7
Kaja wañapata kurara chipúkaꞌatakana pajimila nakojé; wañapata kaja piyuke rinumaná patoꞌotákana rinumaná iꞌimaká ewá. Rejomi noꞌó neꞌiyajena rinumaná waꞌaphena penaje; noꞌó kaja neꞌiyajena jatanéjeño penaje; noꞌó kaja Leví lakénami, nalaꞌakáloje najápakaꞌala penaje. 2 Noꞌó kaja noꞌowé, Hananí, riꞌimakáloje Jerusalén eyájena wakáraꞌajeri penaje, eyá raꞌapiyateje penaje noꞌó Hananías. Hananías iphákeri wani Tupana jaꞌapí, richáꞌatake ajopana inaꞌukena raú. 3 Numá najló: “Ijmeꞌetániña pajimila numaná lapiyami wani. Palá kamú jáchoꞌojiko ejomi, iwakáraꞌaje rijmeꞌetákana. Eyá laínchu, riwaꞌaphena paꞌajiko nañakaré ejo piyá, iwakáraꞌaje ritakana”, ke nuwakáraꞌaka neká. Noꞌó kaja neꞌiyajena, neꞌemakáloje apú eyá, apú eyá ke, pajimila eꞌiyajena waꞌaphena. Nañakaré kópiwa re kaja nawaꞌaphé iꞌimaké. 4 Kajruni wani pajimila iꞌimaká, eꞌiyonaja unká kemachi inaꞌuké iꞌimaké kajrú wani reꞌiyowá, unká joꞌó wani nalaꞌalale piño nañakaró re.5 Eyá Tupana aꞌarí nupechu nakojé, nowakátakaloje piyuke ajopana chaje iꞌimakaño, pajimila eꞌiyá wakáraꞌajeño waꞌaté, nayáꞌatakaloje papera kaje chojé inaꞌuké ií penaje. Richu nayáꞌata naraꞌapá ií, riyani ií waꞌaté. Ají ke natajátaka piyuke nejena, apú, apú ke, júpimi iphákaño iꞌimaká yukuna. Nuphata kaja jupichumi papera kaje, nayáꞌatajikare chojé paineko iphákaño michuna ií. Marí ke richu nalanaꞌakare kemaká:
6-7 “Nayáꞌata inaꞌuké ií mothoꞌoñó Judá teꞌeré nakú iꞌimaká. Nabucodonosor michú kaꞌarí wateꞌeré waliyá iꞌimaká, rejomi riwaꞌa weꞌemaká maare eyá, ají ke riteꞌeré Babilonia ejo iꞌimaká. Kaja kajrú wapaꞌatako piño majó Judá teꞌeré ejo. Neꞌiyajena paꞌañó majó Jerusalén ejo, ajopana iphaño nañakajela ejo, nañakajela ejo ke, maare Judá teꞌeré ejo. 8-25 Dieciséis mil, ochocientos diecisiete Jerusalén eyájena iꞌimaká paꞌañó. 26-69 Eyá ajopana piño, íkiꞌiruna neꞌemaká, paꞌañó kaja nañakajela ejo. Neká, Jerusalén eyájena waꞌaté, iꞌimaño cuarenta y dos mil trescientos sesenta”.