15
Kachuwa iná aꞌajipakachu apujlo,nakaje yurí rimakare nakú inajlo nakojé,
unká iná yúchaꞌatala wani riká raú.
Eyá yurí kaja iná aꞌajipakachu rijló rinakojé,
richaje wani riyúchaꞌajiko raú.
2 Palá kajrú nakaje nakojé weꞌepéjeri purákaꞌalo aꞌaká iná ñathé,
iná weꞌepíkaloje richaje ke nakaje nakojé raú.
Eyá unká ñaké kalé mapechuru purákaꞌalo,
unkale raꞌalá na aú iná ñathé.
3 Piyukeja ejaꞌawá chuwá Tupana.
Ñakele ramá kaja piyukeja:
palá laꞌajeño, puꞌuwaré laꞌajeñó waꞌaté.
4 Kajrú palani purákaꞌaloji aꞌaká iná ñathé,
iná iꞌimakáloje palá penaje;
eyá puꞌuwareni purákaꞌaloji apichátari iná pechu inajlo.
8 Unká wani Tupana wátala nakaje puꞌuwaré laꞌajeñó aꞌakare rijló;
eyá palá laꞌajeñó jaꞌapiyá, remaꞌá wechi napurákaꞌalo,
napuraꞌakó kewá rijwaꞌaté.
11 Palá Tupana weꞌepika mékechamika watakaꞌajika,
eyá mékaje liri chojeka najaꞌajika watami.
Ilé ke riweꞌepíkale nakaje nakojé aú,
riweꞌepí kaja palá na nakuka weꞌejnataka wapéchuwa.
12 Ajopánajlo raꞌapiwá iphájeri,
unká wani wátala na laꞌaká renakú, chapú péchuri riká;
unká kaja riwátala kajrú weꞌepíkaño iꞌimaká rijwákeꞌena.
14 Richaje, richaje ke, kapechúruna wátaka palá nakaje nakojé weꞌepíkana.
Lanakiya mapechúruna wátaño richaje ke kaja
nakaje laꞌarí neká richaje mapechúrunaka ke nakojé weꞌepíkana.
15 Chapú kaje yajwé amájeñojlo,
unká paala waja piyukeja weꞌechú kaꞌalá;
eyá puꞌují péchurunajlo,
palá waja weꞌechú kaꞌalá, puꞌují waja napechu iꞌimakale rapi.
16 Palani iná iꞌimaká kamuꞌují laꞌaká,
raú iná iphákaloje palá Tupana jaꞌapí,
iná aꞌakáloje wani kaja iná nakojó riká palá.
Ñakele unká paala kajrú wani liñéruteri iꞌimakana,
kajrú wani iná wo kaꞌakole iná nane waꞌaté.
Rilanakiya kaja unká iná aꞌalajla Tupana iná nakojó.
21 Manáija unká weꞌepila palá laꞌakaná, puꞌuwaré laꞌakaná liyá,
rimanáicho rilaꞌakare waꞌaté.
Eyá kapechuni amari rikó palá,
rilaꞌaká piyá piño puꞌuwaré, rilaꞌakare iꞌimaká kaje.
22 Unkachu iná iꞌimalá ajopánajlo nakaje iná wátakare laꞌakana yukuna,
apala unká ráchoꞌolajo inajlo, iná pechu rinaku ke.
Nakaje iná iꞌijnatákare nakú, iná péchuwa jáchoꞌokoloje inajlo penaje,
palani rinaku puraꞌakano ajopana waꞌaté,
naꞌakáloje iná ñathé rilaꞌakana aú.
26 Unká wani Tupana wátala nakaje
puꞌuwaré laꞌajeñó iꞌijnatákare nakú napéchuwa, nalaꞌakáloje penaje.
Eyá palá péchuri purákaꞌalo, palani rijló.
28 Palá, palá laꞌajerí iꞌijnataka ripéchuwa
mékeka raꞌajipajika apujlo nakú, rejomi raꞌajipá rijló.
Eyá puꞌuwaré laꞌajerí aꞌajipari kiñaja apujlo
puꞌuwaré nojé purákaꞌaloji aú.
29 Juká Tupana puꞌuwaré laꞌajeñó liyá;
eyá palá laꞌajeñó purákaꞌalo, raꞌá rinakojó palá.
32 Unká wátala apú laꞌaká renakú,
riꞌimakáloje palá aꞌajná ñoꞌojó chami penaje,
unká kaja wátala rikó.
Eyá jemaꞌarí nakaje nemakare nakú rijló jaꞌapiyá,
weꞌepéjeri richaje nakaje nakojé raú.