Chiozaꞌ chc̱hebeꞌ goneꞌ wen c̱he Noénaꞌ
9
Chiozaꞌ benḻeeyeꞌ Noénaꞌ kon biꞌ c̱heꞌkaꞌ naꞌ golleꞌ:
“Soa biꞌ zan biꞌ c̱hele naꞌ yisshaꞌle doxen yell-lioni.
2 Naꞌ yogꞌḻoḻ bayix̱ꞌ,
ba zoa yell-lioni shoo shebgakb leꞌ,
yogꞌ ba chda lo llazə,
ba chda lo yo,
naꞌ ba yoo ḻoo nisdoꞌ nakgakb lallꞌ naꞌle.
3 Wak gaole yogꞌḻoḻ bayix̱ꞌ,
no yix̱ꞌ kwan dii nan gaole,
nadꞌ choṉaꞌn.
4 Ḻete de to dii bi gak gaole:
bi gak gaole belꞌ c̱he bayix̱aa shi bi wlaljle xc̱hemaꞌ.
Ḻaꞌ chennaꞌ nakan yeḻꞌ mban c̱heb.
5 Naꞌ ba nc̱hogbiꞌa guet beenaꞌ witeꞌ to beṉec̱h,
wa bayix̱aa witb to beṉec̱h.
Ka ba nc̱hogbiꞌa c̱he to to beṉꞌ witeꞌ ljwell beṉec̱heꞌnaꞌ.
6 “Shi to beṉꞌ witeꞌ to bishꞌ ljwelleꞌ,
beṉꞌ yoblə yiziꞌe wzon c̱heꞌnaꞌ.
Ḻaꞌ Chiozaꞌ beneꞌ beṉec̱haꞌ ka ḻeꞌ.
7 Naꞌ niaꞌ leꞌ,
chiyaḻꞌ soa biꞌ zan xiiṉle
naꞌ yisshaꞌle yell-lioni.”
8 Naꞌ ḻekzkaꞌ goll Chiozaꞌ Noénaꞌ kon biꞌ c̱heꞌkaꞌ:
9 “Ḻi wwiakachi ṉaa dga chc̱hebꞌ laoleni,
naꞌ lao yogꞌḻoḻ xiiṉ dia c̱helekaꞌ,
10 naꞌ yogꞌḻoḻ bayix̱ꞌ,
ba lleꞌ len leꞌ,
bakaꞌ bichej ḻoo barkwaꞌ:
ba zoa x̱ilin,
ba chisgol-le lill-le,
ba lleꞌ yaa yao,
naꞌ yogꞌḻoḻte ba lleꞌ doxen yell-lioni.
11 Ka nak dga chc̱hebꞌ laoleni:
bich wlliayaa yogꞌḻoḻ dii de yeḻꞌ mban c̱heyin kon nis yej.
Bich gak yejsiwꞌ walaꞌ ka daa blliayiꞌn yell-lioni.
12 Dga gonꞌ ṉaa kwenc̱he c̱hix̱jeꞌin leꞌ gak ka daa ba bc̱hebꞌ gonꞌ zejḻi kaṉi kon leꞌ naꞌ kon yogꞌḻoḻ dii de yeḻꞌ mban c̱heyin:
13 wdaꞌ to betyaa ḻee bejaꞌ kwenc̱he c̱hix̱jeꞌin leꞌ gak ka daa ba bc̱hebꞌ gonꞌ yell-lioni.
14 Katꞌ ileꞌile se bej yejaꞌ,
naꞌ lii x̱oate to betyaa ḻee bejaꞌ,
15 naꞌ lljadinidꞌ ka nak daa bc̱hebꞌ len leꞌ naꞌ yogꞌḻoḻ dii de yeḻꞌ mban c̱heyin,
naꞌ bichga gak yejsiwꞌ walaꞌ ka daa blliayiꞌn yogꞌ dii de yeḻꞌ mban c̱heyin lo yell-lioni.
16 Katꞌkaꞌ x̱oa betyaanaꞌ ḻee bejaꞌ,
naꞌ ileꞌidaꞌn naꞌ lljadinidꞌ ka nak daa ba bc̱hebꞌ gonꞌ zejḻi kaṉi len yogꞌḻoḻ dii de yeḻꞌ mban c̱heyin lo yell-lioni.
17 Kaꞌ nak daa c̱hix̱jeꞌin leꞌ kweṉche gakbeꞌile gonꞌ ka daa ba bc̱hebꞌ gonꞌ c̱he yogꞌḻoḻ dii de yeḻꞌ mban c̱heyin lo yell-lioni.”
Kaꞌ goll Chiozaꞌ Noénaꞌ.
Chzolli Noénaꞌ
18 Beṉꞌkin biꞌ c̱he Noénaꞌ beṉꞌkaꞌ bichejleneꞌ ḻoo barkwaꞌ:
Semaꞌ,
Camaꞌ,
len Jafetaꞌ,
naꞌ Camaꞌ nakeꞌ x̱a beenaꞌ le Canaán.
19 Naꞌ beṉꞌki shoṉə nakgakeꞌ xiiṉ Noénaꞌ,
naꞌ xiiṉ dia c̱heꞌkaꞌ bisshaꞌgakeꞌ yell-lioni.
20 Noénaꞌ gokeꞌ beṉꞌ goz gooṉ naꞌ wzoloeꞌ gozeꞌ yag uva.
21 Bllin to lla Noénaꞌ weejeꞌ x̱is uvanaꞌ naꞌ bsollin ḻeꞌ,
naꞌ bi gokbeꞌileꞌ bdiṉ xalaaneꞌnaꞌ chtoḻeꞌ gchoḻ lilleꞌnaꞌ.
22 Naꞌ Camaꞌ,
x̱a Canaánnaꞌ,
ka bleꞌileꞌ x̱eꞌnaꞌ ndiṉ xalaaneꞌnaꞌ,
naꞌ bchejeꞌ jelleꞌ beṉꞌ bisheekaꞌ zi c̱hop kaꞌ.
23 Naꞌ Semaꞌ len Jafetaꞌ wdoyogakeꞌ to lechꞌ bx̱oan yaaxizeꞌkaꞌ,
naꞌ zjaakeꞌ gozkoollꞌlə jakwashꞌgakileꞌn x̱eꞌkaꞌ kwenc̱he bi ileꞌgakileꞌ bibi xalaaneꞌ nakweꞌ.
24 Ka biyeeṉi Noénaꞌ naꞌ gokbeꞌileꞌ bin ben xiiṉeꞌ biꞌ neshaa c̱heꞌ,
25 naꞌ wdishjeꞌ biaꞌ blagꞌ c̱he Canaánnaꞌ,
wneꞌ:
“¡Bat gak dii wen c̱he Canaánnaꞌ!
Tozeꞌ ḻeꞌ yibix̱ yitoḻeꞌ lo xshin beṉꞌ bisheekaꞌ.”
26 Naꞌ ḻekzkaꞌ wneꞌ:
“¡Chios c̱haꞌnaꞌ gakleneꞌ Semaꞌ,
naꞌ Canaánnaꞌ goneꞌ xshineꞌnaꞌ!
27 ¡Chiozaꞌ gakleneꞌ Jafetaꞌ gatꞌ bi gatꞌ c̱heꞌ,
naꞌ soagakeꞌ wen kon beṉꞌ bishee Semaꞌ,
naꞌ Canaánnaꞌ goneꞌ llin c̱heꞌkaꞌ!”