Adánnaꞌ naꞌ Évanaꞌ bi chzenaggakeꞌ c̱he Chiozaꞌ
3
Naꞌ beḻaꞌ gokchb ba wxiyeꞌ walch lao yogꞌḻoḻ bayix̱ꞌ, ba lleꞌ yaa yao, ba bx̱e bsil X̱ancho Chiozaꞌ. Naꞌ wṉabib noolaꞌ, cheꞌb:―¿Anaꞌ na Chiozaꞌ bi gak gaole dii zix̱ki llia lo yagki lleꞌ ni?
2 Naꞌ noolaꞌ golleꞌb:
―Wak gaontoꞌ yogꞌ diiki llia lo yagki lleꞌ ni. 3 Toz daa llia lo yagaꞌ daa zoa gchoḻaꞌ na Chiozaꞌ netoꞌ bi gak gaontoꞌn ni bi gak gox̱ꞌntoꞌn, ḻaꞌ shi bi wzenagntoꞌ ka neꞌ naꞌ guetntoꞌ.
4 Naꞌch beḻaꞌ cheꞌb noolaꞌ:
―Naz beenaꞌ. Aga wetle leꞌ. 5 C̱hezə daa ṉezi Chiozaꞌ katꞌ ba wdaolennanꞌ naꞌ gaple yeḻꞌ sinꞌ ka daa napeꞌ ḻeꞌ, naꞌ iṉezile dii wennaꞌ naꞌ dii malaꞌ.
6 Naꞌ bleꞌi noolaꞌ daa llia lo yagaꞌ nakan dii gak gaweꞌ naꞌ wzelallee gaweꞌn kwenc̱he gakeꞌ beṉꞌ sinꞌ. Naꞌ bshibeꞌ ton wdaweꞌn naꞌ ḻekzkaꞌ biꞌen beṉꞌ c̱heꞌnaꞌ wdaweꞌn. 7 Naꞌ wzolo gokbeꞌgakileꞌ nan gaḻꞌyid gaḻꞌbelꞌgakenꞌ chda. Naꞌ wdiagakeꞌ ḻagꞌ c̱he yix̱wewaꞌ naꞌ bc̱hingakeꞌn ka xagakeꞌ.
8 Naꞌ ka ba chlleꞌ, gokbeꞌi beṉꞌ byonaꞌ len nool c̱heꞌnaꞌ chda X̱ancho Chiozaꞌ ganaꞌ nzoeꞌ ḻegakeꞌ, naꞌ bllebgakeꞌ naꞌ bkwashꞌgakeꞌ ḻoo yagkaꞌ. 9 Naꞌ wṉe X̱ancho Chiozaꞌ Adánnaꞌ, chiꞌeneꞌ:
―¿Gaṉoꞌ, Adán?
10 Naꞌ cheꞌ beṉꞌ byonaꞌ:
―Benidꞌ chdoꞌ ḻoo yagki, naꞌ bllebꞌ daa chdaꞌ gaḻꞌyid gaḻꞌbelꞌzꞌ, naachan bkwashꞌdoaꞌ.
11 Naꞌ cheꞌ Chiozaꞌneꞌ:
―¿Nora wna liꞌ nan gaḻꞌyid gaḻꞌbelꞌzonꞌ chda? ¿Aba wdawoꞌ daa llia lo yagaꞌ daa niaꞌ liꞌ bi gak gawoꞌ?
12 Naꞌ cheꞌ beṉꞌ byonaꞌ:
―Nooli beṉoꞌ nadꞌ kwenc̱he nakntoꞌ txen ḻenꞌ beṉeꞌn naꞌ wdawaꞌn.
13 Naꞌ X̱ancho Chiozaꞌ chiꞌe noolaꞌ:
―¿Beran ba benoꞌ?
Naꞌ cheꞌ noolaꞌ ḻeꞌ:
―Beḻanꞌ wxiyeeb nadꞌ naꞌchan wdawaꞌn.
