Betesda e Jesús tejmoꞌótaka pajluwaja ritami yukuna marí
5
Ilé kaje ejomi, judíona laꞌañó fiesta Jerusalén e, raú Jesús paꞌaró rejo.
2 Pajimila nakuwá nachipúkaꞌata jipa piyukeja kurara ke rinakuwá. Chaꞌapá rinumaná iꞌimaká reꞌiyayá. Pajluwaja rinumaná nakú nemaké: “Ovéjana leꞌejé riká”, ke. Rawaꞌá juni yáꞌako. Napuraꞌakó chu rií iꞌimari Betesda. Juni cha pají yáꞌako. Jipa nakiyá laꞌakanami riꞌimaká. Pajluwa théꞌela kele juni turená iꞌimaká.
Jesús cura en Sábado (Juan 5.1-15)
3 Riká turenawa kajrú natámina iꞌimakaño pitakó. Keꞌiyapejena neꞌemaká: neꞌiyajena mejluruna; neꞌiyajena unká méñoꞌojo jaꞌapálaño palá; neꞌiyajénajlo nanapona takaꞌató. Neká kajena tami pitaño juni turená. Juni yokoꞌokó nawátake, marí ke riꞌimajíkale:
4 Apala keja kele juni yokoꞌojiko Tupana waꞌatéjeri, jeꞌechú chiyaje, witúkaꞌajikale rakojé riyokoꞌojé. Rejéchami pajluwa natámina nakiyana witúkaꞌajika rakojé ajopana piyá, riyokoꞌojiko ketana. Eyá riyokola tejmoꞌótakeri riká riyaripune liyá.
5 Re neꞌiyá pajluwa ritami iꞌimari. Treinta y ocho jarechí ketana cha riꞌimaká ritami.
6 E kaja Jesús iphari rejo, amari ritami toꞌokó re. Riweꞌepí jupi cha wani riꞌimaká ritami kaje waꞌaté, raú rimá rijló:
—¿E piwátaka tejmoꞌotákajo?
7 Raú rimá Jesusjlo:
—Aꞌa, eꞌiyonaja unká na iꞌimalá riwitúkaꞌatakaloje nuká juni jakojé riyokoꞌokó ketana. Nuwitúkaꞌajla rakojé, eꞌiyonaja apú witúkaꞌari kiñaja nupiyá rakojé.
8 E Jesús kemari rijló:
—Páchoꞌo chuwa, paꞌapá, pijñaꞌá picamané pijwaꞌató.
9 Rejéchami ritami kaje jaꞌapaka riliyá. Raú ráchoꞌo, eyá palá raꞌapaka. Rijñaꞌá kaja ricamané rijwaꞌató. Naleꞌejé watánaꞌakaje jená iꞌimari riwakajé,
10 raú judíona wakáraꞌajeño nakiyana kemaño ritami penájemijlo:
—¿Unká chi pemaꞌalá Tupana jaꞌapiyá? Chuwajá watánaꞌakaje jená, eꞌiyonaja piwákoꞌo picamané rapi.
11 Raú rimá najló:
—Kele tejmoꞌótiyari nuká, kemíchari nojló: “Paꞌapá, pijñaꞌá picamané pijwaꞌató”, ke.
12 Nemá rijló:
—¿Mékaje ta chi kele, kemíchari pijló ilé ke?
13 Unká riweꞌepila naka riꞌimaká tejmoꞌótari riká, kajrú wani inaꞌukena eꞌiyowá riꞌimakale. Kaja Jesús jaꞌapá reyá, raú unká ramala riꞌimaká neꞌiyowá.
14 Rejomi Jesús iphákaꞌako piño riká penájemi waꞌaté Tupana ñakaré chu, e rimá rijló:
—Pamá, kaja pitejmoꞌotó, peyajweni piká chuwa, ñakele maáreya watukumó pilaꞌaniña piño nakaje unká Tupana wátalare kaje. Pilaꞌajika ee piño nakaje unká riwátalare kaje, richaje wani pamájika chapú kaje yajwé reyá aꞌajná ñoꞌojó.
15 Rejomi riká penájemi iꞌijnari riyukuna iꞌimajé judíona nakiyánajlo, rimá najló:
—Jesús, riká tejmoꞌótari nuká.
16 Ilé kaje aú judíona wakáraꞌajeño nakiyana wátaño Jesús laꞌakana chapú, ritejmoꞌótakale ritami naleꞌejé watánaꞌakaje iꞌimaká wakajé japi.
Jesús defiende su autoridad (Juan 5.16-47)
17 Raú neꞌejná riyukuna kejáꞌaje Jesús liyá. Rimá najló:
—Palá waja piyukeja nakaje Noraꞌapá laꞌakare, ñakele ñaké kaja nakaje nulaꞌakare.
