Mapeja wani napuraꞌakó Nehemías nakú yukuna marí
6
E kaja Sanbalat, Tobías, eyá Guésem, árabe jaꞌa, eyá piyuke chapú wanaku péchuruna, kele jemaꞌañó kaja wañapátaka kurara chipúkaꞌatakana pajimila nakojé yukuna. Palá wani kaja wetátaka piyuke raphú reꞌiyowá iꞌimakare. (Pají numanaja kalé iꞌimari mañapátakanaru joꞌó riwakajé, kaja unká joꞌó wapatoꞌotala piyuke rinumaná richuwá iꞌimaká.) 2 Raú Sanbalat, Guésem waꞌaté, wakáraꞌaño nojló purákaꞌaloji, nuꞌujnakáloje pajimila Onó teꞌeré ejo najwaꞌaté awakajo, re wapuraꞌakóloje pajwaꞌatéchaka penaje. Nawata wawakako ipuré, Onó teꞌeré jiwami chojé. Mapeja napajlaka nujwaꞌaté, nalaꞌakáloje nuká chapú re penájeja. 3 Raú nuwakáraꞌa najló purákaꞌaloji, numá najló: “Jápakaje nakuja wani nuká maare, ñakele unká meke laꞌajé nuyurila riká mapeja, nuꞌujnakáloje amaje penaje. Nuꞌujnakela ichaje, e imaláraꞌatajla weká júpija wani wajápakaꞌala liyá, raú unká ramálojla wajló kiñaja”. 4 Paꞌu ke pe nawakáraꞌaka nojló purákaꞌaloji ñakeja waja, raú ñakeja kaja noꞌojipajíkano najló.5 Rejéchami Sanbalat wakáraꞌaka piño nojló purákaꞌaloji lanaꞌakéjami, pajluwa rijwaꞌaté jápajeri waꞌaté. Mapeja riká papera kaje iꞌimaká, unká nawakáraꞌajeri leꞌejé sello iꞌimalá rinaku. Riká waꞌaté pajluwa théꞌela ke pecha riwakáraꞌaka nojló purákaꞌaloji. 6 Riká purákaꞌaloji, rilanaꞌakare piño nojló chu kemari: “Marí ke yuku keñoꞌótako maárowa mapeja, ñaké kaja Guésem kemaká inaku. Nemá piyuke pijwaꞌatéjena judíona nakú: ‘Kaja napuraꞌó pajwaꞌatéchaka, nanakiyánaja iꞌimakáloje neꞌemakana penaje. Kaja unká naꞌalá nanakojó weꞌemakana wani purákaꞌalo. Ilé ke napechu iꞌimakale, náchoꞌota piño kurara chipúkaꞌatakanami rapumí chuwá. Rejomi naꞌajé piká, Nehemías, neꞌemakana penaje’, ke yuku mothoꞌoká maárowa. 7 Nemá kaja pinaku: ‘Kaja raꞌá Tupana purákaꞌalo jaꞌapátajeño, naꞌakáloje piká piyuke pajimila Jerusalén eyájena iꞌimakana penaje’, ke. Rejomi nemakáloje pinaku: ‘Kaja chuwa re piyuke Judá teꞌeré eyájena iꞌimakana’, ke. Ilé ke wani yuku mothoꞌoká maárowa. Apala ilé kaje puraꞌakajo ta yukuna iphájeri weꞌemakana Artajerjes nakú, raú numá pijló, piꞌijnakáloje majó, wapuraꞌakóloje palá rinaku penaje”, ke ripurákaꞌalo lanaꞌakéjami kemaká.
8 Raú nuwakáraꞌa piño rijló papera kaje rilanaꞌakare nojló apumí chojé. Richu numá rijló: “Ilé yuku pimakare nakú nojló, unká nuweꞌepila mékeka riká; ñaké kaꞌajná nemaká wanaku ilérowa, unká kaꞌajná. Pipechu keja kaꞌajná pikeñoꞌótaka yuku wanakojé”, ke numaká rijló papera kaje nulanaꞌakare piño rijló chu.
9 Kaja nawata wajló keroꞌótakana, wapechu laꞌakóloje ujwí wajápakaꞌala laꞌakana liyá, raú rejeja wayuríkaloje riká penaje. Eꞌiyonaja richaje kaphika nupechu laꞌakó piño rinaku jápakana nakú. 10 Rejomi nuꞌujná Semaías ñakaré ejo. Delaía iꞌirí riꞌimaká, Mehetabel laké riꞌimaká. Re riꞌimá riñakaré chu, itakeja richá ke. Nuphaka rinaku ee, rimá nojló: “Iꞌijná, weꞌejnachi Tupana ñakaré chojé, re wetaje wachó palá ukapú, Tupana iꞌimakare chu chojé. Marí ke walaꞌajika, nenoka piyá piká, kaja chuwajá lapí nawata pinókana”, ke rimaká nojló. 11 Eꞌiyonaja numá rijló: “Achiñana, nuká ke iꞌimakaño, unká ñaaló ajopana piyá. Unká kaja namujlúkaꞌala Tupana ñakaré chojé, namejñátakaloje nekó napinana liyá richojé. Ñakele unká numujlúkaꞌalaje Tupana ñakaré chojé nokó mejñátajo”, ke numaká rijló.
12 Nuweꞌepí kaja unká Tupana liyaje kalé ripurákaꞌalo, rimakare nakú nojló iꞌimaká. Nuweꞌepí mapeja ripuraꞌakó nujwaꞌaté ñaké, kaja Sanbalat, Tobías waꞌaté, aꞌakale rijló liñeru, rimakáloje nojló ñaké penaje. 13 Naꞌá rijló liñeru, rikeroꞌótakaloje nojló penaje, nulaꞌakáloje raú puꞌuwaré. Kaja nawata nulaꞌaká puꞌuwaré, raú inaꞌuké chapújraꞌakoloje nunaku penaje, inaꞌuké iphaka piyá noꞌopí. 14 Nupuraꞌó Tupana waꞌaté rinaku, numá rijló: “Tupana, nupechu iꞌimakare chojé kaphí piká. Piweꞌepí mékeka Sanbalat, Tobías waꞌaté, laꞌaká nuká chapú. Piweꞌepí kaja mékeka Noadías, pipurákaꞌalo jaꞌapátajeyo, eyá ajopana pipurákaꞌalo jaꞌapátajeño wátaka nojló keroꞌótakana. Piweꞌepí neká piyuke”, ke numaká rijló.
15 Kaja ewaja wañapata kurara chipúkaꞌatakana pajimila nakojé. Elul kérine lapaꞌatako veinticinco cha wakajé, wañapata rilaꞌakana. Pajluwata keri, eyá apú peꞌiyojé ketana weꞌemaká rilaꞌakana nakú. 16 E chapú wanaku péchuruna, ajopana teꞌeré eyájena, eyá wateꞌeré awaꞌá iꞌimakaño, jemaꞌañó kaja wañapátaka riká yukuna, raú kajrú nakeroꞌokó, nacháꞌatajeño ke weꞌemakale. Naweꞌepí kaja wañapátaka rilaꞌakana, Tupana aꞌakale wañathé rilaꞌakana aú.