3 Neꞌemakana iphátaka weji kele jarechí ketana cha nawakáraꞌajeri iꞌimakana wakajé, rikajmoꞌó. Piyuke raꞌapiyatéjena, suráana wakáraꞌajeño, ajopana raꞌapiyá wakáraꞌajeño, kélejlo rilaꞌá kajmoꞌokajo, namákaloje mékajeka riká penaje. 4 Raú naweꞌepíkaloje kaja kajrú wani liñéruteri riꞌimaká, piyukeja wani kaja nakaje iꞌimakare kapi, penaje rilaꞌá najló kajmoꞌokajo. Pajluwa kuwáꞌata keta keri ketana neꞌemaká kajmoꞌokajo nakú. 5 Nañapátakaja kajmoꞌokajo ejómija rikajmoꞌó piño. Iyamá kuwáꞌata ke kala ketana rikajmoꞌokó piño riñakaré kopi. Palá nojé wani riñakaré iꞌimaká, ñaké kaja rikópiwa iꞌimaká. Keꞌiyapé nojé aꞌawaná iwí iꞌimari ejátakeja rawaꞌawa. Piyukeja Susa ewá iꞌimakaño riyukupéraꞌa, neꞌejnakáloje rijwaꞌaté kajmoꞌojó penaje. 9 Naꞌapona ke ñaké kaja apaꞌalá riñakaré chu rijwákeꞌewelo, neꞌemakánaru Vasti, kajmoꞌokó kaja. Asuero kajmókaꞌala ejo iꞌijnakaño yajálona waꞌaté rukajmoꞌó.

10 Iyamá kuwáꞌata ke kala cha neꞌemaká kajmoꞌokajo nakú ejéchami, puꞌují wani neꞌemakana pechu iꞌimaká kajmú kaje jalá amúraꞌatakeja iꞌirakana aú. E riwakáraꞌa iyamá kuwáꞌata kele rijwaꞌaté jápajeño, palá ripechu iꞌimajíkarena nakú nakiyana, iꞌijnaká neꞌemakánaru wáꞌaje. 11 Ruwílaꞌaru nakú pútenaji kaje palani wani iꞌimá. Riwata nawáꞌaka ruká riꞌimaká ejo, raꞌapiyatéjena, eyá ajopana wakáraꞌajeño amákaloje ruká penaje, palaru wani ruꞌumakale. 12 Raú neꞌejná rejo. Nephaka runaku ee, nemá rojló: “Weꞌemakana kemíchari pinaku, piꞌijnakáloje richaje penaje”, ke. Eꞌiyonaja unká ruꞌujnalá najwaꞌaté rejo, riwáꞌaka rumaná eꞌiyonaja. Raú napaꞌó riyukuna iꞌimajé neꞌemakánajlo. Kajrú wani riyúchaꞌako raú, unkale ruꞌujnalá richaje. 13 Raú ripuraꞌó weꞌepiño purákaꞌaloji lamáꞌatakana nakojé waꞌaté. Palá naweꞌepíjika purákaꞌaloji lanaꞌakéjami kemari mékeka inaꞌuké wajákana nakojé, raú neká kemakeño mékeka nalaꞌakana iꞌimajika. 14 Ilé kajena aꞌakeño wani nawakáraꞌajeri ñathé, ilé kaje purákaꞌaloji iꞌimajika ejéchami. Marí kele neꞌemaká: Carsená, Setar, Admata, Tarsis, Meres, Marsená, Memucán, kele. Ajopana chaje naweꞌepíjika. Persia, eyá Media, kele teꞌeré eyájena neꞌemaká. Neká raꞌá iꞌimaká, naꞌakáloje nanakojó rijwaꞌatéjena wakáraꞌakana rijwaꞌaté penaje. 15 Najló rimá:

—¿Meke walaꞌajika Vasti chuwa, unká pachá romaꞌalacha noꞌopiyá? ¿Meke wapurákaꞌalo lanaꞌakéjami wemaꞌakare jaꞌapiyá, kemaká marí kaje nakú?

16 Pajluwaja nanakiyana, Memucán rií iꞌimaká, kemari rijló, piyuke raꞌapiyá wakáraꞌajeño jimaje:

—Unká pijloja kalé unká paala nakaje Vasti liꞌichaje, ñaké waja piyuke paꞌapiyatéjenajlo nakaje unká wani paala ruliꞌichaje. 17 Ajopana inaana jemaꞌajika ee kaꞌajná ilé ke ruliꞌichaje piká yukuna, e kaꞌajná unká kaja nephálaje ñaké kaja naluna jaꞌapí. Nemaje kaꞌajná: “Weꞌemakana wani wáꞌarijla Vasti maná iꞌimaká, eꞌiyonaja unká ruꞌujnalá richaje iꞌimaká”, ke. 18 Piyuke paꞌapiyatéjena Persia, eyá Media ewá iꞌimakaño, luna jemaꞌajika ee riyukuna, nalaꞌajé ñakeja kaja naluna waꞌaté. Rupachá unká neꞌemalaje palá pajwaꞌatéchaka. 19 Ñakele, weꞌemakana, palani pijló marí ke laꞌakana iꞌimajika ee, pilaꞌajé ñaké: Chuwa kaja piyuríniña Vasti iꞌijnaká majó pichaje. Marí purákaꞌaloji wemakare nakú pijló, walanaꞌajé kaja papera kaje chojé, kaja keja riꞌimakáloje penaje. Rejomi paꞌajé apaꞌawelo, piweꞌepíjikareru iꞌimaká palani neꞌemakánaru penaje ropumí chojé. 20 Ilé ke piwakáraꞌajika ruká, piyuke pijwaꞌatéjena jemaꞌakáloje riyukuna penaje, raú piyuke inaana iphájika naluna jaꞌapí —ke Memucán kemaká rijló.

21 Palani neꞌemakánajlo nakaje Memucán kemakare nakú rijló iꞌimaká, ñaké kaja palá riꞌimaká raꞌapiyá wakáraꞌajeño pechu nakú. Raú riwakáraꞌa nalanaꞌaká piyuke nakaje Memucán kemakare nakú rijló. 22 Riwakáraꞌa kaja purákaꞌaloji lanaꞌakéjami raꞌapiyatéjena wakáraꞌajeñojlo piyuke. Richu rimá najló rinakojé, nemaꞌakáloje raꞌapiyá penaje. Ajopana teꞌeré, ajopana teꞌeré ejo, ke riwakáraꞌaka riká. Napuraꞌakó chu waja rilanaꞌá najló riká, naweꞌepíkaloje palá rinakojé penaje, naweꞌepíkaloje raú achiñana iꞌimaká nañakaré chiyá wakáraꞌajeño. Neká waja kemájeño nakaje nakú, kaja keja rilaꞌakana iꞌimakáloje penaje.