Génesis 10

Xiiṉ dia c̱he Noénaꞌ

(1 Cr. 1:5-23)

Ka wde yejsiwꞌ walaꞌ, wzolo wzoa xiiṉ Semaꞌ, Camaꞌ naꞌ Jafetaꞌ, beṉꞌkaꞌ nak xiiṉ Noénaꞌ. Naꞌ beṉꞌki gok xiiṉgakeꞌ: 2 beṉꞌkaꞌ gok xiiṉ Jafetaꞌ wlegakeꞌ Gomer, Magog, Madai, Javán, Tubal, Mesec, naꞌ Tiras. 3 Naꞌ beṉꞌkaꞌ gok xiiṉ Gomeraꞌ wlegakeꞌ Askenaz, Rifat, naꞌ Togarma. 4 Naꞌ beṉꞌkaꞌ gok xiiṉ Javánnaꞌ wlegakeꞌ Elisa, Tarsis, Quitim, naꞌ Dodanim. 5 Beṉꞌki gokgakeꞌ dia c̱he Jafetaꞌ wlleꞌgakeꞌ choꞌa nisdoꞌnaꞌ. Naꞌ shkwen wejgakeꞌ bx̱e yell c̱he c̱hegakeꞌ, naꞌ gotꞌ dillꞌ c̱he c̱hegakeꞌ.

6 Naꞌ beṉꞌkaꞌ gok xiiṉ Camaꞌ wlegakeꞌ Cus, Misraim, Fut naꞌ Canaán. 7 Naꞌ beṉꞌkaꞌ gok xiiṉ Cúzaꞌ wlegakeꞌ Seba, Havila, Sabta, Raama naꞌ Sabteca. Naꞌ beṉꞌkaꞌ gok xiiṉ Raámanaꞌ wlegakeꞌ Seba naꞌ Dedán. 8 Naꞌ Cúzaꞌ gokeꞌ x̱a Nimrod, ḻeꞌ gokeꞌ beṉꞌ nech beṉꞌ wal beṉꞌ ḻe wzeyi c̱heyin yell-lioni. 9 Naꞌ beenaꞌ le Nimrod betchgueꞌ bayix̱ꞌdoꞌkaꞌ lleꞌ yaa yao, kon ka bllia Chiozaꞌ biaꞌ goneꞌ. Daa beneꞌ kaꞌ, naꞌ nagakeꞌ: “Nakoꞌ ka Nimrod, beenaꞌ ḻe beteꞌ bayix̱ꞌdoꞌ kon ka bllia Chiozaꞌ biaꞌ goneꞌ.” 10 Naꞌ Nimrodaꞌ wṉabiꞌe yell-lio ganaꞌ le Sinar, naꞌ yellki mbejlawin yell-lio Sinaraꞌ: Babel, Erec, Acad, naꞌ Calne. 11 Yell Sinaraꞌ wzaꞌ Nimrodaꞌ zejeꞌ Asírianaꞌ, naꞌ jax̱ieꞌ yellki le Nínive, Rehobot, Cala, 12 naꞌ yell xen walaꞌ daa le Resén, daa llia ladj yell Nínivenaꞌ naꞌ yell Cálanaꞌ.

13 Naꞌ beṉꞌki xiiṉ dia c̱he Misraimaꞌ: ludeokaꞌ, anameokaꞌ, lehabítakaꞌ, naftuhítakaꞌ, 14 patruseokaꞌ, casluhímkaꞌ naꞌ caftorímkaꞌ. Naꞌ xiiṉ dia c̱he casluhímkaꞌ, filisteokaꞌ.