14 Naꞌ X̱ancho Chiozaꞌ golleꞌ beḻaꞌ:
―Ka nak dga ba benoꞌ, dii walchlə gak c̱hoꞌ aga ka nochlə bayix̱ꞌ, ba lleꞌ yaa yao. Ṉaa solo wxobzi ḻiꞌonaꞌ naꞌ bishte yell-lionizə gawoꞌ shnon mbanoꞌ. 15 Naꞌ gonꞌ ka bi ileꞌshii ljwell-le, liꞌ kon nooli, dia c̱hoꞌnaꞌ kon dia c̱heꞌnaꞌ. Naꞌ dia c̱heꞌnaꞌ wshoshjeꞌ yic̱hjoꞌnaꞌ, naꞌ liꞌ kwawoo shikṉiꞌenaꞌ(*).
16 Naꞌ golleꞌ noolaꞌ:
―Gonꞌ ka sakꞌziꞌchoꞌ dii walch katꞌ soa xiiṉoꞌ, naꞌ shey iloꞌ katꞌ sanoꞌ. Naꞌ selalloo beṉꞌ c̱hoꞌnaꞌ, naꞌ ḻeꞌ iṉabiꞌe liꞌ.
17 Naꞌ Chiozaꞌ chiꞌe Adánnaꞌ:
―Daa bzenagoꞌ bin wna nool c̱hoꞌni naꞌ wdawoꞌ daa llia lo yagaꞌ daa niaꞌ liꞌ bi gak gawoꞌ, naꞌ ṉaa c̱hishjꞌ biaꞌ blagꞌ lao yell-lioni, naꞌ bi gak wen lawinnaꞌ ni c̱hoꞌ liꞌ. Naꞌ yeḻꞌ zakꞌziꞌ xen wal ileꞌiloꞌ kwenc̱he gatꞌ dii yeej gawoꞌ shlak ibanoꞌ. 18 Naꞌ gashj iḻeb no yag yeshꞌ lo yell-lio c̱hoꞌnaꞌ, naꞌ no yix̱ꞌ kwanzə yeej gawoꞌ. 19 Kon nis yes daa ixop choꞌalawoꞌnaꞌ gonoꞌ gan daa yeej gawoꞌ ax̱t ka yiyakchoꞌ bishte, ḻaꞌ bishte yell-lioni wyaꞌ wbiṉiloꞌ naꞌ bishte yell-lio yiyakoꞌ sto shii.
20 Naꞌ bsiꞌ Adánnaꞌ nool c̱heꞌnaꞌ Eva, ḻaꞌ ḻenꞌ gakeꞌ xṉaꞌ yogꞌḻoḻ beṉꞌ iban. 21 Naꞌ X̱ancho Chiozaꞌ beneꞌ xa beṉꞌki de yid xa bayix̱ꞌ naꞌ gokwgakeꞌn. 22 Naꞌ goll X̱ancho Chiozaꞌ: “Ṉaa beṉꞌki ba nakgakeꞌ ka choꞌ, ṉezgakileꞌ dii wennaꞌ naꞌ dii malaꞌ. Naꞌ xoll koyogakeꞌ dii zix̱aꞌ llia lo yag yeḻꞌ mbannaꞌ gaogakeꞌn naꞌ ibangakeꞌ toshiizi.”
23 Daan bibej X̱ancho Chiozaꞌ ḻegakeꞌ latj ganaꞌ nonshawee, ganaꞌ le Edén, kwenc̱he gaz kwekeꞌ lo yell-lio daa wyaꞌ wbiṉileꞌ. 24 Ka wde bibej X̱ancho Chiozaꞌ beṉꞌki, naꞌ bzoeꞌ anjlkaꞌ, ka de ganaꞌ chlaꞌlə wbillaꞌ Edénnaꞌ, chapgakeꞌ nezaꞌ daa zejan ganaꞌ zoa yag yeḻꞌ mbannaꞌ, naꞌ bzoeꞌ sto spad dii chaḻꞌṉiṉ chec̱hjan to ki to kaꞌlə.