—Waweꞌepí palani wawakátaka pijló piyuke ináyana paláruna wani, piyuke marí pajimila eꞌiyowá, unká joꞌó yaꞌatálaño nekó achiñánajlo. 3 Ñakele paꞌajé ajopana teꞌeré eyá, ajopana teꞌeré eyá ke nakiyana, nakulákaloje pijló neká piyukeja pijwaꞌatéjena eꞌiyayá penaje. Neká wáꞌajeño neká majó pajimila Susa ejo, nayuríkoloje piluna ñakaré chu. Re richiyá wakáraꞌajeri Hegai amájeri neká. Riká wakáraꞌajeri ajopana lamáꞌataka neká palá, neꞌemakáloje paláruna wani penaje. 4 Eyá mékajeruka, kajrú wani piwátajikareru, yuréjeyo neꞌemakánaru penaje Vasti apumí chojé —ke nemaká rijló.

Palani nakaje, napechu nakú iꞌimakare, iꞌimaká neꞌemakánajlo, raú riwakáraꞌa nalaꞌaká ñaké.

5 Riwakajé riká pajimila Susa nakú re pajluwa judío jaꞌa iꞌimaké. Rií iꞌimari Mardoqueo, Jair iꞌirimi riꞌimaká. Simí, eyá Quis, kele ikáꞌanami nakiyana riꞌimaká. Benjamín lakénami nakiyana kaja riꞌimaká. 6 Nabucodonosor iꞌimaké wakajé Babilonia teꞌeré eyájena iꞌimakana wakajé, kajrú nawáꞌaka Jerusalén eyájena, judíona, najwaꞌató. Nanakiyana Mardoqueo iꞌimaká. Riwakajé kaja nawaꞌa najwaꞌató Jeconías, Judá teꞌeré eyájena iꞌimakana iꞌimaká. 7 Re rijwaꞌaté reꞌeweló Ester iꞌimaké; re rokúwaꞌako rijwaꞌaté. Kaja júpimi ke ruchiꞌiná michuna takaꞌañáaka ruꞌumaká, raú riwaꞌa ruꞌumaká, rilamáraꞌakaloje ruká rítuwa ke penaje. Hadasá ruí iꞌimaká, nemaké kaja rojló Ester, ke. Palaru wani ruꞌumaká, palá kaja runapona amako.

8 E kaja neꞌemakana wakáraꞌari piyukeja ináyana awakátakana rejé. Raú nawakata kajrú neká riluna ñakaré chojé pajimila Susa ejé. Hegai iꞌimari namájeri. Rejo nawaꞌa kaja Ester, re ruꞌumá najwaꞌaté. 9 Riluna ñakaré chiyá wakáraꞌajerijlo palaru Ester iꞌimaká, raú palá ripechu iꞌimajika runaku. Raú riwakáraꞌake ajopana lamáꞌataka ruká palá, richaje palaka romákoloje penaje. Raꞌaké kaja rojló palá nojé aꞌajnejí, palá nojé pukunaji kaja raꞌaké rojló reꞌiyayá, eyá pajluwa kuwáꞌata kele inaana raꞌá rujwaꞌaté jápajeño penaje.

10 Unká najló rumaké naka ruꞌumajika, unká kaja rumalá najló: “Judíona jáꞌalo nuká”, ke. Ruꞌujnaká yámona, Mardoqueo kemari rojló, rumaká piyá runakuwá najló: “Judíona jáꞌalo nuká”, ke.

11 Weꞌechú kaꞌalá keja Mardoqueo chiraꞌajiko ukapú nawakátakare chojé inaana kópiwa, riweꞌepíkaloje e kaꞌajná palá Ester iꞌimajika najwaꞌaté, palá kaja kaꞌajná namájika ruká.

