Xiiṉ dia c̱he Adánnaꞌ
(1 Cr. 1:1-4)
5
Nin daꞌ le yogꞌḻoḻ xiiṉ dia c̱he Adánnaꞌ.
Kanaꞌ bx̱e bsil Chiozaꞌ beṉꞌ yell-lioni beneꞌ ḻegakeꞌ ka ḻeꞌ.
2 Beneꞌ to beṉꞌ byo naꞌ to noolə naꞌ benḻeeyeꞌ ḻegakeꞌ.
Naꞌ llanaꞌ bx̱e bsileꞌ ḻegakeꞌ bsiꞌe ḻegakeꞌ “beṉec̱h”.
3 Naꞌ ka goki Adánnaꞌ to guiyoa shichoa yiz naꞌ wzoa to xiiṉeꞌ gokbꞌ katekzə ḻeꞌ,
naꞌ bsiꞌebꞌ Set.
4 Naꞌ wbaneꞌ zi x̱onꞌ guiyoa yiz naꞌ wzoach xiiṉeꞌ,
biꞌ byo naꞌ biꞌ noolə.
5 Adánnaꞌ wbaneꞌ ga guiyoa shichoa yiz naꞌ witeꞌ.
6 Ka goki Setaꞌ to guiyoa gayꞌ yiz naꞌ wzoaꞌ to xiiṉeꞌ naꞌ bsiꞌebꞌ Enós.
7 Naꞌ Setaꞌ wzoacheꞌ zi x̱onꞌ guiyoa gall yiz,
naꞌ wzoach xiiṉeꞌ,
biꞌ byo naꞌ biꞌ noolə.
8 Setaꞌ wbaneꞌ ga guiyoa shlliṉ yiz naꞌ witeꞌ.
9 Ka goki Enózaꞌ taplalj shi yiz naꞌ wzoaꞌ to xiiṉeꞌ naꞌ bsiꞌebꞌ Cainán.
10 Naꞌ wzoach Enózaꞌ zi x̱onꞌ guiyoa shinꞌ yiz naꞌ wzoach xiiṉeꞌ,
biꞌ byo naꞌ biꞌ noolə.
11 Enózaꞌ wbaneꞌ ga guiyoa gayꞌ yiz naꞌ witeꞌ.
12 Ka goki Cainánnaꞌ guiyonshi yiz naꞌ wzoa to xiiṉeꞌ naꞌ bsiꞌebꞌ Mahalaleel.
13 Naꞌ wzoach Cainánnaꞌ zi x̱onꞌ guiyoa c̱hoa yiz naꞌ wzoach xiiṉeꞌ,
biꞌ byo naꞌ biꞌ noolə.
14 Cainánnaꞌ wbaneꞌ ga guiyoa shi yiz naꞌ witeꞌ.
15 Ka goki Mahalaleelaꞌ guiyon gayꞌ yiz naꞌ wzoa to xiiṉeꞌ naꞌ bsiꞌebꞌ Jared.
16 Naꞌ wzoach Mahalaleelaꞌ zi x̱onꞌ guiyoa shichoa yiz naꞌ wzoach xiiṉeꞌ,
biꞌ byo naꞌ biꞌ noolə.
17 Mahalaleelaꞌ wbaneꞌ x̱onꞌ guiyoa taplalj shinꞌ yiz naꞌ witeꞌ.
18 Naꞌ goki Jaredaꞌ to guiyoa guiyon c̱hop yiz naꞌ wzoa to xiiṉeꞌ naꞌ bsiꞌebꞌ Enoc.
19 Naꞌ wzoach Jaredaꞌ zi x̱onꞌ guiyoa yiz naꞌ wzoach xiiṉeꞌ,
biꞌ byo naꞌ biꞌ noolə.
20 Jaredaꞌ wbaneꞌ ga guiyoa guiyon c̱hop yiz naꞌ witeꞌ.
21 Naꞌ goki Enocaꞌ guiyon gayꞌ yiz naꞌ wzoaꞌ to xiiṉeꞌ naꞌ bsiꞌebꞌ Matusalén.
22 Enocaꞌ toshiizi wzoaleneꞌ Chiozaꞌ mbalaz.
Ka biyoll wzoa xiiṉeꞌ Matusalénnaꞌ,
naꞌ wzoacheꞌ zi shoṉ guiyoa yiz naꞌ wzoach xiiṉeꞌ,
biꞌ byo naꞌ biꞌ noolə.
23 Enocaꞌ wbaneꞌ shoṉ guiyoa guiyon gayꞌ yiz.
24 To shlak ka wzoa Enocaꞌ toshiizi wzoaleneꞌ Chiozaꞌ mbalaz,
naꞌ bllin lla Chiozaꞌ bigoyoeꞌneꞌ naꞌ binitloeꞌ lo yell-lioni.
25 Naꞌ goki Matusalénnaꞌ to guiyoa taplalj gall yiz naꞌ wzoa to xiiṉeꞌ naꞌ bsiꞌebꞌ Lamec.
26 Naꞌ wzoach Matusalénnaꞌ zi gall guiyoa taplalj c̱hop yiz naꞌ wzoach xiiṉeꞌ,
biꞌ byo naꞌ biꞌ noolə.
27 Matusalénnaꞌ wbaneꞌ ga guiyoa guiyon ga yiz naꞌ witeꞌ.
28 Naꞌ Lamecaꞌ wzoeꞌ to guiyoa taplalj c̱hop yiz naꞌ wzoa to xiiṉe,
29 naꞌ bsiꞌebꞌ Noé.
Naꞌ wneꞌ:
“Biꞌni yiyoṉbꞌ to yeḻꞌ chxenlallꞌ c̱hecho lao yeḻꞌ ziꞌni dga chdecho choncho llin lao yell-lioni dga wdishj Chiozaꞌ biaꞌ blagꞌ c̱heyin.”
30 Naꞌ ka wde golj Noénaꞌ wzoach Lamecaꞌ zi gayꞌ guiyoa taplalj shinꞌ yiz,
naꞌ wzoach xiiṉeꞌ,
biꞌ byo naꞌ biꞌ noolə.
31 Lamecaꞌ wbaneꞌ gall guiyoa guiyon shinꞌc̱hop yiz,
naꞌ witeꞌ.
32 Ka goki Noénaꞌ gayꞌ guiyoa yiz naꞌ wzoa xiiṉeꞌkaꞌ,
tobꞌ le Sem,
stobꞌ le Cam,
naꞌ biꞌnaꞌ sto lebꞌ Jafet.