌ,
naꞌ naꞌzə wzoagakeꞌ.
3 Naꞌ beꞌlen ljwellgakeꞌ dillꞌ,
cheꞌgakeꞌ:
“Solocho goncho ladriyaꞌ naꞌ weyꞌchon lo yiꞌnaꞌ.”
Kaꞌ gok wzolo bc̱hingakeꞌ ladriyaꞌ lwaa yaj naꞌ bkwaꞌgakileꞌn to dii zidꞌ(*ꞌ) dii chiyalljcha lwaa mezkl.
4 Naꞌ beꞌgakeꞌ dillꞌ,
cheꞌgakeꞌ:
“Wx̱echo to yell xen naꞌ goncho sto yoo sibə dii yillinten ḻee yabanaꞌ.
Naꞌ seyi c̱hecho naꞌ bi gueslescho doxen yell-lioni.”
5 Naꞌ bleꞌi Chiozaꞌ yell xennaꞌ naꞌ yoo sibə walaꞌ daa ba chon beṉꞌki,
6 naꞌ wneꞌ:
“Beṉꞌki nakgakeꞌ toz naꞌ chṉegakeꞌ toz dillꞌ,
daan ba wzolo chongakeꞌ llinni*,
naꞌ bibi de dii wsej wllonan gon beṉꞌki daa ba nongakeꞌ lez gongakeꞌ.
7 Naꞌ chiyaḻꞌ shajcho naꞌ lljax̱idꞌcho xtilleekaꞌ kwenc̱he bi shajnii c̱he ljwelleꞌ.”
8 Naꞌ kaꞌ ben Chiozaꞌ c̱hegakeꞌ,
naꞌ blleshlesgakeꞌ jsoagakeꞌ ga gazə lo yell-lioni.
Naꞌ bsangakeꞌ llinnaꞌ,
bich bi gok gongakeꞌ.
9 Naꞌ bsiꞌgakeꞌ Babel latjaꞌ ganaꞌ bx̱idꞌ Chiozaꞌ xtilleekaꞌ naꞌ besḻeseꞌ ḻegakeꞌ ga gazə wkaa twej twejeꞌ.
Xiiṉ dia c̱he Semaꞌ
(1 Cr. 1:24-27)
10 Beṉꞌkin gok xiiṉ dia c̱he Semaꞌ.
C̱hop yiz ba gok wde yejsiwꞌ walaꞌ katꞌ goki Semaꞌ to guiyoa yiz naꞌ wzoa xiiṉeꞌ beenaꞌ wle Arfaxad.
11 Naꞌ ka biyoll wzoa xiiṉeꞌ Arfaxadaꞌ,
Semaꞌ wzoacheꞌ zi gayꞌ guiyoa yiz naꞌ wzoach xiiṉeꞌ,
biꞌ byo naꞌ biꞌ noolə.
12 Naꞌ ka goki Arfaxadaꞌ shinꞌichoa yiz naꞌ wzoa to xiiṉeꞌ wlieꞌ Sala.
13 Naꞌ biyoll wzoa xiiṉeꞌ Sálanaꞌ,
Arfaxadaꞌ wzoacheꞌ zi tapguiyoa shoṉ yiz naꞌ wzoach biꞌ c̱heꞌ,
biꞌ byo naꞌ biꞌ noolə.
14 Naꞌ ka goki Sálanaꞌ shichoa yiz naꞌ wzoa xiiṉeꞌnaꞌ wle Heber.
15 Naꞌ biyoll wzoa xiiṉeꞌ,
Heberaꞌ,
naꞌ wban Sálanaꞌ zi tap guiyoa shoṉ yiz naꞌ wzoach biꞌ c̱heꞌ,
biꞌ byo naꞌ biꞌ noolə.