12 Pajluwa jarechí ketana neꞌemaká ináyana nawakátakarena lamáꞌatakana nakú, namákoloje paláruna wani penaje. Pajluwa kuwáꞌata keta keri ketana neꞌemaká mirra jilami aꞌakana nakú nanapona nakuwá. Eyá apú pajluwa kuwáꞌata keta keri ketana neꞌemaká piño puꞌumé amarí aꞌakana nakú nanakuwá, inaana rewá iꞌimakaño aꞌajíkareno nanakuwá. Ilé kaje nañapátaka piyuke ejéchami, pajluwájano, pajluwájano ke, neꞌejnaká nekó yaꞌataje neꞌemakana Asuérojlo, ramákaloje neká penaje.

15 Kaja ewaja riphá rená chojé, Ester iꞌijnakáloje neꞌemakana chaje rokó yaꞌataje penaje. Nakaje Hegai kemakare nakú rojló, rujñaꞌakáloje rujwaꞌató penaje, rikaja kalé rujñaꞌá rejo. Kaja palá piyukeja riluna ñakaré chiyá jápajeño pechu iꞌimajika runaku. 17 E kaja ruphá neꞌemakana nakú. Ramaka ruká ejomi, rukaja kalé riwata neꞌiyayá. Íkiꞌija wani riwátaka ruká; unká ñaké kalé riwátaka ajopana ináyana rupiyá iꞌimakaño, rukaja kalé riwata íkiꞌija wani. Raú raꞌá ruwílaꞌaru nakojé pútenaji kaje, neꞌemakánarujloja kalé iꞌimakare. Raú raꞌá ruká Vasti apumí chojé neꞌemakánaru penaje. 18 Rejomi rikajmoꞌó piño. Riyukupéraꞌa piyuke raꞌapiyatéjena, nakajmoꞌokóloje rijwaꞌaté penaje, namákaloje neꞌemakánaru penaje. Liñeru, rikejáꞌakare rijwaꞌatéjena liyá, nakú rimá najló, nawakáraꞌakaloje rijló rimaká najló júpimi ke jaꞌapejé. Rilamáꞌata kaja neká kajrú nakaje aú, iná iꞌimakana aꞌakare inajlo kaje aú.

19 E kaja nanúkaꞌata ajopana ináyana apaꞌalá, riñakaré jepoꞌoná keja iꞌimakare chojé. Re Mardoqueo yáꞌako neꞌemakana ñakaré numaná awaꞌá. 20 Eyá Ester, unká rupuraꞌaló ajopana waꞌaté ruchiꞌiná michuna nakú, unká kaja rupuraꞌaló rukáꞌana nakú. Mardoqueo wakáraꞌaka rulaꞌaká ruꞌumaká rijwaꞌaté wakajé, ke rulaꞌaká. 21 E riká yáꞌako re ketana, remaꞌaká Bigtán, eyá Teres waꞌaté, puraꞌakó pajwaꞌatéchaka neꞌemakana nókana nakú. Neꞌemakana ñakaré numaná waꞌaphena neꞌemaká. Neká yúchaꞌaño neꞌemakana cha, raú napuraꞌó pajwaꞌatéchaka, nekámika ke, rinókana nakú. 22 Palá Mardoqueo jemaꞌaká mékeka napuraꞌakó pajwaꞌatéchaka rinókana nakú, raú riꞌimá neꞌemakánaru Esterjlo riyukuna. Ruká iꞌimayo neꞌemakánajlo mékeka rimaká rojló yukuna. 23 Raú riwakáraꞌa ajopana, nakejáꞌakaloje palá riyukuna, naweꞌepíkaloje kewaka wánika napuraꞌakó rinókana nakú penaje. Kaja ewaja naweꞌepí kewaka nawátaka rinókana, raú riwakáraꞌa nakúwaꞌatakana nanúrupi nakiyá, natakaꞌakáloje rejé penaje. Ilé ke nalaꞌaká ejomi, riwakáraꞌa ajopana yáꞌataka riyukuna papera kaje chojé, nayáꞌatajikare chojé neꞌemakana, raꞌapiyatéjena, kele yukuna.