10 —Nuweꞌepí riká iphárino majó wachaje, Tupana waꞌateje riká. Ripurákaꞌalo jaꞌapátajeri kaja riká. Palani kaꞌajná walaꞌaká rijló pajluwa ukapú maare wañakaré chu, riyuríkoloje richu, riphájika majó wachaje kewá. Wayureje rikapure chojé pajluwa cama, pajluwa kaja ñákaꞌajori, ñakeja kaja mesa, eyá pajluwa lámpara rikamaré penaje. Ilé kaje wayureje richojé.

Palani ruyanajlo nakaje rumakare rijló nakú iꞌimaká, raú nalaꞌá rijló pajluwa ukapú nañakaré chu. 11 E apú wakajé riphá rejo, rikamátakoloje rikapure chu penaje. 12 E rimá rijwaꞌaté jápajeri, Guehazí rií iꞌimakajlo:

—Pimicha ilerú, marí pajimila Sunem eyájerujlo, ruꞌujnakáloje majó penaje.

Raú riꞌijná ruwáꞌaje. Ruphaka rejo ee, rimá piño rijwaꞌaté jápajeri Guehazijlo:

13 —Pimá kelerú inanaru, palájneꞌekeru wani iꞌimakayo wajwaꞌatejlo, na kaꞌajná ruwata walaꞌaká rojló. Ruwata kaꞌajná wapuraꞌakó ruchaya weꞌemakana waꞌaté, rilaꞌakáloje rojló nakaje palá. Ruwata kaja kaꞌajná wapuraꞌakó ruchaya suráana wakáraꞌajeri waꞌaté, rilaꞌakáloje rojló ñaké kaja nakaje palá.

Raú rijwaꞌateje kemari rojló ñaké. Raú rumá rijló:

—Unká na nuwátala ilaꞌaká nojló, palá nuká maare nukáꞌana waꞌaté.

14 Raú ripaꞌó Eliseo ejo, rimá rijló:

—Unká na ruwátala walaꞌaká rojló.

—Eta, ¿na chi walaꞌajla rojló?

—Kaapí, unká nuweꞌepila. Unká ruyani iꞌimalá, eyá kaja phíyuꞌuke wani kaja ruyajná —ke rimaká Eliséojlo.

15 —Pimicha piño rojló, ruꞌujnakáloje majó, nupuraꞌakóloje rujwaꞌaté penaje —ke Eliso kemaká rijló.

Raú riꞌijná piño ruwáꞌaje. Ruphaka rikapure numaná ejé ee, 16 Eliseo kemari rojló:

—Apú jarechí japi, meꞌetení kecha riꞌimajika wakajé, re piꞌirí iꞌimajé pikapi.

Raú rumá rijló:

—¿Naje pimá nojló nakaje, unká iꞌimalaje ñaké nojló nakú mapeja? Tupana waꞌateje piká, unká naje kalé pajlá nujwaꞌaté, pijwaꞌaté jápajeyo keja nuká.

17 Ilé ke napuraꞌakó pajwaꞌatéchaka. Rejomi apú jarechí eꞌiyá ruꞌumá kanupá. Riphaka rená chojé rojló wakajé, ruwaꞌa ruꞌurí, Eliseo kemaká rojló iꞌimaká ke. 18 E ruꞌurí keñoꞌó tawáꞌakajo, ewá kaja rikeñoꞌoká jaꞌapákaje palá. E pajluwape, yuwají joꞌó riꞌimaká wakajé, riꞌijná raraꞌapá amaje. Trigo icha ñaꞌajeño jápaka ejo riꞌijná. 19 Re riꞌimá najwaꞌaté, e manaꞌí chiyó rikeñoꞌó awíyoꞌokaje:

—¡Ay, nuwílaꞌaru! ¡Kewí wani nuwílaꞌaru chapátaka nuká! —ke.

Raú raraꞌapá kemari rijwaꞌaté jápajerijlo:

—Piwaꞌa riká raló ejo.

20 Raú riwaꞌa riká rejo. Raꞌá rojló riká, e ruwaꞌa riká, ruyáꞌata riká rukujyú nakojé. Kaápuꞌuku ejená riyaꞌo rukujyú nakú, rejéchami ritakaꞌaká. 21 E rujñaꞌá ritami Eliseo ukapure chojé, rejé rotoꞌotá ritami ricamané chojé. Rejomi rutá palá ukapú numaná, rejomi ruwitúkaꞌa reyá. Ruwaꞌa ruꞌurí michú jaraꞌapá maná, riꞌijnakáloje rejo penaje. Riphaka runaku ee, rumá rijló:

—Piwakáraꞌa pajluwa pijwaꞌaté jápajeri nakiyana wáꞌaka majó pajluwa kawarú, nuꞌujnakáloje rinaku Tupana purákaꞌalo jaꞌapátajeri Eliseo ejo. Rejomi nupaꞌajó piño majó.

E rimá rojló:

23 —¿Naje chi piwata ramákana chuwajá? Unká watánaꞌakaje kalé chuwajá; unká kaja wajé keri iphala, waꞌapátakaloje raú fiesta penaje.

—Piwó kaꞌaniño nujwaꞌaté —ke rumaká rijló.

