Judíona cháꞌataka chapú nanaku péchuruna yukuna marí
9
E kaja riphá judíona nótakana jená chojé. Kaja penaje keri lapaꞌatako trece cha wakajé, nenótakana jená iꞌimaká, nalaꞌakáloje neꞌemakana purákaꞌalo kemaká ke penaje. Riwakajé chapú péchuruna judíona nakú wátaño nakapichátakana piyukeja, eꞌiyonaja apoꞌojó riꞌimaká najló. Judíona kapichátaño neꞌemaká piyuke riwakajé. 2 Piyuke Asuero waꞌatéjena eꞌiyowá, judíona ke iꞌimakaño, awakako neꞌemaká ewá, namejñátakaloje nekó chapú nanaku péchuruna liyá penaje. Eꞌiyonaja unká na iꞌijnaké najwaꞌaté nókajo, keroꞌokajo cháꞌatajikale neká, raú unká meke nalaꞌalá. 3 Piyukeja neꞌemakana jaꞌapiyá wakáraꞌajeño, eyá wakáraꞌakeño ajopana teꞌeré ewá, ajopana teꞌeré ewá ke, aꞌajika piyuke judíona ñathé, kajrú nakeroꞌojíkole Mardoqueo piyá. 4 Kaja neꞌemakana wani waꞌaté riwakáraꞌake. Kaja piyuke rijwaꞌatéjena jemaꞌaká, ajopana waꞌaté, neꞌemakana jaꞌapiyatéjena chaje riꞌimaká nawakáraꞌajeri yukuna. Eyá weꞌechú kaꞌalá keja riwakáraꞌajika, neꞌemakana waꞌaté, inaꞌuké richaje ke, richaje ke. 5 Ñakele piyuke judíona kapichátaka chapú nanaku péchuruna iꞌimakaño. Piyuke wani natajátaka neꞌemaká, kaja nawátaka ke nalaꞌaká neꞌemaká. 6 Pajimila Susa e, nenota quinientos achiñana re iꞌimakaño. 10 Nenótakarena michuna eꞌiyá nenota kaja Amán michú, chapú amájika neꞌemajika michú, yanimínami. Iyamá théꞌela kele achiñana neꞌemaká, nenota kaja najwaꞌaté. Nenótaka neká ejomi, unká najñaꞌalá najluwa nanánemi.16-17 Judíona, ajopana teꞌeré ewá iꞌimajíkaño, ajopana teꞌeré ewá iꞌimajíkaño ke, awakaño kaja trece wakajé, namejñátakaloje nekó chapú nanaku péchuruna liyá, nenókakoloje wátaño nanaku jaꞌapákana waꞌaté penaje. Riwakajé nenota setenta y cinco mil chapú nanaku péchuruna, eꞌiyonaja unká kaja najñaꞌalá najluwa nanánemi. Eyá catorce wakajé manaꞌija neꞌemaká. Riwakajé nakajmoꞌó, puꞌují wani napechu ke najñaka naꞌajnewá pajwaꞌatéchaka.
20 Rejomi Mardoqueo lanaꞌarí piño ripurákaꞌalo piyukeja judíonajlo, rewá iꞌimakáñojlo, yaꞌajná iꞌimakáñojlo waꞌató. Riwakáraꞌa riká ajopana teꞌeré ejo, ajopana teꞌeré ejo ke. 21 Riwakáraꞌa nakajmoꞌokó jarechí keja catorce, eyá quince iꞌimajika wakajé, kaja penaje keri lapaꞌatájiko wakajeno. 22 Ilé ke riwakáraꞌaka nalaꞌaká, riwakajé nachátaꞌakale chapú péchuruna nanaku iꞌimaká. Riwakajé naꞌapá chapú kaje chiyá puꞌují kaje chojé, ñakele riwakáraꞌa nakajmoꞌokó riwakajé. Rimá najló, najñákaloje naꞌajnewá pajwaꞌatéchaka, nalamáꞌatakaloje pekowáaka nakaje aú, naꞌakáloje kaja kamuꞌují laꞌakáñojlo nakaje riwakajé. 23 Rejomi ñakeja nalaꞌajíkano.