Introducción
3
Agag michú lakénami nakiyana Amán iꞌimaká. Júpimi ke Tupana wakáraꞌaka Israel lakénami kapichátaka neꞌemaká piyukeja wani, eꞌiyonaja unká nemaꞌalá raꞌapiyá iꞌimaká. Neꞌemakana penájemi Saúl michú pinátari neꞌemaká, ñakele chapú Amán amájika Israel lakénami (judíona), raú rilaꞌaké neká riwátaka ke. Kaja riwátake namákana chapú, júpimi namájika neꞌemajika ke kaja. Judíona akúwaꞌatakeño newílaꞌaru kawakaje, natáraꞌako kaja neꞌerúpachi aú, napuraꞌajiko kewá Tupana waꞌaté, nephájikale raꞌapí. Eyá inaꞌuké jimaje unká wani natáraꞌako neꞌerúpachi aú, unká kaja nakúwaꞌatake newílaꞌaru kawakaje najimaje. Tupánajloja kalé nalaꞌaké ñaké. Eyá unká judíona kalé iꞌimakaño, rewá iꞌimajíkaño, akúwaꞌatakeño newílaꞌaru ajopana jimaje; natáraꞌako kaja neꞌerúpachi aú ajopana jimaje, naweꞌepíkaloje raú nephaka wani naꞌapí. Eyá unkájika ee nalaꞌaké ñaké ajopana inaꞌukena wakáraꞌajeño jimaje, napechu iꞌimaké nanaku: “Nephaka naꞌapiwá nojló”, ke.
Mardoqueo, eyá Amán, kele yukuna marí
1 Rejomi, júpichami kemachi iꞌimajemi, neꞌemakana Asuero aꞌarí pajluwa, riꞌimakáloje raꞌapiyatéjena nakiyana wakáraꞌajeri penaje. Rií iꞌimari Amán. Hamedata iꞌirí riꞌimaká, Agag lakénami nakiyana riꞌimaká. 2 Piyukeja neꞌemakana waꞌaté jápajeño akúwaꞌatajika newílaꞌaru Amán jaꞌapájika nawaꞌawá kewá; ñakeja kaja nalaꞌajika ritáraꞌajiko najimaje kewá, nephájikale raꞌapí. Neꞌemakana wakáraꞌajikale nalaꞌaká ñaké, nalaꞌaké ñaké. Eꞌiyonaja Mardoqueo unká wátake riwílaꞌaru akúwaꞌatakana rijimaje, neꞌemakana wakáraꞌajika nalaꞌaká ke.
3 Ajopana rijwákeꞌena, neꞌemakana waꞌaté jápajeño kaja iꞌimakaño, kemakeño Mardoquéojlo:
—¿Naje chi unká pemaꞌalá ta weꞌemakana jaꞌapiyá?
4 Weꞌechú kaꞌalá keja nemájikajla rijló ñaké, eꞌiyonaja unká remaꞌaké naꞌapiyá, kaja rimá najló iꞌimaká:
—Judío jaꞌa nuká.
Ilé kaje aú neꞌejná riyukuna iꞌimajé Amanjlo, namákaloje mékeka rilaꞌaká raú. 5 E Amán jaꞌapari Mardoqueo awaꞌayá, ramákaloje kewákaka unká rakúwaꞌatala riwílaꞌaru rijimaje. Unká kaja kaꞌajná ritáraꞌalajo riꞌirúpachi aú rijimaje. Unká Mardoqueo laꞌalá ilé ke rijimaje, raú kajrú wani riyúchaꞌako richá. 6 Ilé kaje chona riwata riwajákana, eꞌiyonaja nemá rijló iꞌimaká: “Judío jaꞌa riká”, ke. Raú ripechu iꞌimá: “Unká rikátaja kalé nuwajaje; piyukeja nutajátajika riká ta, rikáꞌana waꞌaté, Asuero waꞌatéjena iꞌimakaño eꞌiyayá”, ke Amán pechu iꞌimaká.
