4 Inaana jápakeño Ester waꞌaté, eyá achiñana, ruwaꞌaphena iꞌimajíkaño, iꞌimaño rojló mékeka namaka Mardoqueo jaꞌapaka puꞌuwareni wani raꞌarumaká, mapeja costal keja amákanami chu. Ilé kaje aú kajrú wani rowó kaꞌakó rijwaꞌaté. Ruwakáraꞌa rijló apú aꞌarumakaji, rapiyákakaloje riká, puꞌuwareni wani rinaku iꞌimakare apumí chojé, eꞌiyonaja unká rijñaꞌalá riká naliyá. 5 Raú Ester wáꞌayo neꞌemakana waꞌaphena wakáraꞌajeri Hatac maná, riꞌijnakáloje Mardoqueo liyá yuku kejáꞌaje, rimakáloje rijló nájeka rilaꞌá ñaké. Raú riꞌijná rijwaꞌaté puraꞌajó, rikejáꞌakaloje riliyá riyukuna penaje. 6 Re riphata riká pajimila jiwami chu, neꞌemakana ñakaré numaná lokoꞌopani. 7 E Mardoqueo iꞌimari rijló meke nawátaka nenótakana piyuke yukuna. Riꞌimá kaja rijló mékeka Amán kemaká naliñérutemi awakátakana nakú, neꞌemakana liñérute ñakarelana chojé yukuna. 8 Raꞌá kaja rijló papera kaje, nalanaꞌakare chojé piyuke nenótakana yukuna, Ester weꞌepíkaloje raú palá wani riyukuna penaje. Rimá kaja rijló, Ester iꞌijnakáloje neꞌemakana chaje, rupuraꞌakóloje nachaya rijwaꞌaté, riweꞌepíkaloje rukáꞌana muꞌují penaje.

9 Raú Hatac paꞌaró riyukuna iꞌimajé rojló. Riꞌimá rojló piyuke nakaje Mardoqueo kemakare nakú rijló yukuna. 10 Romaꞌaká riyukuna ejomi, ruwakáraꞌa piño Hatac paꞌakó Mardoqueo iꞌimaká ejo, rimakáloje rijló marí ke: 11 “Piyuke jápaño neꞌemakana waꞌaté, eyá piyuke raꞌapiyatéjena, ajopana teꞌeré ewá iꞌimakaño waꞌató, weꞌepiño unká meke laꞌajé iná iꞌijnalajla mapeja weꞌemakana chaje. Riwáꞌakarena manaja kalé iꞌijnáñojla riꞌimaká ejo. Kaja piyuke inaꞌuké weꞌepika ñaké riká, kaja ñaké nalanaꞌakale rinakojé. Eyá mapeja iꞌijnakaño riꞌimaká ejo, riwakáraꞌa nókana. Eꞌiyonaja riyaꞌatákarena chaje rikutiware, oro nakiyá laꞌakanami aú, neká chájeja kalé ramó. Eyá pajluwata keri ketana cha weká, unká joꞌó riwáꞌala numaná”, ke Ester wakáraꞌaka rijló purákaꞌaloji.

12 Ilé ke riꞌimaká Mardoquéojlo Ester purákaꞌalo yukuna. Remaꞌaká rupurákaꞌalo ejomi, riwakáraꞌa piño rojló purákaꞌaloji marí ke: 13 “Piꞌijnatániña pipéchuwa pinakuwá: ‘Palá nuká maare. Neꞌemakana ñakaré chu nuꞌumakale, raú nukaja kalé, pajluwájaru judíona jáꞌalo, iꞌimajeyó naliyá’, ke. 14 Ñakele meꞌetení, unkájika ee pipuraꞌó wachaya rijwaꞌaté, apú iꞌimatájeri weká kapichákajo liyá. Eꞌiyonaja piká, piyuke pikáꞌana waꞌaté takaꞌajeño. Palá paja piká meꞌetení weꞌemakánaru, piꞌimatákaloje weká marí kaje liyá penaje. Apala ripenaje kaꞌajná naꞌá piꞌimaká weꞌemakánaru penaje”, ke riwakáraꞌaka rojló purákaꞌaloji.

15 Ilé ke riꞌimaká piño Esterjlo Mardoqueo purákaꞌalo yukuna, raú ruwakáraꞌa piño rijló marí purákaꞌaloji: 16 “Piꞌijná pajimila Susa eꞌiyowá, pawakata piyuke judíona maárowa iꞌimakaño. Eko pimá najló, neꞌetakóloje naꞌajné liyá weji ke kala ketana, kecha napuraꞌakóloje Tupana waꞌaté nuchaya penaje. Eyá nuká, nujwaꞌaté jápajeño waꞌaté, laꞌajeño ñaké kaja. Weji ke kala ejomi, nuꞌujnajé weꞌemakana chaje, nenoka inaꞌuké richona eꞌiyonaja. Nenójika ee nuká ripachá, nenólareja nuká”, ke Ester wakáraꞌaka rijló purákaꞌaloji.

17 Rejomi Mardoqueo iꞌijnari Ester wakáraꞌaka riꞌimaká ke laꞌajé.