15 Naꞌ xiiṉ nech Canaánnaꞌ wlieꞌ Sidón, naꞌch beenaꞌ sto wlieꞌ Het. 16 Naꞌ lo dia c̱he Canaánnaꞌ wxe jebuseokaꞌ, amorreokaꞌ, gergeseokaꞌ, 17 heveokaꞌ, araceokaꞌ, sineokaꞌ, 18 arvadeokaꞌ, zemareokaꞌ, naꞌ hamateokaꞌ. Naꞌ ka wyan xiiṉ dia c̱he Canaánnaꞌ naꞌ wzolo wislesgakeꞌ. 19 Naꞌ yell-lio c̱he beṉꞌkaꞌ nak xiiṉ dia c̱he Canaánnaꞌ blliljan dii xen, wzolozan ganaꞌ llia Sidónnaꞌ naꞌ jatiḻten yell-lio c̱he Gázanaꞌ, ka de ganaꞌ chgaaṉlə Geraraꞌ, naꞌ jatiḻten yell Lásanaꞌ ganaꞌ chgaaṉlə yell Sodómanaꞌ, yell Gomórranaꞌ, naꞌ yell Ádmanaꞌ naꞌ yell Zeboimaꞌ. 20 To kaꞌtꞌ nak xiiṉ dia c̱he Camaꞌ, naꞌ ba non c̱he c̱hegakeꞌ naꞌ gotꞌ dillꞌ c̱he c̱hegakeꞌ, naꞌ yell c̱he c̱hegakeꞌ.

21 Naꞌ Semaꞌ, gokeꞌ beṉꞌ bishꞌ nech Jafetaꞌ, naꞌ yogꞌ biꞌ c̱he beenaꞌ le Heber gokgakeꞌ xiiṉ dia c̱he Semaꞌ. 22 Beṉꞌkaꞌ gok xiiṉ Semaꞌ wlegakeꞌ Elam, Asur, Arfaxad, Lud, naꞌ Aram. 23 Naꞌ beṉꞌkaꞌ gok xiiṉ Aramaꞌ wlegakeꞌ Uz, Hul, Geter, naꞌ Mas. 24 Naꞌ beenaꞌ gok xiiṉ Arfaxadaꞌ wlieꞌ Sala, naꞌ xiiṉ Sálanaꞌ wlieꞌ Heber. 25 Naꞌ Heberaꞌ wzoa c̱hop xiiṉeꞌ: tobꞌ wle Peleg, bsiꞌe beeni kaꞌ ḻaꞌ kanaꞌ wbaneꞌ blaa ljwell beṉꞌ yell-lioni ganaꞌ nakgakeꞌ toz naꞌ ben c̱he c̱heləgakeꞌ. Naꞌ beṉꞌ bisheenaꞌ wlieꞌ Joctán. 26 Naꞌ beṉꞌkaꞌ gok xiiṉ Joctánnaꞌ wlegakeꞌ Almodad, Selef, Hazar-mavet, Jera, 27 Adoram, Uzal, Dicla, 28 Obal, Abimael, Seba, 29 Ofir, Havila, naꞌ Jobab. Yogꞌ beṉꞌki nakgakeꞌ xiiṉ Joctánnaꞌ. 30 Naꞌ wzoagakeꞌ doxen yell-lio daa mbanin Mésanaꞌ ax̱t ganaꞌ le Sefar ganaꞌ nak yaa yao yeḻə daa llia shḻaa ganaꞌ chlaꞌlə wbillaꞌ. 31 Beṉꞌkin nakgakeꞌ xiiṉ dia c̱he Semaꞌ, naꞌ ba non c̱he c̱hegakeꞌ, naꞌ gotꞌ dillꞌ c̱he c̱hegakeꞌ, naꞌ yell c̱he c̱hegakeꞌ.

32 Beṉꞌki nak xiiṉ dia c̱he xiiṉ Noénaꞌ, naꞌ gokgakeꞌ shkwen shkwen wejə naꞌ bx̱egakeꞌ yell c̱he c̱hegakeꞌ. Naꞌ blleshlesgakeꞌ naꞌ wzologakeꞌ bx̱egakeꞌ yell c̱he c̱hegakeꞌ doxen yell-lioni ka biyoll wde yejsiwꞌ walaꞌ.