Ester iꞌijnaká neꞌemakana chaje yukuna marí
5
E kaja weji ke kala jaꞌapaka ejomi, Ester aꞌayó runakuwá palá nojé aꞌarumakaji, neꞌemakánaruja kalé aꞌajíkare nanakuwá. Rejomi ruꞌujná neꞌemakana chaje. Kaja ewaja ruphá rikapure numaná awaꞌajé, rejé rutáraꞌo. Re riyaꞌo palani ñákaꞌajori chu. Puꞌuwaká romaka riyáꞌako rinumaná chiyá. 2 Ramaka aú Ester táraꞌako rikapure awaꞌá, ripechu laꞌó rijló puꞌují wani, e riyaꞌatá ruchaje rikutiware, oro nakiyá laꞌakanami aú. Rejéchami ruꞌujnaká rawaꞌajé, rujapa rikutiware manáure nakú. 3 Rimá rojló:—¿Meke chi pijló nakaje? ¿Na piwata? Pikejáꞌajika ee nuliyá peꞌiyowá nakaje wakapi iꞌimakare, nujwaꞌatéjena waꞌaté nakiyana, noꞌojé pijló riká.
4 Raú Ester kemayo rijló:
—Palani riꞌimajika ee pijló, nuwata piꞌijnaká nuchaje chuwajá, pajñákaloje paꞌajnewá nujwaꞌaté penaje. Kaja nuwakáriꞌicha rilaꞌakana pijló, kajrú wani wephákale paꞌapí. Nuwata kaja piwáꞌaka pijwaꞌató Amán rejo.
—Ñaké riká ke —ke rimaká rojló.
5 E rimá rawaꞌá iꞌimakáñojlo:
—Ikulicha meꞌetení kiñaja Amán, weꞌejnakáloje Ester chaje waꞌajnewá ajñaje, rumíchaka nojló ke.
Nephátaka riká ee, neꞌemá Amanjlo riyukuna, raú neꞌejná pajñakani rejo neꞌemakana waꞌaté, Ester ñakaré ejo naꞌajnewá ajñaje rujwaꞌaté. 6 Najñaka naꞌajnewá ketana, neꞌemakana kemaká rojló:
—Pikejaꞌa nuliyá meꞌetení nakaje piwátajikare. Unká numejñátalaje piliyá riká, noꞌojé pijló riká. Pikejáꞌajika ee nuliyá peꞌiyowá nakaje wakapi iꞌimakare, nujwaꞌatéjena waꞌaté nakiyana, noꞌojé pijló piyuke piwátajikare.
7 Eꞌiyonaja Ester kemayo rijló:
—Marí nakuja kalé nuwata pijló kemakana: 8 Inaꞌuké wani piꞌimajika ee nujwaꞌaté, pilaꞌakáloje nakaje nuwátakare kaje penaje, nuwata piꞌijnaká piño majó muní Amán waꞌaté aꞌajnewá ajñaje. Muní nuwakáraꞌajika piño aꞌajnejí laꞌakana pijló, kajrú wani wephákale paꞌapí. Rejomi numaje pijló na aú ka nuwata paꞌaká nuñathé.
—Je —ke rimaká.
Amán wátaka Mardoqueo nókana yukuna marí
9 Puꞌují ripechu ke Amán paꞌakó najñaka naꞌajnewá iꞌimaká eyá, palani kaja aꞌajnejí rajñákare iꞌimaká rijló. Eꞌiyonaja riphaka neꞌemakana ñakaré numaná ejo ee, ramá Mardoqueo yáꞌako. Unká meke Mardoqueo laꞌalá ramaka riká aú. Unká ráchoꞌolo, unká kaja meke rilaꞌalá, riphákaloje raꞌapí penaje. 10 Ilé kaje yúchaꞌatari wani Amán, eꞌiyonaja rijñaꞌá panaku riyuchá. Riphaka riñakaré chojé ee, riwaꞌa rijwákeꞌena maná. Rimá kaja riyani jaló Zeresjlo, ruꞌumakáloje re najwaꞌaté pajñakani penaje. E kaja nephá rinaku piyukeja. 11 E ripuraꞌó rinakuwá najwaꞌaté, rimá najló:
—Re kajrú wani nuliñérute chuwaka; kajrú wani kaja nakaje nukapi, palá wani nakaje nojló; re kajrú nuyani achiñana. Palá kaja weꞌemakana laꞌaká nuká, raꞌá nuká nuꞌumakáloje ajopana raꞌapiyatéjena wakáraꞌajeri penaje.
Rimá kaja najló:
12 —Maapami weꞌemichá weꞌemakana waꞌaté waꞌajnewá ajñaje weꞌemakánaru Ester ñakaré chojé. Nukaja kalé ruyukupériꞌicha, nuꞌujnakáloje rijwaꞌaté ruchaje. Rumicha kaja wajló, weꞌejnakáloje piño rejo muní waꞌajnewá ajñaje. 13 Palani ilé kaje nojló piyuke, eꞌiyonaja unká na penaje ilé kaje iꞌimalaje nojló piyuke, Mardoqueo ta yáꞌajiko weꞌemakana ñakaré numaná awaꞌá ketana.
14 Raú riyani jaló, piyuke rijwákeꞌena waꞌaté, kemaño rijló:
—Piwakáraꞌa nalaꞌaká nanúrupi ajñoꞌojona paná yenoje wani, veintidós metros ketana yenuka. Eyá muní lapiyami pimaje weꞌemakánajlo, riwakáraꞌakaloje nakúwaꞌataka riká ta jamaká pijnuru aú rinakiyá. Rejomi piꞌijnajé puꞌují pipechu ke paꞌajnewá ajñaje Ester ñakaré ejo.
Palani Amanjlo nakaje nemakare nakú rijló iꞌimaká, raú riwakáraꞌa nalaꞌaká nanúrupi ajñoꞌojona paná yenoje wani, nakúwaꞌatakaloje rinakiyá Mardoqueo penaje.