Yej siwꞌ walaꞌ
7
Naꞌ ka biyoll diiki ṉaa Chiozaꞌ golleꞌ Noénaꞌ:
“Wyoolen xiiṉ xooloꞌkaꞌ ḻoo barkwaꞌ.
Ḻaꞌ ladj yogꞌ beṉꞌ yell-lioni,
liꞌchokzə zeelo chleꞌidꞌ chonoꞌ wen.
2 Naꞌ wloo gall kweꞌ wejə bayix̱ꞌ,
bakaꞌ benꞌ ba xilallꞌ,
gall ba yag naꞌ gall ba noolə,
naꞌ zi shkweꞌ wejzə bakaꞌ bi nak ba xilallꞌ,
to ba yag to ba noolə.
3 Naꞌ ḻekzkaꞌ wloo gall kweꞌ wejə ba zoa x̱ilin,
to tez to bnaꞌ,
kwenc̱he gak yiyongakb biṉ yell-lioni.
4 Ḻaꞌ zi gall llazə chyallj gonꞌ to yej lo yell-lioni naꞌ gakan c̱hoa lla c̱hoa yel,
naꞌ yisol yiṉitꞌ yogꞌḻoḻ dii ba biꞌa yeḻꞌ mban c̱heyin lo yell-lioni dga bx̱iaꞌ.”
5 Naꞌ Noénaꞌ beneꞌ yogꞌḻoḻ daa goll Chiozaꞌneꞌ.
6 Ka wzolo chkwashꞌ nisaꞌ lo yell-lioni,
Noénaꞌ ba zejileꞌ x̱op guiyoa yiz.
7 Naꞌ biyoo Noénaꞌ ḻoo barkwaꞌ kon xiiṉeꞌkaꞌ len nool c̱heꞌnaꞌ naꞌ xoolilleꞌkaꞌ kwenc̱he bilagakeꞌ bi witgakeꞌ lo nis yejaꞌ.
8 Naꞌ bayix̱ꞌkaꞌ,
bakaꞌ nak ba xilallꞌ,
naꞌ bakaꞌ bi nak ba xilallꞌ,
ka bakaꞌ chzo lo llazə,
ka bakaꞌ chx̱ob ḻeeyin lo yonaꞌ,
9 biyoolengakb Noénaꞌ ḻoo barkwaꞌ shkweꞌ wejb,
to ba yag to ba noolə,
kon ka goll Chiozaꞌ ḻeꞌ goneꞌ.
10 Naꞌ ka gok gall llakaꞌ,
nis yejaꞌ wzolo chakan lo yell-lioni.
11 Naꞌ lo yizaꞌ goki Noénaꞌ x̱op guiyoa yiz,
lla shinꞌc̱hop c̱he beoꞌ wchopinaꞌ wzolo chak yej zban walaꞌ naꞌ ḻekzkaꞌ wzolo chal nisaꞌ lo yell-lioni.
12 C̱hoa lla c̱hoa yel gok yejaꞌ lo yell-lioni.
13 Naꞌ lo llanaꞌ ka wzolo yejaꞌ biyoo Noénaꞌ ḻoo barkwaꞌ len xiiṉeꞌkaꞌ le Sem,
Cam naꞌch Jafet,
naꞌ nool c̱heꞌnaꞌ naꞌ shoṉte xoolilleꞌkaꞌ.
14 Naꞌ biyoolengakeꞌ yogꞌḻoḻ kwen bayix̱ꞌ,
ka ba lleꞌ yaa yao,
naꞌ ka ba chisgoleꞌ,
naꞌ ba chx̱ob ḻeeyin,
naꞌ ba chzo lo llazə.
15 Yogꞌḻoḻ bayix̱ꞌkaꞌ biyoolengakb Noénaꞌ ḻoo barkwaꞌ shkweꞌ wejb,
16 to ba yag to ba noolə lao yogꞌḻoḻ ba de yeḻꞌ mban c̱heyin,
kon ka goll Chiozaꞌ Noénaꞌ goneꞌ.
Naꞌ ka wyoogakeꞌ naꞌ bisej Chiozaꞌ choꞌa puert c̱he barkwaꞌ.
17 Naꞌ yejsiwaa wzen c̱hoa lla.
Naꞌ ka wzolo chep nisaꞌ naꞌ wzollaꞌ barkwaꞌ chdan lo nisaꞌ.
18 Naꞌ ka zejch chep nisaꞌ naꞌ barkwaꞌ ḻekzkaꞌ zejch chdan lo nisaꞌ.
19 Naꞌ wyepchga nisaꞌ naꞌ bkwashaan yaa yeḻkaꞌ diikaꞌ ḻiizelozə nak yaa xench yell-lioni.
20 Ka biyoll bgashꞌ yaa diikaꞌ ḻiizelozə nakch dii xen,
naꞌ nisaꞌ wyepchan ka zi shinꞌ llit wdeli.
21 Kaꞌ gok wit yogꞌḻoḻ dii de yeḻꞌ mban c̱heyin lo yell-lioni,
yogꞌ ba zoa x̱ilin,
yogꞌ bayix̱ꞌ ba chisgoleꞌ lilleꞌ,
yogꞌ ba lleꞌ yaa yao,
naꞌ yogꞌ ba chx̱obə ḻeeyin lo yonaꞌ,
naꞌ yogꞌḻoḻ beṉꞌkaꞌ wzoa yell-lioni.
22 Yogꞌḻoḻ dii gotꞌ yeḻꞌ mban c̱heyin lo yell-lioni wlliayiꞌn.
23 Yogꞌḻoḻ dii de yeḻꞌ mban c̱heyin lo yell-lioni wlliayiꞌgakan ka beṉec̱h,
ka bayix̱ꞌ,
ka ba chisgoleꞌ lilleꞌ,
ka ba chda xan yabanaꞌ,
naꞌ ka ba chx̱obə ḻeeyin lo yonaꞌ.
Zeelo Noénaꞌ naꞌ beṉꞌkaꞌ yooleneꞌ ḻoo barkwaꞌ bilagakeꞌ naꞌ len bayix̱ꞌkaꞌ biyoolengakeꞌ txen.
24 Naꞌ nisaꞌ wllian lo yell-lioni to guiyoa yoo gashjə lla.