Chapú nanaku péchuruna laꞌaká namákaja neká yukuna marí
4
Kaja Sanbalat jemaꞌá wakeñoꞌoká kurara laꞌakana piño rapumí chuwá yukuna, raú kajrú wani riyúchaꞌako. Riyuchá akuwaná mapeja riꞌichajika weká judíona nakú. 2 Piyuke rijwákeꞌena, eyá suráana Samaria eyájena kajena jimaje rimaké judíona nakú: “¿Meke kaꞌajná kele judíona, meꞌepijí ñaꞌajeño panaku ta pechu? ¿Meke kaꞌajná napechu ta?: ‘Nayureje kaꞌajná wakáraꞌataka piño wapirana nakiyana maare Tupánajlo’, ke kaꞌajná napechu ta. Apala napechu ta: ‘Pajluwa kala jápija walaꞌajé piño riká rapumí chuwá’, ke kaꞌajná. Jipa, kajrú nakáraꞌatakare iꞌimaká, rikaja kalé tami pitaró rewá. ¿Riká piño chi najñaꞌajé, nalaꞌakáloje piño riká rapumí chuwá penaje?”, ke rimaká wanaku.3 Re Tobías, amonítana nakiyana wakáraꞌajeri, iꞌimari kaja rawaꞌá re. Riká kemari piño: “¡Mapeja wani joꞌó nalaꞌaká ta piño kele kurara rapumí chuwá! Yuꞌuwé jáchoꞌokelo riꞌiwátaje, mapeja rikojnoꞌótakajla piño riká ta rapumí chuwá”. Ilé ke nalaꞌajika namákaja weká mapeja.
4 Raú nupuraꞌó Tupana waꞌaté, numá rijló: “Tupana, wapechu iꞌimakare chojé kaphí, pemaꞌá mékeka ajopana inaꞌukena iꞌichaká wanaku. Pipaꞌatá najló piyukeja puꞌuwaré nemakare wanaku, nekó namákaloje riyajwé penaje. Palani chapú nanaku péchuruna cháꞌatakajla neká nókakajo aú, rejomi nawáꞌakaloje neká najwaꞌató nateꞌeré ejo, rejo najápakaloje najló mapeja penaje. 5 Pamániño nachaje puꞌuwaré nalaꞌakare liyá, napuraꞌakole puꞌuwaré kurara laꞌajeñó nakú”, ke nupuraꞌakó Tupana waꞌaté nanaku.
Chapú nanaku péchuruna iꞌirataka namaná yukuna marí
6 Ilé ke neꞌechajika wanaku, eꞌiyonaja weꞌemaké rilaꞌakana nakuja. Kaja peꞌiyochá wáchoꞌotaka piño riká kurara, chipúkaꞌari pajimila nakojé iꞌimaká, rapumí chuwá. Wechi nujwaꞌatéjena jápajika rinaku. 7 Palá walamáꞌataka piño riꞌimaká rapumí chuwá. Wetata kaja palá raphú ke yuríkaro piyuke. Eꞌiyonaja Sanbalat, Tobías, eyá árabe nakiyana, Amón, Asdod, kele eyájena, jemaꞌaká aú riyukuna kajrú nayúchaꞌako piño. 8 Raú nawakó piyuke, napuraꞌakóloje pajwaꞌatéchaka, namákaloje mékeka nalaꞌakajla weká chapú, wayuríkaloje raú wajápakaꞌala laꞌakana. 9 Ilé ke nawátakale walaꞌakana chapú, wapuraꞌó Tupana waꞌaté. Waꞌá kaja wanakiyana, namákaloje wachá weꞌechú, eyá lapí waꞌató, namejñátakaloje weká naliyá penaje. 10 Rejéchami wanakiyana, Judá teꞌeré eyájena nakiyana kemaká: “Kajrú wani nakaje mujrumi maare, wakupátakaloje penaje. Kaja unká waliyá iꞌimalá chuwa, wáchoꞌotakaloje piño marí kurara rapumí chuwá”.