18 Ilé ke rimaká najló aú, richaje wani nayúchaꞌako richá. Nawata wani rinókana rejéchami. Unká paala najló riꞌimaká, ritejmoꞌótakale natámina naleꞌejé watánaꞌakaje iꞌimaká wakajé japi. Chapú wani kaja riꞌimaká nanaku, rimakale Tupana nakú: “Noraꞌapá riká”. Ilé ke rinakuwá kemakana aú rilaꞌá rikó Tupana ke kaja.
Naka wakáraꞌari Tupana iꞌirí laꞌaká nakaje yukuna marí
19 Rejéchami Jesús kemaká najló: “Jemaꞌá marí: Tupana iꞌirí nuká, ñakele unká méñoꞌojo nulaꞌalá nakaje nokó. Noraꞌapá jaꞌapiyá ke nulaꞌaká riká. Rilaꞌaká nakaje, ke kaja nulaꞌaká.
20 Íkiꞌija Noraꞌapá wátaka nuká, ñakele rimá nojló nakaje nakú, nuweꞌepíkaloje rilaꞌakana nakojé. Rimaje piño kaja nojló nakaje nakú nulaꞌakáloje penaje. Apú nakaje nulaꞌakare chaje riꞌimajika, raú ipechu iꞌimajé nunaku: ‘Piyukeja wani nakaje laꞌajerí riká’, ke.
21 Noraꞌapá weꞌepiri inaꞌuké kaja takaꞌakaño makápoꞌotakana. Ñaké kaja nuká Riꞌirí, weꞌepika wajé kajmuchaji aꞌakana nuwátakarenajlo.
22 Unká Tupana kalé kemari inaꞌuké nakú mékajenaka neká: palá laꞌakaño kaꞌajná, puꞌuwaré laꞌakaño kaꞌajná. Kaja raꞌá nuká Riꞌirí, numakáloje inaku mékajenaka iká.
23 Ilé kaje penaje raꞌá nuꞌumaká, piyuke inaꞌuké pechu iꞌimakáloje nunaku palá penaje. Noraꞌapá nakú napechu iꞌimaká, ke kaja inaꞌuké pechu iꞌimakáloje nunaku, penaje raꞌá nuꞌumaká. Unkachu inaꞌuké iphala palá noꞌopí, unká kaja nephala palá Noraꞌapá, wakáraꞌari nuꞌumaká majó iꞌimaká jaꞌapí.
24 “Jemaꞌá marí: Aꞌajeño nanakojó nupurákaꞌalo, iꞌimajeño matajnako jeꞌechú chu. Nuwakáraꞌajeri Tupana. Kaphí richojé péchuruna iꞌimajeño matajnako re wajwaꞌaté. Ilé ke riꞌimajika ee ijló, unká riwajálaje iká. Kaphí Tupana chojé péchuruna iꞌimajika ee, jaꞌapaje kapichákajo chiyá iꞌimakaje chojé.
25 Jemaꞌá marí: Tupana iꞌirí nuká. Kaja riphá rená chojé kapichájeño penájena iꞌimakáñojlo nemaꞌakáloje nupurákaꞌalo penaje. Jemaꞌajeño raꞌapiyajlo Tupana aꞌajé wajé kajmuchaji, ripalamane aú neꞌemakáloje matajnako jeꞌechú chu.
26 Re Noraꞌapá eꞌiyaja iꞌimakaje. Riká iꞌimakaje raꞌá kaja nuká Riꞌirijlo.
27 Inaꞌuké iꞌimakáloje nupalamane penaje iꞌimaká nuká.
28 Ñakele ipechu iꞌimaniña nunaku: ‘¡Meke piyukeja wani péchuri riká!’, ke. Numá ijló: akijñojo kaja takaꞌakaño penájemina jemaꞌajeño nuwáꞌaka najló.
29 Palá laꞌakaño michuna penájemina makápoꞌojeño, neꞌemakáloje matajnako penaje jeꞌechú chu. Eyá puꞌuwaré laꞌakaño michuna penájemina makápoꞌojeño kaja, najñaꞌakáloje chapú kaje yajwé panaku penaje”, ke Jesús kemaká najló.
Na aú ka waweꞌepí kewaka Jesús purákaꞌalo. Riyukuna marí
30 Jesús kemari piño najló: “Unká nupechu nakú riꞌimaká ke kalé nulaꞌaká nakaje. Noraꞌapá wakáraꞌaka numaká inaꞌuké nakú, keja numaká nanaku mékajenaka neká. Unká nulaꞌalá nuwátaka ke. Noraꞌapá wakáraꞌari nuꞌumaká majó wátaka keja nulaꞌaká.
