PROVERBIOS
1
Marí nakaje Salomón, David michú iꞌirimi, lanaꞌarí iꞌimaká, Israel lakénami iꞌimakana riꞌimaká wakajé:2 Raꞌakáloje iñathé penaje nulanaꞌá ijló marí purákaꞌaloji,
ipuraꞌakóloje kaja raú nakaje nakú palá,
iweꞌepíkaloje kaja palá wani piyukeja purákaꞌaloji puwicha nojé iꞌimakare nakojé.
3 Marí purákaꞌaloji aú iweꞌepeje palá nakaje
laꞌakana nakojé, ilaꞌaká piyá riká apoꞌojó.
Iweꞌepeje kaja palá laꞌakaná, puꞌuwaré laꞌakaná liyá.
Ilaꞌajé kaja rejenowaja inaꞌuké nakú palá ripalamane aú.
4 Marí purákaꞌaloji aꞌajeri kaja walijímakana,
unká joꞌó weꞌepílaño palá nakaje nakojé ñathé,
naweꞌepíkaloje raú palá laꞌakaná nakojé.
Rilaꞌajé kaja kapechú neká, neꞌejnatákaloje palá napéchuwa rinaku penaje.
5 Kapechúruna, eyá kiñaja weꞌepíkaño nakaje nakojé,
kele jemaꞌajeño palá raꞌapiyá,
raú richaje wani naweꞌepíjika palá nakaje nakojé.
6 Naweꞌepeje kaja palá keꞌiyapejé nakaje,
kapechúruna wani iꞌimakaño kemakare nakú nakojé.
Nakaje meꞌechuje ke iꞌimakare inajlo, waꞌató naweꞌepeje nakojé.
Ilé kajena iꞌimakáloje penaje nulanaꞌá ijló marí purákaꞌaloji.
7 Iná iꞌimakáloje kajrú nakaje nakojé weꞌepéjeri penaje,
paineko iná keñoꞌó Tupana jaꞌapí iphákana.
Unká manai péchuruna iphala purákaꞌaloji, laꞌarí iná kapechú,
jewíñaꞌatari iná palá laꞌakaná nakú jaꞌapí.
8 Nulaké, paꞌá pinakojó nakaje
paraꞌapá kemájikare nakú pijló iꞌimajika.
Piyuríniña kaja piliyó nakaje
paló jewíñaꞌatajikare nakú piꞌimajika.