1 Riwakajeja kaja neꞌemakana Asuero aꞌá mapeja neꞌemakánaru Esterjlo Amán michú, chapú péchuri iꞌimajika judíona nakú ñakaremi. Rejéchami Mardoqueo iꞌijnaká neꞌemakana chaje. Kaja júpimi ke kaꞌajná Ester kemaká neꞌemakánajlo rinaku: “Noꞌowé riká”, ke. Raú riꞌijná neꞌemakana ejo. 2 Neꞌemakana amaka riphaka rejo ee, rikaꞌá piño rinakiyó rileꞌejé anillo, ripaꞌatakare Amán michú liyá iꞌimaká, raꞌakáloje rijló riká penaje. Raú Mardoqueo yuriro piño Amán michú apumí chojé, neꞌemakana jaꞌapiyá wakáraꞌajeri penaje. Eyá Ester aꞌayó riká, riꞌimakáloje piyuke Amán michú nánemi amájeri penaje. 3 Rejomi ruꞌujná piño neꞌemakana waꞌaté puraꞌajó. Ruphaka rinaku ee rujlámaꞌo riꞌimá nakojé, e ruyako rumaká rijló, rapiyákakaloje piyuke nakaje, unká wani paala Amán michú lanaꞌakare iꞌimaká piyuke judíona nakojé, nakapichátakaloje neká penaje. Ñakele ruwata piyuke purákaꞌaloji lanaꞌakéjami iꞌimakare richu apiyákana, nalaꞌaká piyá neká chapú. 4 E riyaꞌatá ruchaje rikutiware oro nakiyá laꞌakanami, raú róchoꞌo rujlámaꞌako eyá, 5 rumá rijló:

—Palani nakaje numájikare nakú iꞌimajika ee pijló, eyá palá pipechu iꞌimajika ee nunaku, nuwata pilanaꞌaká piyuke paꞌapiyá wakáraꞌajeñojlo apú papera, nalaꞌaká piyá Amán michú wakáraꞌakare najló iꞌimaká kemaká ke. 6 Unká méñoꞌojo nujñaꞌalaje panaku, nenótajika ee piyuke nukáꞌana, nojena waꞌaté.

7 Raú neꞌemakana kemari Esterjlo, Mardoquéojlo waꞌaté, marí ke:

—Kaja noꞌó Esterjlo Amán michú ñakaremi, nuwakáraꞌakare akúwaꞌatakana rinúrupi nakiyá, riwátakale judíona nótakana iꞌimaká. 8 Ñakele noꞌó kaja ijló rinakojé, iweꞌepíkaloje rinakojé penaje, ilanaꞌakáloje palá ipechu nakú riꞌimajika ke, ilaꞌakáloje raú palá judíona nakú. Iñapátajikaja rilanaꞌakana ejomi, ilaꞌajé sellar riká nuleꞌejé anillo aú, nuliyá keja riꞌimakáloje raú —ke rimaká najló.

(Nakaje nalanaꞌajíkare neꞌemakana ií aú, riliyá keja riꞌimajika. Eyá nalaꞌajíkachu riká sellar rileꞌejé sello aú, unká méñoꞌojo napiyákake riká rejomi, rimájika ke nalaꞌajika.)

9 Riká penájeja Mardoqueo awakátaka piyukeja neꞌemakana jaꞌapiyatéjena, lanaꞌakeño rijló papera kaje. Weji keta keri cha apú jarechí lapaꞌatako, riká iꞌimaká veintitrés cha wakajé, Mardoqueo wakáraꞌari nalanaꞌaká papera kaje chojé raꞌapiyá piyuke rimaká najló ke, nawakáraꞌakaloje piño ripurákaꞌalo piyuke judíonajlo, eyá nawakáraꞌajeñojlo waꞌató. Kaja íkiꞌiruna wani neꞌemaká, piyuke nateꞌeré nakuwá neꞌemaké. Ciento veintisiete nañakajela iꞌimaká piyukeja. Ñakele apú ewá, apú ewá ke, nalaꞌajika nañakajelo ajopana waꞌaté. Kaja India eyá nateꞌeré toꞌokó, aꞌajná Etiopía ejená. Raú naꞌapata Mardoqueo purákaꞌalo ajopana puraꞌakó chu, ajopana puraꞌakó chu ke, nawakáraꞌakaloje najló riká napuraꞌakó chu waja. Judíonajlo nalanaꞌá ñaké kaja ripurákaꞌalo napuraꞌakó chu.

