—Maare piyuró, nuká jaꞌapájeri pajimila Betel ejo, rejo Tupana wakáriꞌichakale nuꞌujnaká.

Eꞌiyonaja Eliseo kemari rijló:

—Tupana ií aꞌakana aú numá pijló, ñakeja kaja numaká pijló rinaku pijimaya: unká nuyurílaje piꞌijnaká pikó rejo.

Raú naꞌapá rijwaꞌaté pajñakani Betel ejo. 3 Tupana purákaꞌalo jaꞌapátajeño, rewá iꞌimakaño, jáchoꞌoño Eliseo jimaje, nephákaꞌakoloje rijwaꞌaté. Nephátaka riká ee, nemá rijló:

—¿E piweꞌepika Tupana wáꞌajika chuwajá piliyá pewíñaꞌatajeri Elías?

—Aꞌa, kaja nuweꞌepí riká, iꞌimaniña kalé ajopánajlo riyukuna.

4 Rejomi Elías kemari Eliséojlo:

—Maare piyuró, nuká jaꞌapájeri Jericó ejo, rejo Tupana wakáriꞌichakale nuꞌujnaká.

Eꞌiyonaja Eliseo kemari piño rijló, maapami ke rimaká rijló keja kaja:

—Tupana ií aꞌakana aú numá pijló, ñakeja kaja numaká pijló rinaku pijimaya: unká nuyurílaje piꞌijnaká pikó rejo.

Raú naꞌapá piño rijwaꞌaté pajñakani Jericó ejo. 5 Ñakeja kaja Tupana purákaꞌalo jaꞌapátajeño, rewá iꞌimakaño, jáchoꞌoko reyá, nephákaꞌakoloje Eliseo waꞌaté penaje. Nephaka rinaku ee, nemá rijló:

—¿E piweꞌepika Tupana wáꞌajika piliyá chuwajá pewíñaꞌatajeri Elías?

—Aꞌa, kaja nuweꞌepí riká, iꞌimaniña kalé riyukuna ajopánajlo.

6 E naꞌapá piño reyá, meketana iꞌimajemi Elías kemari piño rijló:

—Maare piyuró, nuká jaꞌapájeri Jordán ejo, rejo Tupana wakáriꞌichakale nuꞌujnaká.

Eꞌiyonaja Eliseo kemari piño rijló:

—Tupana ií aꞌakana aú numá pijló, ñaké kaja numaká pijló rinaku pijimaya: unká nuyurílaje piꞌijnaká pikó rejo.

Raú naꞌapá piño rijwaꞌaté Jordán ejo. 7 Cincuenta Tupana purákaꞌalo jaꞌapátajeño, rewá iꞌimakaño, iphaño nanaku aꞌajnáreje ke. Juká kemachi neꞌemaká naliyá, e Elías, Eliseo waꞌaté iphaño juni Jordán turenaje. 8 Rejéchami Elías kaꞌaká rinakiyó raꞌarumaká waphereni. Riká riphilaꞌá palá, rejomi riñaꞌá juni jimá raú. Raú juni tamákaꞌataro paliyáaka, nakuwáꞌakaloje palá paꞌanojo pitá, makajreni riwami iꞌimakare chuwá. 9 Nakuwáꞌaka riká ejomi, Elías kemari Eliséojlo:

—Chuwa pimá nojló: ¿Na piwata nulaꞌaká pijló, nuyuríjika piká yámona?

Raú Eliseo kemari rijló:

—Nuwata paꞌaká nojló péchuji, nulaꞌakáloje nakaje pilaꞌajika iꞌimajika ke kaja, richaje nulaꞌakáloje piño nakaje ñaké kaja.

10 —Unká wejápaja kalé, kele nakaje pikejaꞌa nuliyá —ke Elías kemaká rijló—. Eꞌiyonaja kalé piꞌimajika ee nowaꞌá, nóchoꞌojiko ejéchami ee, riꞌimajé pijló pimíchaka nojló ke. Eyá unkájika ee piꞌimá nowaꞌá, nóchoꞌojiko maare eyá wakajé, unká nakaje iꞌimalaje pijló, ilé pimíchaka nojló ke.

11 Rejomi naꞌapá manaꞌija puraꞌakajo nakú pajwaꞌatéchaka. E manaꞌí chiyó peꞌiyowa jaꞌapaka, kawaruna chíraꞌakare kaje, iphari jeꞌechú chiyá neꞌemaká ejé. Keraꞌathani ke waja ramako kawaruna waꞌaté. Neká waꞌaté Elías jáchoꞌoro kajruni karená chipúkaꞌala kaje eꞌiyowá, ají ke jeꞌechú chojé. 12 Ilé ke Eliseo amaka aú rawíyoꞌo: “¡Noraꞌapá, noraꞌapá, piká mejñátakeri palá wani Israel michú lakénami iꞌimajika!”

Ilé ke ráchoꞌoñaaka riꞌimaká. Riwakajé Eliseo amá riꞌimaká kaja penaje marí ejaꞌawá chu.

Kamuꞌují Eliseo pechu iꞌimaká, Elías jáchoꞌoñaakale riꞌimaká. Akuwaná rijiyoꞌotá raꞌarumaká rinaku iꞌimakare. 13 Rejomi riwayoꞌó Elías aꞌarumakami jaꞌakaro rinakiyá, riꞌijraká jeꞌechú chojé yámona. Rejomi ripaꞌó juni Jordán ejo, iphari riturenaje, re ritáraꞌo meketánaja. 14 E rijñaꞌá Elías aꞌarumakami, raú riñaꞌá juni jimá, rimá: “¿Mere wawakáraꞌajeri, Elías pechu iꞌimakare chojé kaphí? ¿Mere riká?” Riñaꞌaká raꞌarumakami aú juni jimá ee, juni tamákaꞌatako piño rijló. Richuwá rikuwaꞌa juni paꞌanojo pitá riwami chuwá. 15 Tupana purákaꞌalo jaꞌapátajeño, Jericó eyájena, amaka aú riká, nemá rinaku: “Péchuji iꞌimari Elías waꞌaté iꞌimaká, penájemija kaja meꞌetení Eliseo waꞌaté”. 16 Nemá rijló:

—Pamá, maare weká pijwaꞌaté jápajeño keja. Re weká maare cincuenta, unká na piyá kalé keroꞌokaño weká, ñakele wemá pijló, piyuríkaloje weꞌejnaká pewíñaꞌatajeri kulaje. Apala Tupana Pechu kaꞌajná wáꞌari riꞌimaká. Rejomi kaꞌajná riyurí riká mapeja ipuré eꞌiyowá, apala riwami eꞌiyowá kaꞌajná.

Eꞌiyonaja rimá najló:

—Unká, unká na iwakáraꞌalaje rikulaje.

17 Eꞌiyonaja unká nalaꞌaló ujwí rijló kemakana nakú, riyuríkaloje neꞌejnaká rikulaje. Kaja ewaja riyurí neꞌejnaká, raú neꞌejná rikulaje. Weji ke kala ketana neꞌemaká rikulákana nakú, unká mérowa nephátala riká. 18 Raú napaꞌó Jericó ejo, Eliseo yuriko iꞌimaká ejo. Nephá rinaku, e nemá rijló:

—Unká wephátala riká.

—Kaja numá ijló iꞌimaká: iꞌijnaniña rikulaje, ke.