Akhaꞌákakajo yukuna marí
5
Reꞌiyowá ke kajrú naleꞌejé puraꞌakajo iꞌimajika pajwaꞌatéchaka. Kajrú achiñana, inaana waꞌaté, akhaꞌajika nawakáraꞌajeño maná. 2 Kajrú yaní iꞌimajíkaño kemakéñono: “Wawata trigo kulaje wajluwa, wayani takaꞌaká piyá meꞌepijí nakú”, ke. 3 Neꞌiyajena kemakeño: “Unká pachá aꞌajnejí iꞌimalá palá wajló aú wayaꞌatano liñeru ajopana liyá, wawarúwaꞌakaloje raú aꞌajnejí penaje. Eyá unkájika ee wapaꞌatá najló rapumí chojé, wayureje najló wamena, wañakaré, kaje maká”, ke nemájika. 4 Ajopana kemakeño kaja: “Ajopana liyá kaja wayaꞌatá liñeru, waꞌakáloje raú walewérika wemí weꞌemakánajlo. Ñakeja kaja wemaká najló wamena, wañakaré, kaje nakú, riyuríkoloje najló, unkájika ee wapaꞌatá najló liñeru, nayaꞌatákare wajló apumí chojé”, ke nemaká. Nemaké kaja: 5 “Piyukeja wawakáraꞌajeño judíona waja, weká ke kaja, raú pajluwa yaní keja weká pajwaꞌatéchaka. Ñakeja kaja wayani. Ñakele unká na aú kalé neká apoꞌojó waliyá. Eꞌiyonaja naꞌá wayani nakiyana ajopánajlo, nawarúwaꞌakaloje neká naliyá, najápakaloje najló mapeja penaje. Unká meke walaꞌalá nakaje iꞌimaká piyá wajló ñaké, kaja nakaꞌakale wamena waliyá piyuke”, ke nemaká nojló.6 Nomaꞌaká aú nakhaꞌaká namaná, eyá nájeka nakhaꞌaká namaná aú, kajrú nuyúchaꞌako. 7 Rejomi nuꞌujnatá ilé kaje nakú palá nupéchuwa. Rejomi nuꞌujná nawakáraꞌajeño waꞌaté puraꞌajó, nokhaꞌakáloje neká penaje, nawakáraꞌakale kajrú wani nekáꞌana laꞌaká nakaje jápakaje wani. Riká chona nokhaꞌá neká. Nowakata kaja neká piyukeja, wapuraꞌakóloje palá rinaku penaje. 8 Kaja piyukeja wawakako ejéchami, numaká nawakáraꞌajeñojlo: “Wapechu lokópaꞌala watáꞌajla piyuke wekáꞌana judíona iꞌimatákana ajopana teꞌeré eyájena liyá, naꞌakárena najló nawemí aú iꞌimaká. Inaꞌuké, unká weꞌepílaño Tupana nakojejlo, naꞌá neꞌemaká, ¿eta naje chi ikeñoꞌó piño chuwa wanakiyana aꞌakana ajopánajlo nawemí aú? ¿Ñakeja kaja, weꞌematákaloje neká penaje chi aꞌá piño neká najló?” 9 E numá piño najló: 10 “Piyuke nukáꞌana, nuñathé aꞌajeño, eyá nuká waꞌaté, yaꞌataño ñakeja kaja najló liñeru, waꞌá kaja najló aꞌajnejí. Ñakele numá ijló piyuke meꞌetení, wamákoloje nachaje piyuke nalewérikare wajló aú. 11 Numá kaja ijló meꞌetení, ipaꞌatákaloje piyuke ijwaꞌatéjenajlo namena, nejátakare eꞌiyá kajmú kaje, aꞌawaná kechá nojé, kele. Ipaꞌataje kaja najló nañakaré ikaꞌakare naliyá; amó nalewérikare ijló chaje. Nalewérika ijló liñeru kaꞌajná, nakaje icha ijí kaꞌajná, kajmú kaje jalá amúraꞌatakanami kaꞌajná, nakaje icha jilami kaꞌajná. Piyukeja nakaje nalewérikare ijló chaje amajo”, ke numaká najló, nalaꞌakáloje ñaké penaje.
12 Raú nemá nojló piyuke: “Ñaké riká, wapaꞌataje najló piyuke nakaje pimíchaje nakú wajló. Unká kaja na nakú wemalaje, napaꞌatákaloje wajló riká penaje. Pimíchaka rinaku ke walaꞌajika”.
