Chiyex̱j nisaꞌ lo yell-lionaꞌ
8
Naꞌ yoo yic̱hj Chiozaꞌ Noénaꞌ len bayix̱ꞌkaꞌ yoo lo barkwaꞌ,
naꞌ beneꞌ to beꞌ xen kwenc̱he biyex̱j nisaꞌ lo yell-lionaꞌ.
2 Naꞌ Chiozaꞌ bzeejeꞌ nisaꞌ daa chal ḻoo yell-lionaꞌ naꞌ bkwezeꞌ yejaꞌ.
3 Naꞌ nisaꞌ wzolo chiyex̱jan shoolallꞌ shoolallꞌ,
bllinte to guiyoa yoo gashjə lla.
4 Ka gok shinꞌc̱hop lla c̱he beoꞌ gallaꞌ naꞌ wcheꞌ barkwaꞌ to lo yaa daa le Ararat.
5 Naꞌ nisaꞌ zejch chiyex̱jan naꞌ lla nech c̱he de shi bewaa ba chileꞌgakileꞌ latꞌ wejə yaa yeḻkaꞌ.
6 Ka wde c̱hoa llanaꞌ Noénaꞌ bsaljeꞌ ganaꞌ bzoeꞌ shoꞌ beeniꞌnaꞌ ḻoo barkwaꞌ
7 naꞌ bsaneꞌ to bec̱hj.
Naꞌ bec̱hjaꞌ chdab to ki to kaꞌlə chbezb yibill lo yonaꞌ.
8 Ka wde bsaneꞌ bec̱hjaꞌ,
naꞌ bsaneꞌ sto palom lljawiab shi ba bic̱hag lo yonaꞌ.
9 Naꞌ palomaꞌ billim ganaꞌ chiꞌ barkwaꞌ stoshii ḻaꞌ bi bllelib ga gak kwiab,
daa ni llia nisaꞌ lo yell-lionaꞌ.
Naꞌ Noénaꞌ bḻi neenaꞌ biyox̱ee palomaꞌ naꞌ bigooshaweeb ḻoo barkwaꞌ.
10 Noénaꞌ wlezeꞌ zi gall lla naꞌ wlejeꞌ palomaꞌ sto shii.
11 Ba zoa gaḻ ka billin palomaꞌ sto shii zinzoa choꞌab to xḻagꞌ yag olivo.
Naꞌ gokbeꞌi Noénaꞌ nan ba chic̱hag lo yell-lionaꞌ.
12 Naꞌ wlezeꞌ zi gall lla,
naꞌ wlejeꞌ palomaꞌ sto shii,
naꞌ palomaꞌ bich billim.
13 Ka goki Noénaꞌ x̱op guiyoa to yiz,
naꞌ lla nech c̱he beoꞌ nechaꞌ,
bisaljeꞌ yic̱hj barkwaꞌ naꞌ bleꞌileꞌ lo yell-lionaꞌ ba bic̱hagan.
14 Naꞌ lla gallichoa beoꞌ wchopinaꞌ yell-lionaꞌ ba bic̱hagan.
15 Naꞌ goll Chiozaꞌ Noénaꞌ:
16 “Bichej ḻoo barkwaꞌ len nool c̱hoꞌnaꞌ len biꞌ c̱hoꞌkaꞌ,
naꞌ xoolilloꞌkaꞌ.
17 Naꞌ bishesh yogꞌḻoḻ bayix̱ꞌkaꞌ wyoolenoꞌ:
bakaꞌ zoa x̱ilin,
bayix̱ꞌkaꞌ chda yaa yao,
naꞌ ba chx̱ob ḻeeyin lo yonaꞌ kwenc̱he yiyongakb biṉ naꞌ yiyesh yiyangakb lo yell-lioni.”
18 Naꞌ Noénaꞌ len xooleꞌnaꞌ,
len xiiṉeꞌkaꞌ naꞌ xoolilleꞌkaꞌ bichejgakeꞌ ḻoo barkwaꞌ,
19 len yogꞌḻoḻ bayix̱ꞌkaꞌ:
ba lleꞌ yaa yao,
naꞌ ba chx̱obə ḻeeyin,
naꞌ badoꞌ chzo lo llazə.
20 Naꞌ Noénaꞌ lii bentieꞌ to x̱oṉj de yaj ga wzeyeꞌ bayix̱ꞌkaꞌ chzanileꞌ wiꞌe Chiozaꞌ.
Naꞌ bex̱ee badoꞌkaꞌ nak ba xilallꞌ,
ka ba chda lo yonaꞌ ka badoꞌ chzo lo llazə,
naꞌ beteꞌ ḻegakb naꞌ tech bzeyeꞌgakb kwenc̱he beꞌlawee Chiozaꞌ.
21 Ka billin shii xḻaabkaꞌ chḻaan sia lao Chiozaꞌ.
Naꞌ wneꞌ:
“Bich c̱hishj biaꞌ blagꞌ c̱he yell-lioni ni c̱heyi dii malkaꞌ chon beṉꞌki,
ḻaꞌ beṉꞌki kon ka ba zej chgolgakeꞌ shgaꞌḻ dii mal cheengakileꞌ gongakeꞌ.
Ḻekzkaꞌ bich wlliayaa yogꞌḻoḻ dii de yeḻꞌ mban c̱heyin,
ka ba benzꞌ ṉaa.
22 “Shlak de yell-lioni,
ni to diiki biga wkwezꞌgakan,
wakə gaz gaaṉ beṉꞌ naꞌ yiziꞌ yilapeꞌ,
naꞌ gatꞌ dii zeyꞌ naꞌ dii zag,
naꞌ gatꞌ laꞌo ba naꞌ laꞌo lin,
naꞌ gatꞌ tella naꞌ waḻ.”