24 Rejomi ruwakáraꞌa nayáꞌataka rojló ñákaꞌajori kaje kawarú wajlé chojé, rinaku ruꞌujnakáloje rejo penaje. E kaja róchoꞌo richojé yáꞌajo, e rumá najwaꞌaté jápajerijlo:

—Chuwa piwaꞌa wekó puꞌukuja rejo, unká méreje pitajnálajo, aꞌajná numájika pijló ejená.

25 Ilé ke ruꞌujnaká, ají ke yaꞌajnaje ipuré Carmelo ejo, rewá Tupana purákaꞌalo jaꞌapátajeri iꞌimajikale. Yaꞌajná joꞌó ruꞌumaká ee, Eliseo amá rukeñoꞌótako majó, raú rimá rijwaꞌaté jápajeri Guehazijlo:

26 —Piyakaꞌo, ilerú Sunem eyájeyo waícha. Piꞌijná kiñaja rujimaje, pikejaꞌa ruliyá nayukuna, pamákaloje mékeka ruká, eyá meke ruyajná, ñaké kaja neꞌerí.

Raú riꞌijná rujimaje, riphákaꞌako rujwaꞌaté ee, rikejaꞌa ruliyá piyuke nayukuna.

—Palá waja weká —ke rumaká rijló mapeja.

27 Rejomi roꞌopá ritukumá ipuré ejo, iphayo Eliseo nakú. Ruphaka rinaku penájeja, rujlámaꞌako riꞌimá nakojé, rumawíloꞌo riká ritajné nakiyá. Raú Guehazí iꞌijnari rowaꞌajé, rikaꞌakáloje ruká ritajné nakiyá, eꞌiyonaja Eliseo kemari rijló:

—Reja ruꞌumareja, kamuꞌují wani rupechu. Unká joꞌó Tupana kemalá nojló naka laꞌarí ñaké rupechu rojló.

28 Kaja ewaja rumá rijló:

—Unká numalá pijló iꞌimaká, paꞌakáloje nojló pajluwa yuwají penaje. Numá pijló iꞌimaká: Unká naje kalé pipajlá nujwaꞌaté, ke.

29 Raú Eliseo kemari rijwaꞌaté jápajerijlo:

—Pilamáꞌato, piꞌijnakáloje rejo penaje. Eko pijñaꞌá nukutiware pijwaꞌató, puꞌukuja piꞌijnajika rejo. Piphákaꞌajiko ee kaꞌajná na waꞌaté, unká pajalákalaje riká. Rajalákajika ee kaꞌajná piká, unká paꞌajipalaje rijló. Piphájika ruꞌurí tami ejo ee, pitoꞌotaje nukutiware rijimami chaje.

30 Eꞌiyonaja ralomi kemayo rijló:

—Tupana ií aú numá pijló, ñakeja kaja numájika pijló rinaku pijimaya: Unká nupaꞌalajo nuñakaré ejo nokó, aꞌajná piꞌijnajika nujwaꞌaté rejo ejená.

Raú riꞌijná rujwaꞌaté. 31 Guehazí iꞌijnari maapami ke natukumá. Riphaka támijimi iꞌimaká ejo ee, ritoꞌotajla rijimami chaje Eliseo kutiware, eꞌiyonaja unká riwajala ripéchuwa. Raú ripaꞌó piño riyámojo, riphákaꞌakoloje najwaꞌaté penaje. Riphákaꞌako najwaꞌaté ee, rimá Eliséojlo:

—Unká yuwají michú wajala ripéchuwa pikutiware aú.

32 E naꞌapá rejo, iphaño ruñakaré ejé. E Eliseo mujlúkaꞌa rikapure chojé, amari yuwají michú tami toꞌokó ricamané chu. Kaja maapami ke ritakaꞌaká michú. 33 Raú ritá rikapure numaná. Unká na apú iꞌimalá re rijwaꞌaté rikapure chu, rikaja kalé yuwají michú tami iꞌimari re. E ripuraꞌó Tupana waꞌaté. 34 Rejomi ráchoꞌo, piyuke rapáraꞌataka rinapónami rinapona aú. Rinumami lokoꞌopani kaja rinuma iꞌimari, eyá ñaké kaja rijlú iꞌimaká rijlumi lokoꞌopani kaja, eyá riyátheꞌelami chaje ritoꞌotá kaja riyátheꞌela. Kaja piyuke rapáraꞌataka rinapónami rinapona aú, raú imaꞌá kemachi rinapónami laꞌakó. 35 Eliseo jáchoꞌoro ritami chaya meketánaja, richiraꞌó meketánaja ukapú chuwá, rejomi ritoꞌó piño ritami cha. E manaꞌí chiyó yuwají tami aꞌachiñari iyamá kuwáꞌata ke pe, rejéchami rijmeꞌetaka rijluwa. 36 E Eliseo kemari Guehazijlo:

—Pimicha ralojlo, ruꞌujnakáloje majó.

Raú riꞌijná rojló kemaje. Iphayo Eliseo nakú, e rimá rojló:

—Marí piꞌirí.

Raú rujlámaꞌo riꞌimá nakojé, rejomi náchoꞌo ukapú chiyá ruꞌurí waꞌaté.