Amán wátaka piyukeja judíona nótakana yukuna marí
7 Kaja iyamá iphata jiꞌimaji nakojé kele jarechí ketánacha, neꞌemakana iꞌimaká nawakáraꞌakana nakú. Wajé apú jarechí keñoꞌokó ee, nakaꞌá mapeja nakaje lanaꞌakéjami Amán jimaje, raú naweꞌepíkaloje na wakajeka palani rijló judíona kapichátakana penaje. Nakaꞌaká riká ejomi, najñaꞌá reꞌiyayá pajluwata. Riká lanaꞌakéjami najñaꞌakare chu kemari: “Jarechí tajnájiko wakajé, kaja penaje keri lapaꞌatájiko trece cha wakajé, nakapichátakana iꞌimajé”, ke richu kemaká. 8 Júpichami Amán kemaká neꞌemakana Asuérojlo:
9 —Re kajrú pijwaꞌatéjana, ajopana teꞌeré ewá, ajopana teꞌeré ewá ke. Re kaja ajopana inaꞌuké neꞌiyá. Neká laꞌañó nakaje nekámika keja; apoꞌojó wani kaja napurákaꞌalo lanaꞌakéjami nemaꞌakare jaꞌapiyá. Ñakele palani riꞌimajika ee pijló, wawakáraꞌaje pipurákaꞌalo lanaꞌakéjami piyukeja paꞌapiyatéjenajlo. Richu pimaje najló, ilé kajena kapichátakana iꞌimakáloje piyuke weꞌiyayá. Ilé ke walaꞌajika neká, rejomi nujñaꞌajé naliñérutemi, nuyuríkaloje pijló riká riñakarelana chojé, paꞌapiyatéjenajlo waꞌaté penaje. Tres cientos treinta mil kilos ewá kaꞌajná naliñérutemi jená ñaꞌajó, riká yuréjero wajló.
10 Raú neꞌemakana kaꞌarí riyatewana nakiyá rileꞌejé anillo. Rejomi raꞌá riká Amanjlo, rilaꞌakáloje raú sellar papera kaje rilanaꞌajíkare, ajopana weꞌepíkaloje raú neꞌemakana purákaꞌalo wani riká penaje. Kaja riyurí rileꞌejé anillo chapú judíona nakú péchurijlo, 11 rejomi rimá rijló:
—Piyuke naliñérutemi yuríjiko pijló, ñakele pilaꞌá neká pipechu nakú nalaꞌakana iꞌimajika ke.
12 E rikaja kaja keri iꞌimaká trece wakajé, rawakata piyuke neꞌemakánajlo papera kaje lanaꞌajeño. Rejomi riwakáraꞌa nalanaꞌaká raꞌapiyá ripurákaꞌalo, rimaká ke, nawakáraꞌakaloje riká ajopana raꞌapiyatéjenajlo, ajopana raꞌapiyatéjenajlo ke, piyuke ajopana teꞌeré ewá, ajopana teꞌeré ewá ke iꞌimakáñojlo. Keꞌiyapejé purákaꞌaloji chu napuraꞌakó, raú riwakáraꞌa nalanaꞌaká najló riká napuraꞌakó chu waja. Nañapátakaja rilanaꞌakana ejomi, nayáꞌata neꞌemakana Asuero ií richojé. Rejomi rilaꞌá sellar riká neꞌemakana leꞌejé anillo aú, naweꞌepíkaloje raú kewaka neꞌemakana purákaꞌalo riꞌimaká. 13 Rejomi nawakáraꞌa riká raꞌapiyá wakáraꞌajeñojlo, ajopana teꞌeré ewá, ajopana teꞌeré ewá ke iꞌimakáñojlo. Ripurákaꞌalo lanaꞌakéjami chu kemari, nakapichátakaloje riká japi waja piyukeja judíona: yuwaná, walijímakana, ináyana, pheñawilana, inaana, kerákoꞌopana, kajena piyukeja wani, nakapichátakaloje neká penaje, eyá piyuke nanánemi yuríkoloje kaja najluwa penaje. Raꞌá kaja najló nakapichátakana jená: kaja penaje keri lapaꞌatájiko trece cha wakajé, ke. 14 Kaja nawakáraꞌata piyuke ripurákaꞌalo lanaꞌakéjami najló, piyukeja wani inaꞌuké jemaꞌakáloje riyukuna penaje. Nakaje neꞌemakana wakáraꞌajikare nalaꞌaká, nalaꞌaké rimájika najló ke. Kaja nemaꞌá riyukuna piyukéjajlo, nalamáꞌatakoloje nenótakana leꞌejé paká penaje. 15 Riká penájeja neꞌemakana wakáraꞌaka neꞌejnataka ripurákaꞌalo lanaꞌakéjami apú ewá, apú ewá ke, nayuríkaloje ripurákaꞌalo ajopánajlo, ajopánajlo ke penaje. Pajimila Susa ewá waꞌató riyukuna jemaꞌó kaja: “Nenótajika chuwa judíona”, ke. Ilé kaje yukuna judíona jemaꞌaká aú, kajrú wani napechu kaꞌakó. Naꞌapona ke manaꞌija neꞌemakana yáꞌako Amán waꞌaté, kawí kaje iꞌirakana nakú neꞌemakana ñakaré chu.