Neꞌemakana wakáraꞌaka Amán nókana yukuna marí
7
E kaja neꞌemakana, Amán waꞌaté, iꞌijnaño piño Ester ñakaré ejo naꞌajnewá ajñaje najwaꞌaté. 2 Kaja iyaampe cha neꞌejnaká rujwaꞌaté naꞌajnewá ajñaje. Re neꞌemaká naꞌajnewá ajñakana nakú ejéchami, neꞌemakana kemaká piño Esterjlo:—Pikejaꞌa nuliyá meꞌetení nakaje piwátajikare. Unká numejñátalaje piliyá nakaje pikejáꞌajikare nuliyá meꞌetení, noꞌojé pijló riká. Piwátajika ee peꞌiyowá nakaje wakapi iꞌimakare, nujwaꞌatéjena waꞌaté nakiyana, noꞌojé pijló riká.
3 Raú Ester kemayo rijló:
—Palá pipechu iꞌimajika ee nunaku, palá kaja nakaje nukejáꞌajikare piliyá iꞌimajika ee pijló, nuwata piꞌimataka nuká, piyukeja nukáꞌana waꞌaté, kapichákajo liyá. 4 Kaja naꞌá nuká, piyuke nukáꞌana waꞌaté, nakapichátakaloje weká piyukeja. Nawátakela walaꞌakana mapeja najló jápajeño keja, unká nukawílaꞌalajla pinaku, manaꞌija nuꞌumakajla. Ilé ke nalaꞌakela weká, unká chapú wanaku péchuri laꞌalajla apoꞌojó, nakaje piwátaka liyá.
5 Raú neꞌemakana Asuero kemari rojló:
—¿Na ta chi kele, wátari ilaꞌakana ilé ke? ¿Mere chi riká ta kele, wátari ikapichátakana piyukeja wani?
6 Ester kemayo rijló:
—Chapú wanaku péchuri, wátari wakapichátakana, riká kaji Amán, puꞌuwaré chami ta yáꞌaro pawaꞌá.
Ilé ke Amán jemaꞌaká rumaká rinaku aú, rinapona yuró kamachá, kaja takaꞌaká ke, kaja keroꞌokajo cháꞌatakale riká.
7 Kaja wani riyuchá cháꞌata neꞌemakana Asuero. Riká penájeja ritáraꞌako najñaka naꞌajnewá eyá, jáchoꞌoro reyá wakaꞌapojo. Riꞌijná ají ke aꞌawaná iwí ejátakelana, riñakaré kopi iꞌimakare ejo. Kaja Amán weꞌepí neꞌemakana wakáraꞌajika rinókana, raú riyuró najñaka naꞌajnewá e neꞌemakánaru Ester waꞌaté, rimakáloje rojló, ruꞌumatákaloje riká penaje, neꞌemakana wakáraꞌaka piyá rinókana. Kaja rijlámaꞌo runakojé. 8-9 Rejéchami neꞌemakana mujlúkaꞌaka piño najñákare naꞌajnewá chojé, amari Ester toꞌokó ñákaꞌajori kaje kajruni ruyáꞌakaro chu, eyá Amán lámaꞌako re runakojé riꞌirúpachi aú. Raú rawíyoꞌoko rimaká rijló:
—¿Piwata ta kaja chi paꞌapiwá iphákana neꞌemakánarujlo maare nuñakaré chu?
Ilé ke neꞌemakana kemaká rijló ee, riwaꞌaphena nakiyana apáraꞌaño Amán jimá aꞌarumakaji aú. E pajluwa nanakiyana, Harboná rií iꞌimaká, kemari rijló:
—Kaja ñapátakeja pajluwa nanúrupi ajñoꞌojona paná Amán ñakaré e, riwakáriꞌichaje rijwaꞌatéjena laꞌaká, rinakiyá nakúwaꞌatakaloje Mardoqueo, iꞌimatari piꞌimaká penájemi. Veintidós metros ketana yenuka riká.
—Akúwaꞌatiya riká ta rinakiyá —ke neꞌemakana kemaká najló.
10 Raú nakúwaꞌata Amán nanúrupi ajñoꞌojona, rikoja riwakáraꞌakare laꞌakana nakiyá. Rinakiyá riwata nakúwaꞌataka Mardoqueo, eꞌiyonaja riká penájemi nakiyaja nakúwaꞌata riꞌimaká. Ilé ke nalaꞌaká riká ejomi, neꞌemakana yuchá jaꞌapá riliyá.