31 Nupuraꞌakelo palá nunakuwá, unká na penaje nupurákaꞌalo iꞌimalajla ijló, iweꞌepíkaloje raú kewaka riká numakare nakú.
32 Re apú. Riká kemari nunaku, numaká nunakuwá ke kaja. Raú nuweꞌepí kewákaka riká rimakare nunaku.
33 Iwakáraꞌaka inakiyana Juan liyá riyukuno kejáꞌaje wakajé, kewaka rimaká najló nunaku iꞌimaká.
34 Nojló unká na penaje palá napuraꞌakaro nunaku iꞌimalá. Eꞌiyonaja ijló palani, piyukeja nakaje numakare nakú ijló iyuríkaloje ichó nojló, nuꞌumatákaloje iká kapichákajo liyá raú.
35 Palani inajlo kamareji lapí, ripatakale iná kamaré palá. Ñaké kaja Juan purákaꞌalo iꞌimaká ijló, kewákaje riꞌimakale. Meketánaja puꞌují ipechu iꞌimaká ripurákaꞌalo nakú.
36 Riká iꞌimari nuyukuna iꞌimaká, raú kajrú inaꞌukena jemaꞌaká nuyukuna. Richaje íkiꞌika nemaꞌaká meꞌetení nuyukuna nakaje nulaꞌakare aú. Noraꞌapá palamane aú nulaꞌá ñaké, raú naweꞌepíkaloje Noraꞌapá wakáraꞌari nuꞌumaká majó.
37 Noraꞌapá wakáraꞌari nuꞌumaká majó, puraꞌaró nunaku palá. Eyá iká unká wani jemaꞌalaño riꞌimaká ijló yuku, unká kaja amala riká.
38 Unká kaja ripurákaꞌalo iꞌimalá ipechu nakú, unkale ipechu iꞌimalá kaphí riká, Tupana wakáraꞌakare majó iꞌimaká chojé.
39 Kejluruna ke jewíñaꞌako Tupana purákaꞌalo lanaꞌakéjami nakú, ipechu iꞌimakale rinaku: ‘Tupana purákaꞌalo kemari inajlo mékeka iná laꞌakajla nakaje iná iꞌimakáloje matajnako jeꞌechú chu penaje’, ke. Ilé ke Ripurákaꞌalo jewíñaꞌatakare nakú kemaká nunaku.
40 Eꞌiyonaja kalé unká iꞌijnalá majó nuchaje kajmuchaji chaya, iꞌimakáloje ripalamane matajnako jeꞌechú chu raú.
41 “Unká nukulala inaꞌuké napuraꞌakóloje nunaku palá, mapeja penaje.
42 Nuweꞌepí unká iwátala íkiꞌija Tupana.
43 Noraꞌapá wakáraꞌari nuká majó iꞌimaká, eꞌiyonaja unká jemaꞌalá noꞌopiyá. Apala apú kaꞌajná iphájeri majó, ripechu keja pajlájeri kaꞌajná ijwaꞌaté mapeja. Ilé jaꞌapiyá kaꞌajná jemaꞌajé.
44 Unká méñoꞌojo iꞌimalá noꞌopiyá jemaꞌajeño, iwátakale inaꞌuké puraꞌakó inaku palá. Unká iwátala napuraꞌakó puꞌuwaré inaku nupurákaꞌalo jimaje. Unká iweꞌepila itukumó Tupana wátaka ke laꞌakana, rimakáloje inaku palá. Ilé ke riꞌimakale ijló, unká jemaꞌalá noꞌopiyá.
45 Ipechu iꞌimaniña nunaku: ‘Riká kemájeri Tupánajlo nakaje puꞌuwaré walaꞌakare nakú, richona riwajákaloje weká penaje’. Unká nuká kalé kemájeri inaku. Tupana purákaꞌalo, Moisés lanaꞌakare raꞌapiyá júpimi iꞌimaká, chojé ipechu kaphí, eꞌiyonaja kalé unká ilaꞌalá rimaká ke. Pachá Tupana wajájeri iká.
46 Jemaꞌakela Ripurákaꞌalo Moisés lanaꞌakare jaꞌapiyá, jemaꞌajla kaja noꞌopiyá, rilanaꞌakale nuyukuna iꞌimaká.
47 Unkaja ke jemaꞌá Ripurákaꞌalo, júpimi rilanaꞌakare iꞌimaká jaꞌapiyá, unká kaja jemaꞌalaje nupurákaꞌalo jaꞌapiyá”, ke Jesús kemaká judíonajlo.