2
Nulaké, piyuró piyukeja nupurákaꞌalo jaꞌapiyá.Paꞌá pinakojó palá riká, riyuríkoloje pijló penájeja.
Pipechu nakuja nuwata nakaje nuwakáraꞌakare pilaꞌaká iꞌimaká.
2 Purákaꞌaloji laꞌarí iná kapechuja paꞌá pinakojó;
paꞌá pinakojó riká, rilaꞌajíkale kapechú piká.
3 Pikejaꞌa Tupana liyá weꞌepíkaje pijluwa,
piweꞌepíkaloje raú palá laꞌakaná, puꞌuwaré laꞌakaná liyá.
4 Nakaje laꞌarí iná kapechuni kulákanaja piweꞌepí pitukumó.
Iná kulaka nakaje kawemí nojé wani, meꞌechú iꞌimakare,
ke kaja piꞌimá nakaje laꞌarí iná kapechuni kulákana nakú.
5 Raú piweꞌepeje palá wani Tupana jaꞌapí iphákana,
ñaké kaja ajopana inaꞌukena iphájika raꞌapí raú.
Piweꞌepeje kaja raú palá mékajeka Tupana.
6 Tupana aꞌarí inajlo weꞌepíkaje.
Piyukeja nakaje, inaꞌuké laꞌakare nakaje nakiyá,
riliyá waja naweꞌepí rilaꞌakana nakojé,
riliyaja kalé iná weꞌepí kajrú nakaje nakojé.
7 Palá laꞌajeñó ñathé Tupana aꞌá palá;
ramá kaja neká palá, namaka piyá chapú kaje yajwé.
Palá laꞌajeñó neꞌemakale, ramá neká palá.
8 Ramá kaja palá, laꞌañó piyukeja inaꞌukena nakú palá rejenowaja.
Raꞌá kaja rinakojó riwátaka ke laꞌajeñó.
9 Pemaꞌajika ee palá raꞌapiyá,
piweꞌepeje kaja ajopana inaꞌukena nakú laꞌakana palá.
10 Ilé kaje laꞌakana aú piweꞌepeje kajrú nakaje nakojé,
palá wani riꞌimajika pijló.
11 Palá laꞌakaná weꞌepíkana, puꞌuwaré laꞌakaná liyá,
eyá kajrú nakaje nakojé weꞌepíkana, kaje aú pimejñátaje pikó.
12 Ilé kaje jáchoꞌotajeri piká puꞌuwaré laꞌakaná chiyá;
unká kaja puꞌuwaré laꞌajeñó wákeꞌewe kalé piꞌimajika.
13 Neká yuriño kaja naliyó palá laꞌakaná, nalaꞌakáloje puꞌuwaré penaje.
14 Iꞌichajneji keja kaja najló ajopana laꞌakana chapú;
puꞌuwaré laꞌakaná aú nalaꞌá napéchuwa puꞌují.
15 Pichujuni iñeꞌepú chuwá jaꞌapákaño ke neká,
kaja nawaꞌó palani iñeꞌepú chiyá.
16 Palá piweꞌepíjika ee marí purákaꞌaloji nakojé, raꞌajé kaja piñathé,
piꞌimaká piyá inanaru, manai péchuru waꞌaté.
Palá ilé kajeru inanaru puraꞌakó iná waꞌaté,
iná laꞌakáloje iná manáicho rujwaꞌaté penaje.
17 Ilé kajeru inanaru yuriyo ruyajná,
ruwáꞌakakaro waꞌaté paineko iꞌimaká, inaya ruꞌumaké wakajé.
Kaja rupechu kapicháñaa nakaje rumakare nakú Tupánajlo,
ruwáꞌakako iꞌimaká wakajé, ruꞌumakáloje ruyajná waꞌaté,
Tupana wakáraꞌaka ke penaje.
18 Iñeꞌepú, ruñakaré ejo iꞌijnakare chuwá iꞌijnakana,
wáꞌari iná kapichákajo ejo.
19 Mujlúkaꞌajeño ruñakaré chojé, unká paꞌalájeño piño napumí chuwá,
neꞌejnakáloje iñeꞌepú wáꞌari iná iꞌimakaje ejo chuwá.
20 Pijló numá: piꞌijná palani iñeꞌepú chuwá;
pilaꞌá palá, palá laꞌajeñó laꞌaká ke kaja.
21 Unká palá laꞌajeñó laꞌalá puꞌuwaré,
ñakele neká iꞌimajeño wateꞌeré nakú ñakeja.
22 Eyá puꞌuwaré laꞌajeñó,
kaja yuríkaño naliyó Tupana jaꞌapiyá jemaꞌakana,
unká nayurílaje iꞌimaká wateꞌeré nakú.