16 Naꞌ goki Heberaꞌ shdaꞌichoa yiz naꞌ wzoa xiiṉeꞌnaꞌ wle Peleg.
17 Naꞌ biyoll wzoa xiiṉeꞌ Pelegaꞌ,
naꞌ wban Heberaꞌ zi tap guiyoa shichoa yiz naꞌ wzoach xiiṉeꞌ,
biꞌ byo naꞌ biꞌ noolə.
18 Naꞌ goki Pelegaꞌ shichoa yiz naꞌ wzoa xiiṉeꞌnaꞌ wle Reu.
19 Ka biyoll wzoa xiiṉeꞌ Reúnaꞌ,
naꞌ wban Pelegaꞌ zi c̱hop guiyoa ga yiz naꞌ wzoach xiiṉeꞌ,
biꞌ byo naꞌ biꞌ noolə.
20 Naꞌ goki Reúnaꞌ shlliṉichoa yiz naꞌ wzoa xiiṉeꞌnaꞌ wle Serug.
21 Naꞌ biyoll wzoa xiiṉeꞌ Serugaꞌ,
naꞌ wban Reúnaꞌ zi c̱hop guiyoa gall yiz naꞌ wzoach xiiṉeꞌ,
biꞌ byo naꞌ biꞌ noolə.
22 Naꞌ goki Serugaꞌ shichoa yiz naꞌ wzoa xiiṉeꞌnaꞌ wle Nacor.
23 Naꞌ biyoll wzoa Nacoraꞌ,
naꞌ wban Serugaꞌ zi c̱hop guiyoa yiz naꞌ wzoach xiiṉeꞌ,
biꞌ byo naꞌ biꞌ noolə.
24 Naꞌ goki Nacoraꞌ gaichoa yiz naꞌ wzoa xiiṉeꞌnaꞌ wle Taré.
25 Naꞌ biyoll wzoa Tarénaꞌ,
naꞌ wban Nacoraꞌ zi to guiyoa twalj yiz naꞌ wzoach xiiṉeꞌ,
biꞌ byo naꞌ biꞌ noolə.
26 Naꞌ goki Tarénaꞌ guiyonshi yiz naꞌ wzoa xiiṉeꞌkaꞌ wle Abram,
Nacor,
naꞌ Harán.
Xiiṉ dia c̱he Tarénaꞌ
27 Beṉꞌki nakgakeꞌ xiiṉ dia c̱he Tarénaꞌ,
beenaꞌ gok x̱a Abramaꞌ,
Nacoraꞌ,
naꞌch Haránnaꞌ.
Naꞌ Haránnaꞌ wzoa to xiiṉeꞌ beenaꞌ wle Lot.
28 Naꞌ wit Haránnaꞌ nechlə ka x̱eꞌ,
Tarénaꞌ,
ganaꞌ le Ur,
yell xen c̱he caldeokaꞌ ganaꞌ goljeꞌ.
29 Naꞌ Abramaꞌ wkee beenaꞌ le Saraí,
naꞌ Nacoraꞌ wkee beenaꞌ le Milca,
nakeꞌ xiiṉ Haránnaꞌ naꞌ beṉꞌ bil Íscanaꞌ.
30 Saraínaꞌ gokeꞌ to noolə will naꞌ bi gok soa xiiṉeꞌ.
31 Naꞌ Tarénaꞌ bc̱hiꞌe xiiṉeꞌ Abramaꞌ,
naꞌ biꞌ xsoeꞌ Lotaꞌ xiiṉ dii Haránnaꞌ,
naꞌ xoolilleꞌ Saraínaꞌ,
bchejgakeꞌ yell xen daa le Ur daa llia ganaꞌ mbani caldeokaꞌ kwenc̱he shajgakeꞌ yell-lio daa le Canaán.
Naꞌ ka bllingakeꞌ yellaꞌ le Harán naꞌ bgaaṉgakeꞌ naꞌ.
32 Naꞌ Tarénaꞌ witeꞌ yell Haránnaꞌ ka gokileꞌ c̱hop guiyoa gayꞌ yiz.