10 Nañapátaka rilanaꞌakana ejomi, nayáꞌata neꞌemakana Asuero ií kaja penaje richojé. Rejomi Mardoqueo laꞌarí sellar riká rileꞌejé anillo, sello iꞌimakare nakú aú. Rejomi nawakáraꞌa riká kawaruna nakú jaꞌapájeño waꞌaté, natamákaꞌatakaloje riká piyuke ajopánajlo, ajopánajlo ke penaje. Neꞌemakana leꞌejena kawaruna, peyajwé jechoꞌokaño neꞌemaká, nakú jaꞌapájeño iꞌijnataño riká papera kaje. 11 Riká neꞌemakana purákaꞌalo lanaꞌakéjami kemari judíona nakú neꞌemajika ewá: “Marí purákaꞌalo judíona, iꞌimaño apú pajimila nakú, apú pajimila nakú kejlo: Ajopana wátajika ee ilaꞌakana chapú, awakajo piyuke, imejñátakaloje ikó naliyá penaje. Inótaje kaja neká piyuke, rejomi ijñaꞌataje ijluwa piyuke nanánemi. Ikapichátaje piyuke, iphájeño inaku nalekare waꞌaté ijwaꞌaté nókajo. Unká iphálaje na jaꞌapí, ikapichátaje piyukeja neká: inaana, nayani yuwaná waꞌató. 12 Ñakele marí ke numaká iká judíona nakú, ilaꞌakáloje penaje. Kaja penaje keri lapaꞌatájiko trece cha wakajé, naꞌá inótakana jená iꞌimaká. Ñakele riwakajé awakajo, imejñátakaloje ikó penaje. Piyuke Asuero teꞌeré eꞌiyowá iꞌimakaño, judíona, laꞌajeño ñaké waja”, ke ripurákaꞌalo lanaꞌakéjami kemaká. 13 Rimá kaja najló, naꞌakáloje rikaja purákaꞌaloji, neꞌemakáloje piyuke inaꞌukejlo riyukuna ajopana teꞌeré ewá, ajopana teꞌeré ewá ke, naweꞌepíkaloje mékeka neꞌemakana purákaꞌalo lanaꞌakéjami kemaká, ñaké rilaꞌakana iꞌimakáloje penaje, judíona jaꞌakóloje napé, nenókakoloje chapú nanaku péchuruna waꞌaté penaje.

14 Kaja neꞌemakana wakáraꞌa kawaruna nakú jaꞌapájeño iꞌijnataka kiñaja ripurákaꞌalo apú ewá, apú ewá ke. Raú kiñaja natamákaꞌataka ripurákaꞌalo pajimila Susa eꞌiyowá.

15 Palani raꞌarumaká ke, Mardoqueo jáchoꞌoko neꞌemakana ñakaré chiyá, kaja raꞌapiyaté riꞌimakale, ñakele palá nojé raꞌarumaká iꞌimaká. Ipureni, kecha jareni waꞌaté, rilajnere iꞌimaká. Aꞌarumakaji, riwajlé chu kúwaꞌakaro, iꞌimari ipurélukuni, neꞌemakana aꞌajíkare rinakuwá kaje. Susa eyájena amaka aú riká, kajrú nawíyoꞌotaka riká, puꞌují wani napechu iꞌimakale rinaku. 16 Palá wani judíona pechu iꞌimaká, ilé ke napechu iꞌimakale rinaku. 17 Ñaké kaja judíona, ajopana teꞌeré ewá iꞌimajíkaño, pechu laꞌajiko puꞌují, Mardoqueo iꞌimajíkale neꞌemakana jaꞌapiyaté. Raú kajrú nakajmoꞌojiko; ñaké kaja najñájika naꞌajnewá pajwaꞌatéchaka, puꞌují wani napechu iꞌimajíkale. Ajopana, unká judíona kalé iꞌimajíkaño, kemakeño nanakuwá mapeja: “Judíona weká”, ke, nakeroꞌojíkole kajrú wani judíona piyá. Nemaꞌaké kaja najwaꞌaté napurákaꞌalo jaꞌapiyá, neꞌemakáloje nanakiyana keja raú penaje.