Chx̱iṉj chḻen beṉꞌ yell-lionaꞌ
6
Naꞌ ka wzolo chesh chalj beṉec̱haꞌ yell-lioni naꞌ wzoa xiiṉgakeꞌ biꞌ noolə.
2 Naꞌ beṉꞌkaꞌ nak xiiṉ Chios,a
bleꞌgakileꞌ noolkaꞌ nakgakeꞌ xochi.
Naꞌ wlejgakeꞌ beṉꞌ chazlallꞌgakeꞌ kwenc̱he gakgakeꞌ nool c̱hegakeꞌ.
3 Naꞌ wna Chiozaꞌ:
“Bi wiꞌa latj soa beṉec̱haꞌ toshiizi,
san yikaa bishbenaꞌ daa beꞌgakee daa choꞌen yeḻꞌ mban c̱heꞌkaꞌ,
ḻaꞌ nakgakeꞌ beṉꞌ de beli chenzə.
Zeelo x̱oplalj yizzə ibangakeꞌ.”
4 Naꞌ wzoa beṉꞌ nakeꞌ beṉꞌ toṉə naꞌ beṉꞌ yeḻə kanaꞌ wkaa beṉꞌkaꞌ nak “xiiṉ Chios” noolkaꞌ nak xiiṉ beṉec̱h.
Naꞌ xiiṉ beṉꞌki gokgakeꞌ beṉꞌ wal naꞌ wzeyi c̱hegakeꞌ kaniꞌyi.
5 Naꞌ bleꞌi Chiozaꞌ ziꞌtelə ba chx̱iṉj chḻen beṉꞌ yell-lionaꞌ,
naꞌ yic̱hjlalldoeꞌkaꞌ toshiizi yoon gongakeꞌ daa bi nak wen.
6 Naꞌ biyaji Chiozaꞌ daa bx̱e bsileꞌ beṉꞌ yell-lionaꞌ naꞌ gokyeshii yic̱hjlallꞌdoꞌenaꞌ.
7 Naꞌ wneꞌ:
“Yisol yiṉitꞌ beṉꞌkaꞌ bx̱e bsilꞌ lo yell-lionaꞌ,
naꞌ yogꞌḻoḻte bayix̱ꞌkaꞌ,
ḻaꞌ chiyajidꞌ daa benꞌ yogꞌ diikaꞌ de lo yell-lionaꞌ.”
8 San Noénaꞌ,
ḻe bleꞌshii Chiozaꞌ ḻeꞌ.
Noénaꞌ choneꞌ barkwaꞌ
9 Ki nak daa gok c̱he Noénaꞌ.
Noénaꞌ nakeꞌ beṉꞌ wen beṉꞌ shaoꞌ lao yogꞌḻoḻ beṉꞌkaꞌ wnitꞌ kaniꞌyi,
naꞌ wzoaleneꞌ Chiozaꞌ mbalaz.
10 Naꞌ Noénaꞌ wzoa shoṉə xiiṉeꞌ,
naꞌ wlegakeꞌ Sem,
Cam naꞌ Jafet.
11 Naꞌ chwia Chiozaꞌ beṉꞌ yell-lionaꞌ bich nxe nzakꞌ daa chongakeꞌ naꞌ bich bi nallgakileꞌ.
12 Naꞌ chwieꞌ yogꞌḻoḻ beṉꞌ bich nkaa xṉezin bin chongakeꞌ,
naꞌ ziꞌtelə ba nx̱iṉj nḻengakeꞌ laweꞌnaꞌ.
13 Naꞌ goll Chiozaꞌ Noénaꞌ:
“Ba nc̱hoglallaa wlliayaa yogꞌḻoḻ beṉꞌki,
ḻaꞌ bich nxe bich nzakꞌ daa chak lo yell-lioni ni c̱hegakeꞌ.
Naꞌ wlliayiꞌgakee len doxen yell-lioni.
14 Naꞌ ben to barkw de yag wal naꞌ wlejan zan kwenlə,
naꞌ bwazjan to dii bi weꞌn latj sholl nisaꞌ ḻoꞌinnaꞌ.
15 Naꞌ gonoꞌn shoṉə guiyoa llit de zdoṉlə,
naꞌ shiyon llit de zlagꞌlə,
naꞌ shichoa llit de siblə.
16 Naꞌ wsaljoꞌ to ga shoꞌ beeniꞌnaꞌ,
wletjoꞌn tllit ka de yic̱hjlə barkwaꞌ.
Naꞌ wzoꞌ to choꞌayin kwit ḻeꞌinnaꞌ,
naꞌ gonoꞌn shoṉ kwia.
17 Naꞌ nadꞌ gonꞌ to yejsiwꞌ wal lao yell-lioni dii yisol yiṉitan(*) zgade dii de yeḻꞌ mban c̱heyin.
Naꞌ yogꞌḻoḻte dii de bishbe c̱heyin kwiayiꞌ.
18 Naꞌ nadꞌ chc̱hebꞌ soalenꞌ liꞌ,
naꞌ yiyoolenoꞌ xiiṉoꞌkaꞌ,
naꞌ xooloꞌnaꞌ naꞌ xoolilloꞌkaꞌ ḻoo barkwaꞌ.
19 Naꞌ ḻekzkaꞌ yigoo to ba yag to ba noolə lao yogꞌ kwen bayix̱ꞌkaꞌ lleꞌ lo yell-lioni ḻoo barkwaꞌ,
kwenc̱he bi kwiayiꞌgakb.
20 Ka ba zoa x̱ilin,
ka ba chda yaa yao,
ka ba chx̱ob ḻeeyin,
yitiḻoꞌb to ba yag to ba noolə,
naꞌ yiyoolengakoob kweṉche bi guetgakb.
21 Naꞌ ḻekzkaꞌ btop bshag bi dii gak gawoꞌ naꞌ dii gao bayix̱ꞌkaꞌ naꞌ wlooshawaan.”
22 Naꞌ ben Noénaꞌ yogꞌḻoḻ ka goll Chiozaꞌ ḻeꞌ.