Neꞌemakana laꞌaká Mardoqueo palá yukuna marí
6
Riwakajé lapí, unká méñoꞌojo neꞌemakana kamátalo, raú riwakáraꞌa rijwaꞌateje ñaꞌaká papera kaje nalanaꞌakare chojé júpimi ke, piyukeja nakaje nalaꞌajíkare yukuna. Riká papera kaje lanaꞌakéjami waꞌaté riwata ripuraꞌakó rijló, remaꞌakáloje penaje. 2 E kaja rijñaꞌá riká, ripuraꞌó rijwaꞌaté rijló, kaja ewaja meketana iꞌimajemi riphata Mardoqueo yukuna iꞌimaká ejé. Ripuraꞌó mékeka Mardoqueo iꞌimataka neꞌemakana Asuero, riwaꞌaphena michuna: Bigtán michú, Teres michú, kele liyá, nawátaka rinókana iꞌimaká wakajé. Riká yukuna waꞌaté ripuraꞌó rijló. 3 Neꞌemakana jemaꞌaká aú ripuraꞌakó riyukuna waꞌaté, riꞌijnatá ripéchuwa rinaku, e muní ke rimaká raꞌapiyatéjenajlo:—¿E chi na aú walaꞌaká palá Mardoqueo nakú iꞌimaká? ¿Na chi waꞌá rijló riꞌimataka nuꞌumaká wemí?
—Unká na aú walaꞌalá palá rinaku, unká kaja na waꞌalá rijló iꞌimaká —ke nemaká rijló.
4 Eꞌiyowá ke Amán iphaka neꞌemakana ukapure kópeje. Riwata rijló kemakana, riwakáraꞌakaloje Mardoqueo akúwaꞌatakana rinúrupi nakiyá, riwakáraꞌakare nalaꞌaká ripana ripé nakojé.
Neꞌemakana kemari raꞌapiyatéjena, rawaꞌá iꞌimakáñojlo:
—¿Na chi kele jaꞌapari nuñakaré kópiwa?
5 —Amán —ke naꞌajipaká rijló.
—Iwakáraꞌa rimujlúkaꞌaka majó.
6 Amán iphaka rinaku penájeja, neꞌemakana kemaká rijló:
—Pimá nojló meke walaꞌajika pajluwaja inaꞌuké, laꞌarí palá wani nunaku iꞌimaká nakú.
Raú Amán iꞌijnatari ripéchuwa: “¿Mékaje kaꞌajná kele inaꞌuké rimá nakú, walaꞌakáloje riká palá penaje? Unká na apú iꞌimalá, apala nunaku kaꞌajná rimá”, ke ripechu iꞌimaká. 7 Raú rimá rijló:
8 —Kele achiñá pimakare nakú nojló, najñaꞌare majó aꞌarumakaji, paꞌakáreno pinakuwá kaje, raꞌakáloje rinakuwá riká penaje. Rejomi nawáꞌare majó pajluwaja pikawarútena nakiyana pichiraꞌakárono nakú. Najñaꞌare kaja majó pútenaji kaje, paꞌakáreno pichó. 9 Rejomi pajluwaja paꞌapiyatéjena nakiyana, ajopana chaje iꞌimakare neꞌiyayá, iꞌijnatájeri riká, riká piwátakare laꞌakana palá iꞌimaká ejo. Riphájikaja rinaku ejomi, raꞌajé kaja rinaku aꞌarumakaji palani; raꞌajé kaja riwílaꞌaru nakojé pútenaji kaje; kéchami raꞌapátajika riká piyuke pajimila jiwami eꞌiyowá. Marí ke rimájika rinaku rawiyoꞌoko rewá iꞌimakáñojlo: “¡Marí ke weꞌemakana laꞌaká palá wani, palá ripechu iꞌimakare nakú!”, ke rawíyoꞌojika —ke rimaká neꞌemakánajlo.
10 Raú rimá Amanjlo:
—Ñakele chuwa pijiꞌichá majó kiñaja aꞌarumakaji pimíchaje nakú. Piwaꞌa kaja majó pajluwaja nukawarútena nakiyana. Rejomi pilaꞌá pimíchaka nojló ke ilé judío jaꞌa Mardoqueo, yáꞌarono nuñakaré numaná awaꞌá nakú. Pilaꞌajé piyuke pimíchaka nojló rinaku ke.
11 Raú Amán ñaꞌarí aꞌarumakaji rimakare nakú, riwaꞌa kaja neꞌemakana kawarute. Rejomi riꞌijná, rilaꞌakáloje neꞌemakana wakáraꞌaka riꞌimaká ke. Raꞌá Mardoqueo nakú aꞌarumakaji palani, rejomi raꞌapata rijló neꞌemakana kawarute. Mardoqueo jáchoꞌoko rinakojé yáꞌajo ejomi, richiraꞌata riká rimukú nakiyá, ají ke pajimila jiwami eꞌiyowá, waꞌaté rawíyoꞌoke marí ke rewá iꞌimakáñojlo: “¡Marí ke weꞌemakana laꞌaká inaꞌuké palá, palá ripechu iꞌimakare nakú!”
12 Ilé ke nañapátaka pajimila nakuwá chiraꞌakano ejomi, Mardoqueo paꞌaró piño neꞌemakana ñakaré numaná ejo yáꞌajo. Eyá Amán paꞌaró peyajwé riñakaré ejo. Apáraꞌakeja rijimá ke ripaꞌakó, kamuꞌují wani ripechu iꞌimaká akuwaná. 13 Riphaka riñakaré ejo ee, riꞌimá riyukuna riyani jalojlo, rijwákeꞌenajlo waꞌaté. Nemaꞌaká aú riyukuna nemá rijló:
—Apala chuwa unká weꞌemakana pechu iꞌimalá pinaku: “Ajopana chaje riká”, ke. Judío jaꞌa Mardoqueo, unká méñoꞌojo picháꞌatalaje riká. Waweꞌepí pikapichájiko.
14 Re joꞌó kaja joꞌó napuraꞌakó rinaku, eꞌiyowá ke neꞌemakana waꞌaté jápajeño iphaka nanaku, nawáꞌakaloje Amán kiñaja Ester ñakaré ejo, riꞌijnakáloje neꞌemakana waꞌaté raꞌajnewá ajñaje, ajopana re iꞌimakaño waꞌaté.