14
2 Palá inaꞌuké laꞌakare aú,iná weꞌepí kewaka nephaka Tupana jaꞌapí;
eyá puꞌuwaré laꞌajeñó iphaño naꞌapiwá rijló
puꞌuwaré nalaꞌakare aú.
3 Kajrú mapechuru puraꞌakó rinakuwá palá mapeja;
eyá kajrú nakaje nakojé weꞌepika
mejñátari rikó ripurákaꞌalo aú.
7 Paraꞌaniño mapechuru nakú,
unkale na penaje nakaje rimakare pijló iꞌimalájele,
raꞌakáloje piñathé,
piweꞌepíkaloje richaje raú nakaje nakojé.
9 Nakaje puꞌuwaré nalaꞌakare aú
mapechúruna laꞌañó neꞌechajnó pajwaꞌatéchaka;
eyá palá laꞌajeñó wátaño ñakeja palá laꞌakaná.
12 Re neꞌiyajena pechu nakaje nalaꞌakare nakú:
“Palá walaꞌaká”, ke.
Eꞌiyonaja kaja penaje nephátaje kapichákajo rijimaje.
15 Unká weꞌepila palá laꞌakaná, puꞌuwaré laꞌakaná liyá,
jemaꞌarí ajopana jaꞌapiyá,
piyuke yuku nemakare rijló jaꞌapiyá.
Eyá weꞌepiri palá laꞌakaná, puꞌuwaré laꞌakaná liyá,
iꞌijnatari ripéchuwa palá nakaje remaꞌakare ajopana liyá nakú.
16 Kapechuni keroꞌoró puꞌuwaré laꞌakaná piyá,
unkale riwátala ñaké laꞌakaná.
Juká riwátaka riliyá iꞌimakana.
Lanakiya mapechuru, manaꞌija ripechu,
ke rilaꞌaká puꞌuwaré.
17 Kiñaja imaꞌá péchuri laꞌaká nakaje mapechúwaka,
unkale riꞌijnatala ripéchuwa palá rilaꞌakana nakú.
Eyá palá iꞌijnataka ripéchuwa,
iꞌijnatari kachuwa ripéchuwa nakaje rilaꞌajikare nakú,
rilaꞌaká piyá riká mapechúwaka.
21 Yuriri íkiꞌija rijwákeꞌewe wátakana,
laꞌarí puꞌuwaré raú.
Eyá puꞌují péchuri weꞌepiri kamuꞌují laꞌakaño muꞌují.
25 Kemari kewaka nakaje ramákare
yukuna purákaꞌaloji lamáꞌatajeñojlo,
iꞌimatari apú chapú kaje liyá;
eyá unká iꞌimalá kewaka chuwá nakaje ramákare
yukuna purákaꞌaloji lamáꞌatajeñojlo,
pachá nenojla apú mapeja.
29 Weꞌepiri nakaje ñaꞌakana panaku,
unká yúchaꞌalo kiñaja,
raú iná weꞌepí kapechuni riká.
Ñaké kaja iná weꞌepika mapechuru:
kiñaja riyúchaꞌako mapeja aú.
31 Iphari raꞌapiwá kamuꞌují laꞌajéñojlo,
iphari kaja raꞌapiwá Tupánajlo,
inaꞌuké keñoꞌótajeri riꞌimakale.
Eyá weꞌepiri kamuꞌují nanaku,
iphari palá wani Tupana jaꞌapí,
inaꞌuké pechu iꞌimakáloje kaja palá rinaku raú penaje.
34 Neꞌemakana, raꞌapiyatéjena waꞌaté,
laꞌakachu piyuke najwaꞌatéjena palá rejenowaja,
palá napechu nanakuwá.
Eyá nalaꞌakachu chapú najwaꞌatéjena,
napáñaꞌata rijwaꞌatéjena nakú ajopana teꞌeré eyájenajlo.