Chit Caínnaꞌ beṉꞌ bisheenaꞌ
4
Naꞌ Adánnaꞌ bdiꞌe nool c̱heꞌ,
Évanaꞌ,
naꞌ biꞌe to bdoꞌ,
naꞌ wxaneꞌ to biꞌ byodoꞌ naꞌ bsiꞌebꞌ Caín.
Naꞌ wna Évanaꞌ:
“Ba goklen Chiozaꞌ nadꞌ,
ba wxanꞌ to biꞌ byodoꞌ.”
2 Naꞌtechlə wxaneꞌ stobꞌ naꞌ bsiꞌebꞌ Abel.
Naꞌ Abelaꞌ gokeꞌ x̱an xilꞌ naꞌ Caínnaꞌ beneꞌ llin lyix̱ꞌ.
3 Naꞌ ka bllin lla wllia diikaꞌ goz Caínnaꞌ naꞌ jwee latꞌ daa bzanileꞌ wiꞌe Chiozaꞌ.
4 Naꞌ ḻekzkaꞌ Abelaꞌ jwee xilꞌ nechdoꞌkaꞌ mbejlawin.
Naꞌ ḻe biyoolallii Chiozaꞌ daa jwaꞌ Abelaꞌ,
naꞌ ḻe bleꞌshiileꞌneꞌ.
5 Naꞌ bi wyoolallee ka nak diikaꞌ jwaꞌ Caínnaꞌ,
naꞌ bi bleꞌshiileꞌneꞌ.
Naꞌ ḻe bllaachga Caínnaꞌ naꞌ bze choꞌalaweꞌ.
6 Naꞌ goll Chiozaꞌ Caínnaꞌ:
“¿Berac̱he chllaa yic̱hjzoꞌ naꞌ nzezə choꞌalawoꞌ?
7 Sheḻꞌ liꞌ chonoꞌ wen naꞌ yiyoolallaa daa chonoꞌ.
Daa bi chonoꞌ wen naꞌ dii malaꞌ zoan chbezan liꞌ kwenc̱he iṉabiaꞌn liꞌ.
Per ṉaa ni dech latj gonoꞌ daa nak wen kwenc̱he bi gatꞌ latj c̱he dii malaꞌ iṉabiaꞌn liꞌ.”
8 Naꞌ bllin to lla goll Caínnaꞌ beṉꞌ bishee Abelaꞌ:
―¿Abi shajtocho lyix̱aa?
Naꞌ ka ba lleꞌgakeꞌ lyix̱aa,
Caínnaꞌ wzoloeꞌ chit chyineꞌ beṉꞌ bisheenaꞌ blliayiꞌtieꞌneꞌ.
9 Naꞌ Chiozaꞌ wṉabileꞌ Caínnaꞌ chiꞌe:
―¿Gaṉ biꞌ bishoo,
Abelaꞌ?
Naꞌ billiꞌeneꞌ dillꞌ,
chiꞌe:
―Bi ṉezidꞌ.
Aga biꞌ bishaananꞌ chapꞌ.
10 Naꞌ goll Chiozaꞌneꞌ:
―¿Beran ba benoꞌ?
Chen c̱he beṉꞌ bishoonaꞌ daa ba blaljoꞌ lo yell-lionaꞌ chawan xya lawaꞌni.
11 Naꞌ daa benoꞌ kaꞌ aga bi dii wen gak c̱hoꞌ naꞌ ichejoꞌ lo yell-lioni dga ba weej xc̱hen beṉꞌ bishoonaꞌ.
12 Katꞌ gonoꞌ llin lo yell-lioni aga bich bi kwian yeej gawoꞌ.
Naꞌ kaꞌchokzə toꞌ liꞌ,
bi yiyoll bi yido toꞌ kaꞌ.
13 Naꞌ Caínnaꞌ golleꞌ Chiozaꞌ:
―Dii bi so sakꞌkziꞌdꞌ yeḻꞌ zakꞌziꞌ dga ba wnoꞌ gak c̱haꞌ.
14 Naꞌ ṉaa chlagoꞌ nadꞌ yell-lioni gani zoaꞌ naꞌ ni liꞌ bich soalenoꞌ nadꞌ.
Naꞌ ichejꞌ lljtashazꞌ ni bich bi yeḻꞌ wixilallꞌ c̱haꞌ gatꞌ lo yell-lioni.
Naꞌ nottezə yidiḻ yillagꞌ witeꞌ nadꞌ.
15 Naꞌ cheꞌ Chiozaꞌ ḻeꞌ:
―Shi no wit liꞌ,
naꞌ igol daa yen ileꞌileꞌ gall shii aga ka yeḻꞌ zakꞌziꞌ daa yen ileꞌiloꞌ.