11 Chapú wanaku péchuruna pechu iꞌimari: “Unká naweꞌepílaje mékechamika wephájika neꞌiyajé, wenótakaloje neká, raú watajátakaloje naliyá najápakaꞌala penaje”, ke. 12 Eꞌiyonaja wanakiyana judíona, nañakajela ewá iꞌimajíkaño nakiyana, iꞌimakeño wajló nawátaka wakapichátakana yukuna. Methú ke neꞌejnajíkano wajló riyukuna iꞌimajé, nemaké wajló: “Piyukeja pajimila eꞌiyowá nephaje ikapichátaje”, ke. 13 Ilé kaje aú nuwakáraꞌa piyuke nujwaꞌatéjena jaꞌakó napé, nalekare waꞌaté. Nuwakáraꞌa nawakako palá marí ke: Pajluwa inaꞌuké nuwakáraꞌa awakako riyajalo, eyá piyuke riyani waꞌaté. Ñaké waja nuwakáraꞌaka nawakako piyukeja. Rejomi nuwakáraꞌa neꞌiyajena jaꞌakó napé kurara yámojo. Ajopana nuwakáraꞌa iꞌijnaká napé jaꞌajó kurara chaje; eyá ajopana nuyurí kaja jaꞌakó napé, kurara aphú iꞌimaká ewá. Piyuke najñaꞌaká nalekare najwaꞌató: joꞌojoji, ijijila, kaje maká. 14 Nomaka aú nakeroꞌokó, numá nawakáraꞌajeñojlo, ñaké kaja najwaꞌatéjenajlo waꞌaté: “Ikeroꞌoniño napiyá; iweꞌepí kajrú wani péchuri Tupana. Ripiyá wakeroꞌojla, wachaje wani riꞌimakale. Ñakele nephájika ee wanaku, inókajo najwaꞌaté, imejñátakaloje iteꞌeré eyájena, iyani, iluna, iñakaré, kele naliyá”, ke numaká najló.
15 Kaja ewaja chapú wanaku péchuruna jemaꞌañó waꞌakó napé yukuna. Naweꞌepí kaja Tupana aꞌaká puꞌuwaká wajló nakaje, nawátakare laꞌakana iꞌimaká. Raú wapaꞌó piño piyuke kurara, wajápakaꞌala walaꞌakare penájemija laꞌajé. 16 Reyá aꞌajná ñoꞌojó, peꞌiyowá nujwaꞌatéjena, achiñana nakiyana, jápakeño najápakaꞌala nakú, eyá peꞌiyowá kaja iꞌimaño nalekare waꞌaté. Kajrú nalekare iꞌimaká: kujyúwaꞌala, wejrukú, jemú, wiraꞌapara, ijijila, kaje maká iꞌimari nalekare. Wawakáraꞌajeño aꞌakeño najwaꞌatéjena, Judá teꞌeré eyájena ñathé jápakeño, kurara laꞌakana nakú. 17 Nakaje kachí nojé ñaꞌajeño, ñaꞌakeño ñakeja nakaje kachí nojé. Eꞌiyonaja kalé pajluwa nayátheꞌela aú najñaꞌaké nakaje kachini, eyá apoꞌojó pitá nayátheꞌela chu nalekare iꞌimaké. 18 Piyukeja jápakeño kurara laꞌakana nakú wachaphila nakiyá joꞌojoji akúwaꞌako. Eyá nowaꞌá luwiluwí kaje chojé aphoꞌojeri iꞌimaké. 19 Kaja numá piyuke wakáraꞌajeñojlo, eyá ajopana inaꞌukénajlo waꞌaté, marí ke: “Kajrú wani jápakaje wajló piyuke pajimila eꞌiyowá, ñakele jukawa kemachi wajápaka paliyáaka kurara jáchoꞌotakana nakú. 20 Ñaké iꞌimakale, jemaꞌajika ee luwiluwí mejé, wawakajo pajluwa chojé, wenókakoloje chapú wanaku péchuruna waꞌaté. Tupana, wapechu iꞌimakare chojé kaphí, iꞌimajeri wajwaꞌaté, rinókakoloje najwaꞌaté wachaya penaje”, ke numaká najló.
21 Ilé keja weꞌemajíkano. Kamú jáchoꞌojiko eyá wakeñoꞌokeno jápakaje, aꞌajná raꞌajiko ejená. Eyá peꞌiyowá wanakiyana iꞌimakeño nalekare waꞌaté. 22 Eyá riwakajé laínchu, numá piyuke inaꞌuké nujwaꞌaté iꞌimakáñojlo, ñaké kaja nañathé aꞌajéñojlo, nayuríkoloje piyukeja Jerusalén e penaje. Re waja nakamátakoloje, raú piyuke wamejñátakoloje naliyá, eyá muní ke weꞌechú walaꞌakáloje piño wajápakaꞌala penaje. 23 Eyá nuká, piyuke nojena waꞌaté, ñaké kaja wawaꞌaphena iꞌimajíkaño waꞌaté, unká wakaꞌaké wanakiyó waꞌarumaká lapí. Kaꞌarumakáruna waja wakamátajiko. Ñaké kaja walekare iꞌimajika wakapi wanakojó.