Ilé ke nemaká aú, nuwaꞌa inaꞌukena chaya Tupana waꞌaté puraꞌajeño maná, nawakáraꞌajeño kemakáloje najimaje marí ke: “Walaꞌajé chuwa nakaje wemíchaka rinaku ke”.
13 Ñaké nemaká wajló najimaje. Rejomi nukaꞌá nunakiyó noꞌorumaká nakiyana. Riká eꞌiyayá nutaꞌá ripijá najimaje, ripijá nakiyana jáchoꞌokoloje reꞌiyayá penaje, e numá najló: “Marí nukaꞌaká noꞌorumaká eꞌiyayá ripijá, keja kaja Tupana kaꞌajika iká rileꞌejena inaꞌukena eꞌiyayá, unkájika ee ilaꞌá riká, imíchaje nakú Tupana ií aꞌakana aú. Rikaꞌajé kaja iliyá nakaje ileꞌejé iꞌimakare meꞌetení”.
Raú piyukeja awakaño rejé kemaño nojló: “Je, ñaké riká, reja riꞌimareja ñaké”.
Rejomi napuraꞌó palá Tupana nakú, reyá aꞌajná ñoꞌojó nalaꞌaké nemaká ke.
Palájneꞌeke Nehemías iꞌimaká piyukeja inaꞌukena waꞌaté yukuna marí
14 Neꞌemakana Artajerjes aꞌarí nuꞌumaká, nuꞌumakáloje Judá teꞌeré eyájena wakáraꞌajeri penaje. Nawakáraꞌajeri nuꞌumakale, riwakáraꞌake nukejáꞌaka liñeru nujwaꞌatéjena liyá nujluwa. Kaja iyamá iphata jiꞌimaji nakojé kele jarechí ketana cha nuꞌumaká nawakáraꞌajeri. Ketana unká nukejáꞌake liñeru nujwaꞌatéjena liyá nujluwa, unká kaja noꞌopiyatéjena kejáꞌakeño naliyá liñeru. 15 Eyá nawakáraꞌajeño, wapiyá iꞌimakaño, kejáꞌakeño kajrú najwaꞌatéjena liyá liñeru najluwa. Weꞌechú kaꞌalá keja nawakáraꞌajika najló cuarenta monedas kawemí nojé, plata nakiyá laꞌakanami, raú nawarúwaꞌakaloje najluwa aꞌajnejí, iꞌirakaje waꞌaté. Naꞌapiyatéjena wakáraꞌakeño kaja inaꞌuké aꞌaká najló liñeru. Eyá nuká, unká nulaꞌaké ñaké, nuphájikale Tupana jaꞌapí. 16 Kaja kurara laꞌakana pajimila nakuwaja nuweꞌepike nutukumó, eyá unká kaja noꞌoké nunakojó palá nojé teꞌerí ñaꞌakana nujluwa. Piyuke nujwaꞌaté jápajeño jápajika nujwaꞌaté kurara jáchoꞌotakana nakú. 17 Kajrú inaꞌukena iphájika naꞌajnewá ajñaje nujwaꞌaté, ciento cincuenta ewá kaꞌajná iphakeño. Keꞌiyapejena neꞌemajika: neꞌiyajena iꞌimakeño judíona, ajopana iꞌimakeño nawakáraꞌajeri waꞌaté jápajeño, ke neꞌemajika. Eyá kajrú kaja ajopana teꞌeré eyájena iphájika nunaku. Neká ajñákeño kaja naꞌajnewá nujwaꞌaté. 18 Weꞌechú kaꞌalá keja walaꞌajika kajrú aꞌajnejí. Nuká waja warúwaꞌakeri nuliñérute aú pajluwa jema pirakana, eyá pajluwa kuwáꞌata kele ovéjana paláruna, ñaké kaja makaꞌaphana, wajñákaloje neꞌimi penaje. Eyá iyamá théꞌela ke kala iꞌimajika wakajé, kajrú noꞌojika najló kajmú kaje jalá amúraꞌatakanami. Ilé ke nulaꞌajika, eꞌiyonaja unká nukejáꞌake nujwaꞌatéjena liyá liñeru, nawakáraꞌajeri nuꞌumajika eꞌiyonaja, nuweꞌepíkale kaja íkiꞌija wani najápajika. 19 Raú numá Tupánajlo: “Paꞌá pinakojó piyuke nakaje nulaꞌakare marí inaꞌuké waꞌaté, riꞌimakáloje nojló palá aꞌajná ñoꞌojó chami”.