Naꞌch Chiozaꞌ wloꞌe Caínnaꞌ to seṉ kwenc̱he nottezə yidiḻ yillagueꞌ bi witeꞌneꞌ.
16 Naꞌ bchej Caínnaꞌ yell-lionaꞌ ganaꞌ choeꞌlen Chiozaꞌneꞌ dillaa,
naꞌ jsoeꞌ to yell-lio dii le Nod,
daa de shḻaa yell-lio Edénnaꞌ zaakli ganaꞌ chlaꞌlə wbillaꞌ.
Xiiṉ dia c̱he Caínnaꞌ
17 Naꞌ bdiꞌ Caínnaꞌ noolə c̱heꞌnaꞌ naꞌ biꞌe to bdoꞌ.
Naꞌ wxaneꞌ to biꞌdoꞌ naꞌ bsiꞌebꞌ Enoc.
Naꞌ ḻekzkaꞌ bx̱ieꞌ to yell naꞌ bsiꞌen Enoc ka le biꞌ c̱heꞌnaꞌ.
18 Naꞌ wzoa to xiiṉ Enocaꞌ naꞌ wlebꞌ Irad.
Naꞌtech Iradaꞌ wzoa to xiiṉeꞌ naꞌ wlebꞌ Mehujael.
Naꞌ Mehujaelaꞌ wzoa to xiiṉeꞌ naꞌ wlebꞌ Metusael.
Naꞌ Metusaelaꞌ wzoa to xiiṉeꞌ naꞌ wlebꞌ Lamec.
19 Naꞌ Lamecaꞌ wzoaleneꞌ c̱hop nool.
Beenaꞌ to wlieꞌ Ada naꞌ beenaꞌ sto,
Zila.
20 Naꞌ Ádanaꞌ wxaneꞌ to biꞌ bsiꞌe Jabal,
beenaꞌ nak x̱ozxtoꞌ beṉꞌkaꞌ chdalen bayix̱ꞌ c̱heꞌkaꞌ chisgolgakeꞌb to ni to naꞌ,
naꞌ chzoagakeꞌ lilleꞌkaꞌ daa nongakeꞌ de yid xa bayix̱ꞌkaꞌzə.
21 Naꞌ beṉꞌ bisheenaꞌ wlieꞌ Jubal,
beenaꞌ wdiljlallee árpanaꞌ naꞌch bllejaꞌ.
Naꞌ ḻeꞌ nakeꞌ x̱ozxtoꞌ beṉꞌkaꞌ chsillgakeꞌ árpanaꞌ naꞌ chkwellgakeꞌ bllejaꞌ.
22 Naꞌ ḻekzkaꞌ Zílanaꞌ wxaneꞌ to biꞌ bsiꞌe Tubal-caín,
beenaꞌ gok wic̱hekw ya,
naꞌ beneꞌ bittezə dii nak de ya.
Naꞌ beṉꞌ zan Tubal-caínnaꞌ wlieꞌ Naama.
23 Naꞌ Lamecaꞌ golleꞌ c̱hopte beṉꞌkaꞌ nak xooleꞌ:
“Liꞌ Ada naꞌ Zila,
leꞌ nakle nool c̱haꞌ,
ḻi wzenag dga iṉiaꞌ leꞌ:
ba betꞌ to biꞌ xkwidꞌ,
to biꞌ bet wdimꞌ nadꞌ naꞌ bemꞌ nadꞌ ziꞌ.
24 Shi beenaꞌ witeꞌ Caínnaꞌ tieꞌ yeḻꞌ ziꞌ gall shii,
naꞌ nadꞌ,
shi no wit nadꞌ,
dii ḻi niaꞌ guiyon shinꞌc̱hop shii tieꞌ yeḻꞌ ziꞌnaꞌ.”
Chzoa xiiṉ Adánnaꞌ, beenaꞌ le Set
25 Naꞌ wizzolo bizoa xiiṉ Adánnaꞌ kon nool c̱heꞌnaꞌ.
Naꞌ bizaneꞌ to biꞌ byo naꞌ bsiꞌebꞌ Set,
naꞌ wneꞌ:
“Chiozaꞌ ba biyoṉeꞌ sto biꞌ c̱haꞌ lwaa Abelaꞌ,
biꞌnaꞌ bet Caínnaꞌ.”
26 Naꞌ beenaꞌ wleꞌ Set ḻekzkaꞌ wzoa to xiiṉeꞌ naꞌ bsiꞌebꞌ Enós.
Naꞌ kananꞌ beṉꞌkaꞌ bembiaꞌgakeꞌ le Chiozaꞌ,
naꞌ wzologakeꞌ cheꞌgakeꞌneꞌ “X̱anntoꞌ Chios” katꞌ choeꞌḻwillgakeꞌneꞌ.